بەيسەنبى, 11 ءساۋىر 2013 2:00
اتىمتاي جومارت سىندى اقكوڭىل ازامات, بەلگىلى كاسىپكەر بولات نازارباەۆ قورداي اۋىلىنىڭ سولتۇستىك-باتىس جاعىنداعى 12 گەكتار اۋماققا ەكى وتباسىلىق, 70 كوتتەدجدەن تۇراتىن قالاشىق سالۋ ءۇشىن ءوڭىر ەكونوميكاسىنا قوماقتى ينۆەستيتسيا سالدى.
بەيسەنبى, 11 ءساۋىر 2013 2:00
اتىمتاي جومارت سىندى اقكوڭىل ازامات, بەلگىلى كاسىپكەر بولات نازارباەۆ قورداي اۋىلىنىڭ سولتۇستىك-باتىس جاعىنداعى 12 گەكتار اۋماققا ەكى وتباسىلىق, 70 كوتتەدجدەن تۇراتىن قالاشىق سالۋ ءۇشىن ءوڭىر ەكونوميكاسىنا قوماقتى ينۆەستيتسيا سالدى.
بۇگىندە بولاشاق قالاشىق قۇرىلىسشىلاردىڭ قايناعان جۇمىس الاڭىنا اينالعان. بەتون قۇيۋشىلار العاشقى 3 كوتتەدج قۇرىلىسىنىڭ ىرگەتاسىن قۇيىپ ءبىتىرىپ, كىرپىش قالاۋ جۇمىستارىنا كىرىسىپ تە كەتىپتى. ەل يگىلىگى جولىنداعى يماندى باستامانىڭ يەسى بولات نازارباەۆ سول ىرگەتاستىڭ بىرىنە العاشقى كىرپىشتى ءوز قولىمەن قالاپ, قۇرىلىسشىلاردىڭ جۇمىسىنا تابىس تىلەدى.
– بىزگە جارىق دۇنيە سىيلاعان ءالجان انامىز قورداي اۋدانىنداعى قاسىق اۋىلىنىڭ قىزى. سوندىقتان اسىل انامىزدىڭ كىندىك قانى تامعان ءوڭىر بىزگە دە وتە ىستىق. ەندەشە, التىن انامىزدىڭ اتىن ماڭگى ەستە قالدىرۋ ءۇشىن وسى ءبىر جاۋاپتى دا وتە ۇلكەن جوباعا تاۋەكەل ەتتىم. اۋداندا 5500 وتباسى تۇرعىن ءۇي كەزەگىندە تۇر ەكەن. بولاشاقتا «ءالجان اپا» اتىنداعى قالاشىقتا وسى كەزەكتە تۇرعانداردىڭ ىشىندەگى تۋعان جەرىنە كەلىپ تۋ تىككەن ورالماندار, شەكارا قىزمەتكەرلەرى, كەدەنشىلەر, مەملەكەتتىك قىزمەتكەرلەر جانە باسقا دا جاس ماماندار ۇلەسكەر رەتىندە ءۇي الىپ, تاتۋ-ءتاتتى ءومىر ءسۇرىپ, ال اۋلاسىندا بالالارىنىڭ شات-شادىمان كۇلكىلەرى ساڭقىلداپ ەستىلىپ جاتسا, بايتاق ءۇشىن دە, ءبىز ءۇشىن ودان ارتىق قانداي باقىت بار, – دەگەن كاسىپكەر ءوز جوباسىنىڭ قىر-سىرىن جينالعان جۇرتپەن بولىسكەن.
كاسىپكەردىڭ ايتۋىنا قاراعاندا, كەلەشەكتە قالاشىقتىڭ ءوز بالاباقشاسى, ستاديونى, بالالارعا ارنالعان ويىن الاڭدارى جانە تۇرعىنداردىڭ كۇندەلىكتى تۇرمىس قاجەتىن وتەيتىن تاعى باسقا دا الەۋمەتتىك نىساندارى بولادى. ال ءار 10 كوتتەدج ءبىر اۋلاعا بولىنەدى.
