كەلىسسوزدەر بارىسىندا ساۋدا-ەكونوميكالىق ءوزارا ءىس-قيمىلدى ودان ءارى قارىشتى دامىتۋ ماسەلەلەرى تالقىلاندى. ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ ونىنشى وتىرىسىنىڭ قورىتىندىلارى قارالدى. 2018 جىلى قازاقستان مەن گرۋزيا اراسىنداعى سىرتقى ساۋدا اينالىمى 34,6%-عا ارتىپ, $100 ملن جۋىق قۇرادى.
ۇكىمەتتەر باسشىلارى ءوزارا تاۋار اينالىمىن ودان ءارى ارتتىرۋدىڭ قولدا بار ەلەۋلى الەۋەتىن اتاپ ءوتتى. ەلدىك ەكونوميكالاردىڭ قۇرىلىمى تۋريزم, اۋىل شارۋاشىلىعى, يندۋستريالاندىرۋ, كولىك, ەنەرگەتيكا سالالارىنداعى ءوزارا ءتيىمدى ىنتىماقتاستىقتىڭ سپەكترلەرىن كەڭەيتۋگە مۇمكىندىك بەرەدى.
تاراپتار ەكونوميكانىڭ جەكەلەگەن سالالارى جانە ناقتى ينۆەستيتسيالىق جوبالار بويىنشا تاۋار اينالىمىنىڭ كولەمىن ۇلعايتۋ جانە نومەنكلاتۋراسىن كەڭەيتۋدى قامتاماسىز ەتۋ جونىندەگى شەشىمدەردى قابىلداۋعا نيەت ءبىلدىردى. سونىڭ ناتيجەسىندە ءوزارا ساۋدا-ساتتىق كولەمدەرىن قىسقا مەرزىمدى كەزەڭدە ەكى ەسە ۇلعايتىپ, $300 ملن جەتكىزۋ كوزدەلگەن.
ترانزيتتىك-كولىك سالاسىندا, ونىڭ ىشىندە ترانسكاسپي حالىقارالىق كولىك باعدارىن دامىتۋ اياسىنداعى ءوزارا ءىس-قيمىل ماسەلەلەرىنە نازار اۋدارىلدى. بۇل باعىتتاعى ترانزيتتىك تاسىمالدار 2015 جىلدان باستاپ 2018 جىلعا دەيىن 13 ەسەدەن استامعا ارتتى. بيىل 120 مىڭ كونتەينەرگە دەيىن ۇلعايتۋ جوسپارلانىپ وتىر.
گرۋزيانىڭ پرەمەر-ءمينيسترى مامۋكا باحتادزە قازاقستان مەن گرۋزيانىڭ تاريحي جاقسى سەرىكتەستەر ەكەنىن اتاپ ءوتىپ, ىنتىماقتاستىقتى دامىتۋدى تەرەڭدەتۋگە قىزىعۋشىلىعىن ءبىلدىردى.
ءوز كەزەگىندە قر ۇكىمەتىنىڭ باسشىسى اسقار مامين گرۋزيا پرەمەر-ءمينيسترىنىڭ ساپارى ءوزارا ءتيىمدى ساۋدا-ەكونوميكالىق ىنتىماقتاستىقتى ودان ءارى دامىتۋعا ەلەۋلى سەرپىن بەرەتىنىن ايتتى.
«ءبىزدىڭ ورتاق مىندەتىمىز – كولەمدەردى ۇلعايتىپ, ەلدەردىڭ ساۋدا سالاسىنداعى ءوزارا ءىس-قيمىلىنا جاڭا سەرپىن بەرەتىن جوبالار مەن مۇمكىندىكتەردى جۇزەگە اسىرۋ», — دەدى ا. مامين.
ۇكىمەتتىك كەلىسسوزدەردىڭ قورىتىندىسى بويىنشا بىرقاتار قۇجاتتارعا قول قويىلدى:
1. قازاقستان رەسپۋبليكاسى مەن گرۋزيا اراسىنداعى 2019–2022 جىلدارعا ارنالعان ءوزارا تاۋار اينالىمىنىڭ نومەنكلاتۋراسىن كەڭەيتۋ جونىندەگى جول كارتاسى;
2. قازاقستان ۇكىمەتى مەن گرۋزيا ۇكىمەتى اراسىنداعى 2007 جىلعى 6 ناۋرىزداعى حالىقارالىق اۆتوموبيل قاتىناسى تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتاما;
3. قر اۋىل شارۋاشىلىعى مينيسترلىگى مەن گرۋزيانىڭ اۋىل شارۋاشىلىعى مينيسترلىگى اراسىنداعى اۋىل شارۋاشىلىعى سالاسىنداعى ىنتىماقتاستىق جونىندەگى ءوزارا تۇسىنىستىك تۋرالى مەموراندۋم;
4. قر ەڭبەك جانە حالىقتى الەۋمەتتىك قورعاۋ مينيسترلىگى مەن گرۋزيانىڭ ەڭبەك, دەنساۋلىق ساقتاۋ جانە الەۋمەتتىك قورعاۋ مينيسترلىگى اراسىنداعى الەۋمەتتىك-ەڭبەك سالاسىنداعى ىنتىماقتاستىق تۋرالى مەموراندۋم.