قوستانايداعى جەڭىس ساياباعى – وبلىس ورتالىعىنداعى كورىكتى ورىننىڭ ءبىرى. مايداندا ەرلىك كورسەتكەن قوستانايلىق جاۋىنگەرلەرگە قويىلعان باس ەسكەرتكىش, بوزداقتار ءتىزىمى, ماڭگىلىك الاۋ جانە سوعىس تەحنيكالارىنىڭ اشىق اسپان استىنداعى مۋزەيى قاتارىنا جۋىردا سوعىس جىلدارىنداعى مەدبيكەنىڭ ءمۇسىنى قوسىلدى. يىعىنا ىلگەن اۆتوماتى, جانىندا ءدارى-دارمەك سالىنعان سومكەسىن ارتىپ قويعان ءيتى بار مەدبيكە جاۋ وعىنان جارادار بولعان جاۋىنگەرلەرگە جەتۋدى ويلاپ, وجەتتەنە قاراپ تۇر. ولار سوعىستا تالاي جاۋىنگەردى اجال تىرناعىنان امان الىپ قالدى. جارادار جاۋىنگەرلەردى تاسىپ ءجۇرىپ, مەدبيكەلەردىڭ وزدەرى دە وققا ۇشتى.
ەسكەرتكىشتى ورناتقان اۋىل شارۋاشىلىعى سالاسىنىڭ ارداگەرى بەك ءجۇسىپوۆتى بۇل وي وسىدان 5-6 جىل بۇرىن مازالاعان ەكەن.
– دەنساۋلىعىم ءۇشىن ەسەنتۋكيگە بارعانىمدا مەدبيكەگە قويىلعان ءمۇسىن مەنى تولقىتىپ جىبەرگەن ەدى. ايتارى بولسا قارا تاس تا كادىمگىدەي جۇرەگىڭدى جىلىتادى ەكەن. «مۇنداي ەسكەرتكىش بىزدە نەگە جوق؟» دەپ ويلادىم. قوستانايعا كەلگەن سوڭ بەلگىلى ازامات ءجاندىلدا ماقانوۆقا ويىمدى ايتتىم. مەن اۋىلداعى شارۋا باققان, جەر كۇتكەن كاسىپكەرمىن. ول كىسى ءبىلىمدى, ساياساتتان, تاريحتان, مادەنيەتتەن حابارى مول ادام عوي. ول ويلانىپ, «ءولى ريزا بولماي, ءتىرى بايىمايدى» دەگەندەي, ەسكەرتكىشتىڭ اسكەري مەدبيكەگە قويىلعانى دۇرىس دەگەن پىكىرىن ايتتى. وكىنىشتىسى, تاعدىردىڭ ىسىمەن وتكەن جىلى ءجاندىلدا قوجاحمەت ۇلى قايتىس بولىپ كەتتى. مەن وسى باستامانى اياعىنا دەيىن جەتكىزۋدى ويلادىم, – دەيدى بەك ءجۇسىپوۆ.
بەك اعا بۇل ىسكە وتكەن كۇزدەن باستاپ كىرىسەدى. العاشقىدا ونى جۇرە تىڭداعاندار بولعانىمەن, ءىس ساتىمەن جۇزەگە استى. ءوزىنىڭ ويىن, باستاماسىن وبلىس اكىمى ارحيمەد مۇحامبەتوۆكە ايتقاندا, ول باستامانى بىردەن قوشتادى. بەكەڭ دە ويعا العان ىسىنە شابىتتانا كىرىسىپتى. ەسكەرتكىشتى اقتوبە قالاسىنداعى شەبەرلەرگە پلاستيكتەن قۇيدىرىپ اكەلدى.
– مۇندايدا جالعىز جۇگىردىم دەۋگە بولمايدى, جاقسىلاردىڭ قولداۋ-كومەگىنسىز نە ىستەي الار ەدىم؟ ارحيمەد بەگەجان ۇلىنا جانە يگى ىسكە جاناشىرلىق تانىتىپ, كومەگىن بەرگەندەرگە راحمەتىمدى ايتامىن, – دەيدى بەك اعا.
ساياباققا كەلگەندەر مەدبيكە ەسكەرتكىشىنىڭ الدىندا ءسال كىدىرمەي وتە المايدى. جۇرەگى مەيىرىمگە تولى, قولى شيپا جانداردىڭ اجالعا قارسى تۇرار ارپالىسى بۇگىن دە جالعاسىپ جاتىر. قازىر دە ناۋقاستاردى قۇراق ۇشىپ كۇتەتىن مەدبيكەلەر جۇمىسى جەڭىل ەمەس. ەڭبەكقورلىق پەن مەيىرىمدىلىكتى بويىنا جيعان, كەرەك كەزىندە ەرلىككە دايار جاننىڭ تاس بەينەسى بارشا قاۋىمنىڭ جۇرەگىنە شۋاق قۇيادى. ىزگىلىك قونعان جەردە مەدبيكەنىڭ دە ورنى بار.
قوستاناي