«ءالجان اپا» قالاشىعىنىڭ قۇرىلىس جۇمىسىن قولعا العان «سۇڭقار» جشس-نىڭ ديرەكتورى التىنبەك سادىرباەۆ تا وڭىرگە بەلگىلى ازاماتتاردىڭ ءبىرى. ول بۇعان دەيىن ەلىمىزدەگى جانە وبلىستاعى الەۋمەتتىك ماڭىزى ۇلكەن كوپتەگەن قۇرىلىس نىساندارىن ۋاقتىسىندا جانە ساپالى بىتىرۋىمەن تانىلىپ, حالىق قۇرمەتىنە بولەنگەن كاسىپكەر-قۇرىلىسشى بولاتىن. ونىڭ تاراز قالاسىنداعى ورتالىق بازاردىڭ جاڭا قۇرىلىس جۇمىسىن زامان تالابىنا ساي تەز ارادا سالىپ بىتىرگەنىنە دە جۇرت كۋا. ەندى, مىنە, ول تاعى ءبىر ۇلكەن جوبانىڭ تىزگىنىن ۇستاپ, ونى ويداعىداي بىتىرۋگە شىن نيەتىمەن كىرىسىپ وتىر.
ارينە, ءبىر-ەكى جىلدىڭ بەدەرىندە ءبىر قالاشىقتىڭ قۇرىلىسىن سالىپ ءبىتىرۋ وڭاي شارۋا ەمەس. بۇل رەتتە ا.سادىرباەۆ ءوزى باسقاراتىن سەرىكتەستىك قۇرىلىسشىلارىنىڭ تاجىريبەسىنە, تارتىبىنە جانە جاۋاپكەرشىلىگىنە سەنەتىنىن ايتقان. ايتسا ايتقانداي, قالاشىق قۇرىلىسىنىڭ ساپاسىنا جاۋاپ بەرەتىن ارنۇر مەيىربەكوۆ ءوز ءىسىنىڭ بىلگىر مامانى ەكەن. ول بۇگىندە قۇرىلىس الاڭىنا اسا قاجەتتى العاشقى 17 تەحنيكانى جەدەل جۇمىلدىرسا, 60 قۇرىلىسشى جۇمىستارىنا بىلەك سىبانىپ كىرىسىپ كەتكەن.
جوبادا كورسەتىلىپ, جوسپاردا بەلگىلەنگەن كوتتەدجدەردىڭ قابىرعاسى بيىل تولىق قالانىپ بىتەدى. سوندىقتان الداعى ۋاقىتتا 60 قۇرىلىسشىنىڭ قاتارى 250-300 ادامعا دەيىن كوبەيمەكشى. سونداي-اق, قۇرىلىس ماماندارى مەن شەبەرلەرىنەن باسقا كوپتەگەن جەرگىلىكتى تۇرعىندار دا قارا جۇمىسقا تارتىلماقشى. ال ولارعا الاڭسىز جۇمىس ىستەۋ ءۇشىن سەرىكتەستىك تاراپىنان بارلىق جاعداي جاسالىپ, جاتاقحانامەن, ۋاقىتىلى ىستىق تاماقپەن قامتاماسىز ەتىلەدى.
داۋلەتتى ادامدار بۇعان دەيىن, ادەتتە, تۋعان اۋىلىنا مەشىت, سپورت زال, ءارى كەتسە بالاباقشا سالىپ بەرۋمەن شەكتەلىپ كەلسە, بەلگىلى كاسىپكەر بولات نازارباەۆ قۇلاشتى كەڭگە سەرمەپ, ەل تۇرعىندارى ءۇشىن ءوز قارجىسىنا ءبىرىنشى بولىپ قالاشىق سالۋعا تاۋەكەل ەتىپ وتىر. مۇنداي باستامانى باسقالارعا ۇيالماي ۇلگى ەتۋگە بولادى. ويتكەنى, بولاشاقتا 140 وتباسىنىڭ التىن ۇيا-مەكەنىنە اينالاتىن 70 كوتتەدج سالۋعا كەز كەلگەن جومارتتىڭ تاۋەكەل ەتە بەرمەسى انىق.
كوسەمالى ساتتىباي ۇلى,
«ەگەمەن قازاقستان».
جامبىل وبلىسى,
قورداي اۋدانى.