بۇگىن نۇر-سۇلتانداعى لەۆ گۋميلەۆ اتىنداعى ەۋرازيا ۇلتتىق ۋنيۆەرسيتەتىندە شاحماتتان دينارا سادۋاقاسوۆانىڭ كۋبوگى ءۇشىن جارىس باستالدى.
«جاستار جىلىنا» ارنالعان ءتۋرنيردىڭ جۇلدە قورى 1,5 ميلليون تەڭگەنى قۇرايدى. ول ەكى كۇنگە سوزىلادى. بۇل باسەكەلەردە رەسپۋبليكامىزدىڭ بارلىق وڭىرىنەن كەلگەن 110 ستۋدەنت باق سىناۋدا. ەرلەر اراسىندا 1-10 جانە ايەلدەر سايىسىندا 1-7 ورىنداردى يەلەنگەن ويىنشىلار ديپلوم جانە مەدالدارمەن قوسا, اقشالاي سىيلىقتارمەن ماراپاتتالادى.
– ءبىز جىل سايىن ستۋدەنتتەر اراسىندا تۋرنير وتكىزىپ تۇرامىز. ول جاستار ءۇشىن وتە قاجەت. وسىنداي جارىستار ارقىلى ولاردىڭ شەبەرلىگى شىندالادى, تاجىريبە جينايدى. بيىلعى دوداعا 110-نان اسا ويىنشىلاردىڭ جينالعانىن ەستىپ, قاتتى قۋاندىم. وسى تۋرنيردە باق سىناپ جاتقاندار اراسىنان كەلەشەكتە مىقتى شاحماتشىلار شىعاتىنىنا كامىل سەنەمىن, – دەيدى اتاقتى شاحماتشى دينارا سادۋاقاسوۆا.