8 ناۋرىز قارساڭىندا Sa Belle ءسان ءۇيىنىڭ نەگىزىن قالاۋشى بەللا ءسات-مىرزا كومەككە مۇقتاج جاندارعا مەرەكە سىيلاۋدى ۇيعاردى دەپ حابارلايدى ەلوردا اكىمدىگىنىڭ رەسمي سايتى.
بەللا ءسات-مىرزا قيىن جاعدايعا تاپ بولعان ايەلدەرگە, سونىڭ ىشىندە كوپ بالالى انالارعا, جالعىز باستى انالارعا, اۋىر دەرتكە شالدىققان ايەلدەرگە, مۇمكىندىگى شەكتەۋلى جاندارعا ءوزىنىڭ ءسان ءۇيىنىڭ توپتاماسىنان 50 كويلەكتى سىيلاۋدى ءجون كوردى.
«بۇل اكتسيانىڭ ماقساتى – كۇنىن تەك جاردەماقىمەن كورىپ وتىرعان ايەلدەردى, بالالارىمەن بىرگە كىشكەنتاي بولمەلەردى جالداپ تۇراتىن ايەلدەردى, بالالارىن جالعىز ءوزى تاربيەلەپ وتىرعان ايەلدەردى نەمەسە ءوز ءومىرىن ۇزارتۋ ءۇشىن تاپقان قاراجاتىن ءدارى-دارمەككە جۇمسايتىن ايەلدەردى قولداۋ. 8 ناۋرىز مەرەكەسى قارساڭىندا مەنىڭ ولارعا كوڭىل-كۇي, قۋانىش سىيلاعىم كەلەدى. مەن وليگارح بولماسام دا, ءوزىمنىڭ قول ۇشىمدى بەرگىم كەلەدى», – دەيدى بەللا ءسات-مىرزا. ءوزىنىڭ قايىرىمدىلىق باستاماسى تۋرالى ديزاينەر الەۋمەتتىك جەلى ارقىلى حابارلاعان. ناۋقان تۋرالى اقپارات تۇرعىندار اراسىندا قاس قاعىم ساتتە تارالىپ كەتتى. اكتسيا جاريالانعاننان ءبىر كۇن وتكەن سوڭ, وعان 25 ومىرلىك جاعداي تۋرالى اقپارات تۇسسە, قازىر وتىنىمدەردىڭ سانى جۇزدەن اسىپ جىعىلادى.
«ماعان پاۆلودار, ورال, شىمكەنت, قىزىلوردا قالالارىنىڭ تۇرعىندارى حابارلاسىپ جاتىر. مەن ۇمىتكەرلەردى مۇقيات تاڭدايمىن. ولاردىڭ بەرگەن اقپاراتىنىڭ راستىعىن تەكسەرەمىن, ولاردان قۇجاتتارىن كورسەتۋدى تالاپ ەتەمىن», – دەيدى ديزاينەر. ءسات-مىرزا ايەلدەرگە مەرەكەلىك شاراعا دا, كۇندەلىكتى كيىم رەتىندە دە كيۋگە كەلەتىن كويلەكتەردى سىيلايتىنىن ايتتى. ديزاينەر سىيلىعىن ءوزى تابىس ەتپەك نيەتتە: «مەرەكە قارساڭىندا بارلىق نازىك جاندىلاردى ءبىر جەردە جيناپ, ولاردى قۇتتىقتاعىم كەلەدى, گۇل شوقتارىن سىيلاعىم كەلەدى. شىنىمدى ايتسام, اتالمىش ناۋقاندى جارنامالاۋدى قالامادىم. ماعان پياردىڭ ەش قاجەتى جوق. الايدا جالعىزدىڭ ءۇنى شىقپاس دەمەكشى, مەنىڭ باستامامدى ءدامحانا, گۇل دۇكەندەرىنىڭ يەلەرى, ۆيزاجيستەر, باسقا دا ازاماتتار قولداسا ەكەن دەيمىن»,– دەدى ول.
ديزاينەر بەللا ءسات-مىرزا 2015 جىلدان باستاپ مۇمكىندىگى شەكتەۋلى جاندارعا ارنالعان كيىمدەردى تىگۋمەن اينالىسادى.