اكەسى مايدان دالاسىنا اتتانعاندا بوريا التى جاستا بولعان. كەسكىن-كەلبەتىن فوتولارعا قاراپ قانا ەلەستەتە الادى.
«اكەممەن قاقاعان قىستا سابان جيناعانىم ەسىمدە. ۇلكەن دەنەلى, كەڭ يىقتى قالپىندا ەسىمدە جاتتالىپ قالىپتى», دەيدى ۇلى.
نيكولاي يۆانوۆيچ سۇراپىل شايقاستاردىڭ بىرىندە 1942 جىلى 24 مامىردا قازا تاپقان. بوريس اكەسىنىڭ قايدا جەرلەنگەنىن سۇراستىرىپ, ءتيىستى ورىندارعا بىرنەشە رەت ساۋال جولداعانىمەن, ەش ناتيجە بەرمەگەن. ىزدەۋ جاساقتارىنان دا كومەك سۇراعان.
ەندى, مىنە, ارادا 77 جىل وتكەندە بوريس بۋركوۆتىڭ ۇيىنە قۋانىشتى حابار كەلگەن. نوۆگورود وبلىستىق قوعامدىق ۇيىمىنىڭ «ناحودكا» دەپ اتالاتىن ىزدەۋ جاساعىنىڭ جەتەكشىسى نيكولاي بۋركوۆتىڭ دەنەسى تابىلعانىن حابارلاعان. مەدالوندا اتى-جونىمەن قوسا نوۆوكامەنكا اۋىلىنىڭ تۋماسى ەكەنى جازىلعان.
ەڭبەك ارداگەرى جيەنىمەن بىرگە جەرلەۋ راسىمىنە تۋعان جەردەن ءبىر ۋىس توپىراق الا بارعان. پوليا دەرەۆنياسىندا 60 جاۋىنگەردىڭ دەنەسى جەر قوينىنا قايتا تاپسىرىلعان.
سولتۇستىك قازاقستان وبلىسى