«جول قادىرىن جۇرگەن بىلەدى». جول ماسەلەسى تۇرعىندار ءۇشىن ءاردايىم وزەكتى. الايدا, بۇگىندە كەيبىر وبلىستىق جولداردىڭ ساپاسى سىن كوتەرمەيدى. اۋدان مەن اۋداندى, اۋىل مەن اۋىلدى جالعاپ جاتقان جولداردىڭ قىرىق جاماۋ, كەيبىرىنىڭ توزىعى جەتكەنىن كوز كورىپ ءجۇر.
دەي تۇرعانمەن اتقارىلىپ جاتقان جۇمىستار دا جەتەرلىك. ماسەلەن, جامبىل وبلىسى بويىنشا جالپى اۆتوموبيل جولدارى 9689 شاقىرىمدى قۇرايدى. ونىڭ ىشىندە رەسپۋبليكالىق ماڭىزى بار 1152 شاقىرىم, وبلىستىق ماڭىزى بار 1987 شاقىرىم, اۋداندىق ماڭىزى بار 1188 شاقىرىم جانە ەلدى مەكەندەرگە تيەسىلى 5362 شاقىرىم جول بار. بۇلاردىڭ ءبىرىنىڭ ساپاسى باس بارماقپەن باعالارلىق بولسا, ەندى ءبىرىنىڭ ساپاسى ورتاشا, ال ءبىرىنىڭ ساپاسى تومەن دەۋگە بولادى.
جامبىل وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ مالىمەتىنشە, وتكەن جىلى جول جوندەۋ ماقساتىنا 12,1 ملرد تەڭگە ءبولىنىپ, وعان 324 نىساندا 544 شاقىرىمعا جۋىق جەرگىلىكتى اۆتوجولدار مەن كوشەلەر جوندەلگەن. سونىمەن قاتار 1 كوپىردىڭ قۇرىلىسى جۇرگىزىلىپ, 2 جول وتكەلى قايتا جاڭعىرتىلعان. «جىل قورىتىندىسىندا جاقسى جانە قاناعاتتانارلىق جاعدايداعى وبلىستىق جانە اۋداندىق ماڭىزى بار جولداردىڭ ۇلەسى 80,1 پايىزعا جەتكىزىلدى. ال بيىلعى بولىنگەن 14,8 ملرد تەڭگەگە 346 نىساندا 602 شاقىرىم جەرگىلىكتى اۆتوجولدار مەن كوشەلەر جوندەلەدى. ونىڭ ىشىندە 16,2 شاقىرىم جاڭا جول سالىنىپ, 6,2 شاقىرىم قايتا جاڭعىرتىلادى. جانە دە 30 شاقىرىم جول كۇردەلى جانە 550 شاقىرىم جول ورتا جوندەۋدەن وتەدى», دەيدى باسقارما باسشىسى باقىتجان جانىبەكوۆ.
مەملەكەت تاراپىنان ءتيىستى قولداۋ كورسەتىلىپ, جولدار جوندەلىپ جاتىر دەسەك تە, وڭىردە ءالى دە بىرقاتار ماسەلەلەر بار. اتاپ ايتار بولساق, وبلىستىق ماڭىزى بار مويىنقۇم اۋدانى اۋماعىنداعى بىرلىك – مويىنقۇم – ۇلانبەل باعىتىنداعى جولداردىڭ 220 شاقىرىمىنان باستاپ توزعان. سونىمەن قاتار سارىسۋ اۋدانى اۋماعىنداعى توعىزكەنت – دوسبول – شىعاناق – سارىسۋ باعىتىنداعى جولداردىڭ دا ساپاسى سىن كوتەرمەيدى. تالاس اۋدانىنان مويىنقۇم اۋدانىنا قاراي وتەتىن اقكول – ويىق – ۇلانبەل جولىنىڭ دا جاعدايى وسىنداي. جولداردىڭ تالاي جىلدان بەرى جوندەۋ كورمەگەنى ءوز الدىنا, ءوزى ءب ۇلىنىپ جاتقان جولداردى اۋىر جۇك كولىكتەرى ودان ءارى بۇلدىرۋدە. وسى جولدار ارقىلى ارقايسىسى 40-50 توننا بولاتىن قىتايلىق اۋىر جۇك كولىكتەرى