ونىڭ ايتۋىنشا, بۇل 154 ادامنىڭ 141-ءى (ونىڭ ىشىندە 53 بالا) سۋعا تۇسۋگە جابدىقتالماعان ورىنداردا, 13 ادام (ونىڭ ىشىندە 5 بالا) جابدىقتالعان ورىنداردا سۋعا كەتكەن.
كوميتەت توراعاسى ادامداردىڭ قازا بولۋىنىڭ نەگىزگى سەبەپتەرى رەتىندە سۋعا شومىلۋ كەزىندە ءوز كۇشتەرىن جەتە باعالاماۋ (121 ادام, ونىڭ ىشىندە 42 بالا), بالالاردى ەرەسەك ادامداردىڭ قاراۋىنسىز قالدىرۋ (14 بالا سۋ قويمالارىنا, ارىقتارعا, كانالدارعا قۇلاۋ سالدارىنان قايتىس بولدى), 17 ادام ماس كۇيىندە سۋعا باتىپ, 2 بالا جۇزە الماۋ سالدارىنان قايتىس بولعانىن اتاپ ءوتتى.
– وتكەن جىلمەن سالىستىرعاندا سۋعا كەتكەن ادامدار سانىنىڭ ءوسۋى اقمولا (+12), الماتى (+9), باتىس قازاقستان (+9), تۇركىستان (+7), قوستاناي (+6) وبلىستارىندا بايقالادى. ماسەلەن, 8-14 شىلدە ارالىعىندا ەلىمىزدىڭ سۋ ايدىندارىندا 61 ادام, ونىڭ ىشىندە 22 بالا سۋعا كەتتى. ال وتكەن دەمالىس كۇندەرى, ياعني 13-14 شىلدە كۇندەرى ەلىمىزدىڭ سۋ ايدىندارىندا 22 ادام (ونىڭ ىشىندە 7 بالا) قازا بولدى, ولار سۋعا شومىلۋ كەزىندە جابدىقتالماعان جەردە جانە سۋارۋ ارنالارىندا سۋعا باتىپ كەتتى, – دەدى ۆ.بەككەر.رەسمي مالىمەتكە قاراعاندا, ەلىمىزدە حالىقتىڭ شومىلۋى, دەمالۋى جانە بالىق اۋلاۋى ءۇشىن پايدالانىلاتىن 50 مىڭنان استام سۋ قويماسى بار, ولاردا بيىلعى جىلى 607 رەسمي جاعاجاي (107 كوممۋنالدىق جانە 500 جەكە جاعاجاي) قۇرىلىپ, جۇمىس ىستەيدى.
– تجك قۇتقارۋ بولىمشەلەرى 607 جاعاجايدىڭ تەك 27-ءى (كوممۋنالدىق جاعاجايلار) سۋدا قۇتقارۋ ستانساسىنىڭ ەسەبىنەن, سونداي-اق 113 قاۋىپتى سۋ ايدىندارىنىڭ ۋچاسكەسى (تابيعي جاعاجايلار) قوسىمشا ءموبيلدى قۇتقارۋ بەكەتتەرىن (2-3 قۇتقارۋشى جانە 1 ءجۇزۋ قۇرالىمەن 53 بەكەتى) قويۋ ارقىلى باقىلانادى, – دەپ اتاپ ءوتتى توتەنشە جاعدايلار كوميتەتىنىڭ توراعاسى.
سۋ ايدىندارىن جانە سۋداعى دەمالىس ورىندارىن قامتۋدى ارتتىرۋ ءۇشىن تجك اۋماقتىق ءبولىمشەلەرى جىل سايىن قۇتقارۋشى-جاساقشىلاردى اقىسىز نەگىزدە وقىتۋدى جۇزەگە اسىرىپ كەلەدى. بيىل 880 قۇتقارۋشى-جاساقشىلار دايىندىقتان وتكەن, ولاردىڭ ەسەبىنەن جەكە دەمالىس ايماقتارىندا 335 وبەكتىلىك قۇتقارۋ بەكەتى قۇرىلعان. سونىمەن قاتار قوعامدىق ورىنداردا بولۋ جانە ورتاق سۋ پايدالانۋ ەرەجەلەرىنىڭ تالاپتارىن ساقتاۋ بويىنشا بىرلەسكەن رەيدتىك ءىس-شارالار بەلسەندى جۇرگىزىلۋدە.