بۇل جونىندە اتىراۋ وبلىسىنىڭ اكىمى نۇرلان نوعاەۆ ارىسقا جۇمىس ساپارىمەن كەلگەن پرەمەر-مينيستر اسقار مامينگە باياندادى. سودان سوڭ, وبلىس اكىمى مەردىگەر ۇيىمداردىڭ باسشىلارىمەن كەڭەس وتكىزدى.
- ارىستاعى وقيعا بۇكىل ەلىمىزگە اۋىر سوققى بولدى. قازاقستاننىڭ تۇكپىر-تۇكپىرىنەن ادامدار ارىستىڭ تۇرعىندارىنا كوڭىل ءبىلدىرىپ, ءتۇرلى كومەك كورسەتىپ جاتىر. ۇيلەردى قالپىنا كەلتىرۋ جۇمىستارى ساپالى جۇرگىزىلىپ, ۋاقتىلى اياقتالۋى ءتيىس. سىزدەرگە ۇلكەن جاۋاپكەرشىلىك جۇكتەلىپ وتىر. ۇيلەردى سالعاندا كىرگەن ادامدار ريزا بولىپ, سىزدەردى جىلى سەزىممەن ەسكە الاتىنداي قىلىپ ىستەڭىزدەر,-دەدى نۇرلان نوعاەۆ.
ءوڭىر باسشىسى كەڭەستەن سوڭ ارىس تۇرعىندارىمەن كەزدەسىپ, تىلەكتەرىن تىڭدادى.
- اتىراۋلىقتار مەملەكەت باسشىسىنىڭ ۇندەۋىن قولداپ, ارىستى قالپىنا كەلتىرۋگە بەلسەندى اتسالىسۋدا. گۋمانيتارلىق كومەك, قاراجات جىبەرىلدى, ەرىكتىلەر باردى. بۇل بالا كەزىمىزدەن قانىمىزعا سىڭگەن قاسيەت, قيىن-قىستاۋ ساتتە ەلىمىزدىڭ تۇرعىندارى وتانداستارىن قولداۋسىز قالدىرمايدى,-دەپ اتاپ ءوتتى وبلىس اكىمى.
ءوز كەزەگىندە, ارىس تۇرعىندارى قولداۋ كورسەتكەنى ءۇشىن اتىراۋلىقتارعا ريزاشىلىعىن ءبىلدىردى.
- ءبىز بارلىعىنا دا, ەلباسىنا, پرەزيدەنتكە, اتىراۋ وبلىسىنىڭ تۇرعىندارىنا زور راحمەت ايتامىز. ساپالى, جاقسى ۇيلەردىڭ قارقىندى سالىنىپ جاتقانىن كورىپ وتىرمىز. سىن ساتتە شەتكەرى قالماي, قولداۋ كورسەتكەندەرىڭىزگە راحمەت. ۇيلەرىمىز بىتكەسىن اتىراۋ وبلىسىنىڭ تۇرعىندارىن قۋانا-قۋانا شاقىرامىز. سىزدەر ۇمىتىلماستاي بولىپ ەسىمىزدە قالاسىزدار,-دەدى قالا تۇرعىنى ءبيبىحاديشا مومىن.
اتىراۋ