سارىسۋ اۋدانىنداعى شىعاناق كەنتىنەن شىعاتىن تۇزدى كورشى قىرعىز رەسپۋبليكاسىنا قاراي تاسىمالدايدى. سونىمەن قاتار وسى كۇرە جولدار ارقىلى قۇرىلىس زاتتارىن تاسيتىن كولىكتەر دە قانشاما. ال مۇنداي اۋىر جۇك كولىكتەرىن قاداعالايتىن جامبىل وبلىسى بويىنشا كولىكتىك باقىلاۋ ينسپەكتسياسىندا بار-جوعى ءۇش كولىك قانا بار ەكەن. ونىڭ ءوزى رەسپۋبليكالىق ماڭىزى بار جولداردى قاداعالايدى. ال جول بويىنداعى اۋىر جۇك كولىكتەرىن قاداعالاۋ جەرگىلىكتى جولاۋشىلار كولىگى جانە اۆتوموبيل جولدارى باسقارماسىنىڭ مىندەتىندە ەمەس. وسى ءبىر ماسەلەگە الداعى ۋاقىتتا جەرگىلىكتى بيلىك تاراپىنان ءتيىستى كوڭىل بولىنسە, بالكىم ءوزى جوندەۋ كورمەي كەلە جاتقان جولدار ودان ءارى ب ۇلىنبەس پە ەدى.
وسى ۋاقىتقا دەيىن جۋالى, تالاس جانە سارىسۋ اۋداندارىن ءوزارا بايلانىستىراتىن وبلىستىق ماڭىزى بار كۇيىك – قاراباستاۋ – قاراتاۋ – جاڭاتاس – ساۋداكەنت تاسجولىنداعى تۇيتكىلدى ماسەلەلەر جولاۋشىلاردىڭ جان اۋرۋى بولىپ كەلدى. الايدا, بۇگىندە اتالعان باعىتتاعى جولدارعا اعىمداعى جوندەۋ جۇمىستارى جۇرگىزىلگەن. سونىمەن قاتار وسى ۋاقىتقا دەيىن ورىن الىپ كەلگەن تاعى ءبىر ماسەلە – وبلىستىق, اۋداندىق جانە اۋىلدىق جولداردىڭ, سونداي-اق, ەلدى مەكەندەر ىشىندەگى شاعىن كوشەلەردىڭ ءبارىنىڭ دە بىردەي جولدار ساناتىندا بىرىكتىرىلىپ كەتۋى ەدى. وتكەن جىلى بۇل ماسەلە جامبىل وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ تاراپىنان رەتتەلىپ, جەرگىلىكتى ماڭىزى بار جولداردى تۇگەندەۋ جۇمىستارى جۇرگىزىلگەن. بۇل جۇمىستار اعىمداعى جىلدىڭ العاشقى توقسانىندا اياقتالىپ, ناتيجەسىندە 745 شاقىرىم جول زاڭ تالاپتارىنا سايكەستەندىرىلگەن. ەلدى مەكەن كوشەلەرىنىڭ ساناتتارى اۋىستىرىلعان.
باسقارمانىڭ مالىمەتىنشە, بولىنگەن ءتيىستى قاراجاتقا وبلىستىق ماڭىزى بار جولدار بىرتىندەپ جوندەلىپ كەلەدى. ماسەلەن جول ماسەلەسىنە بايلانىستى بۇگىندە وڭىردە بۇرىن بولماعان ءۇش جوبا قولعا الىنىپ وتىر ەكەن. ونىڭ ءبىرىنشىسى قىرعىزستان شەكاراسىنا تاراز قالاسىن وڭتۇستىكتەن اينالىپ ءوتۋ اۆتوجولىنىڭ قۇرىلىسى بولسا, ەكىنشىسى تاراز – سارىكەمەر – تۇيمەكەنت – اقشولاق باعىتىن جاڭعىرتۋ جانە ءۇشىنشىسى تاراز – جەتىباي – تەگىستىك – ويىق جولدارىن جوندەۋ. جيىرما جىلعا جۋىق ۋاقىتتان بەرى جوندەۋ كورمەگەن بۇل جولدار بيىل جوندەلىپ, حالىقتىڭ قاۋىپسىز قاتىناۋىنا ءوز ىقپالىن تيگىزبەك.
جامبىل وبلىسى