ورال قالاسىندا تۇرمىستىق قاتتى قالدىقتاردى وڭدەۋ كەشەنى ىسكە قوسىلدى. بۇل فين ينۆەستورلارىمەن ارادا جۇرگىزىلگەن بىرنەشە جىلدىق ارىپتەستىكتىڭ جەمىسى. «جاسىل ەكونوميكا» اياسىندا قىزمەتىن باستاعان كاسىپورىننىڭ اشىلۋىنا ءوڭىر باسشىسى التاي كولگىنوۆ كەلدى.
فين ينۆەستورلارىنىڭ باستاماسىمەن ىسكە قوسىلعان وڭىردەگى تۇڭعىش كەشەن جىلىنا 100 مىڭ توننا قاتتى قالدىقتى وڭدەي الادى. بۇل جونىندە شاراعا قاتىسقان فينليانديالىق «ICM Recycling Creen Service Company» كومپانياسىنىڭ قۇرىلتايشىسى كالۆەر كاپپەر مەن «Finnish Business Hub» ورتالىعىنىڭ ديرەكتورى مۇحتار مانكەەۆ ايتىپ بەردى.
ءبىر قىزىعى, ورالداعى وسى جوبانىڭ العاشقى «كىرپىشى» استاناداعى «ەكسپو-2017» كورمەسىندە قالانعان. دالىرەك ايتساق, باتىس قازاقستان وبلىسى باسشىلارى مەن فين كاسىپكەرلەرىنىڭ تانىستىعى سول كەزدەن باستالىپتى. ەكىجاقتى كەلىسسوزدەر ناتيجەسىندە پايدا بولعان بۇل كەشەندى كوتەرۋگە 400 ملن تەڭگە جەكە قارجى قۇيىلعان. ازىرگە مۇندا 45 ادام قىزمەت ەتىپ جاتىر. جاقىن ارادا وڭدەۋ كەشەنىنىڭ قىزمەتكەرلەرى 100 ادامعا جەتپەك.
- وسى ماڭىزدى جوبانى ىسكە قوسۋعا ەكى جىل ەڭبەك كەتتى. اۋەلى «ەكسپو-2017» كورمەسىندە قاتتى قالدىقتاردى وڭدەيتىن فيندىك كومپانيانىڭ جۇمىسىمەن تانىستىق. كوپ ۇزاماي فينليانديا ەلىنە ارنايى باردىق. ول ەل كوڭ-قوقىستى وسىدان 20 جىل بۇرىن وڭدەي باستاعان ەكەن. قازىر كوپ تاجىريبە جينادى. بۇگىندە استانا جانە الماتى قالالارىندا دا وسىنداي كاسىپورىن سالىنىپ جاتىر. فينليانديا كومپانيالارىمەن اراداعى كەلىسىم بويىنشا ينۆەستور 400 ملن. تەڭگە قاراجاتىن وسى كاسىپورىننىڭ قۇرىلىسىنا جۇمسادى. مىنە, بۇگىن قاتتى تۇرمىستىق قالدىقتاردى سۇرىپتايتىن كەشەن ىسكە قوسىلدى. ءبىزدىڭ ۇسىنىسىمىزدى قولداعان فيندىك كومپانيا وكىلدەرىنە جانە فين بيزنەس حابىنىڭ ديرەكتورى مۇحتار مانكەەۆكە العىس ايتامىز, - دەدى ءوڭىر باسشىسى التاي كولگىنوۆ.
- فينليانديادا تۇرمىستىق قاتتى قالدىقتىڭ 99 پايىزى قايتا وڭدەلەدى. قازاقستانداعى بۇل كورسەتكىش ازىرگە 11 پايىزدى عانا قۇرايدى ەكەن. ءبىز بۇگىن ىسكە قوسىپ وتىرعان كەشەن ورالداعى وڭدەلەتىن قالدىق كولەمىن 23 پايىزعا جەتكىزۋى ءتيىس. اۋەلگى جوسپارىمىزدا ءبىز بۇل جەردەن بيوگاز ءوندىرۋدى دە كوزدەگەن ەدىك. بىراق مۇندا ءورتتىڭ ءجيى بولۋى گاز وندىرۋگە مۇمكىندىك بەرمەي وتىر. سوندىقتان كەشەندە سۇرىپتالعان قالدىقتىڭ جارامسىز بولىگىن ارنايى جەرگە جيناپ, الداعى 3-4 جىلدان باستاپ بيوگاز وندىرە باستايمىز, - دەيدى وسى جوبانىڭ قۇرىلتايشىسى كالۆەر كاپپەر.
ەندى قالا بيلىگىنىڭ الدىندا تۇرعىنداردى تۇرمىستىق قالدىقتى سۇرىپتاپ جيناۋعا ۇيرەتۋ ماسەلەسى تۇر. كوپ كەشىكپەي ورال كوشەلەرىندە ارنايى قوقىستى سۇرىپتاپ سالاتىن ءتۇرلى جاشىكتەر پايدا بولماق. سونداي-اق بالاباقشالار مەن مەكتەپتەردەن باستاپ قوقىستى ساۋاتتى سۇرىپتاۋ باعىتىندا ارنايى ساباق جۇرگىزۋ جوسپارلانعان.
ءوڭىر باسشىسى بولاشاقتا وسىنداي كەشەندەردى اۋدان ورتالىقتارىندا دا اشۋ جوسپارى بار ەكەنىن ايتادى. «بولاشاقتا كۇل-قوقىستى كادەگە جاراتىپ, قاجەتتى زاتتار شىعارۋعا, سونداي-اق بيوگاز وندىرەتىن جاعدايعا دا قول جەتكىزەتىن بولامىز» دەيدى التاي كولگىنوۆ.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان