جۇمىس ىستەيتىن ايەل مەملەكەتتىك الەۋمەتتىك ساقتاندىرۋ قورىنان جۇكتىلىك جانە بالا تۋ بويىنشا بەرىلەتىن الەۋمەتتىك تولەماقىنى تاعايىنداۋعا جۇگىنە الادى. تولەماقى كولەمى ايەلدىڭ سوڭعى 12 ايدا الەۋمەتتىك تولەمدەر جاسالاتىن ورتاشا ايلىق تابىسىنا قاتىستى بولادى. وتكەن جىلدىڭ قورتىندىسى بويىنشا بۇل تولەماقىنىڭ كولەمى 391 170 تەڭگەنى قۇراعان. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى حابارلادى.
بالا تۋعاننان كەيىن ول جاردەماقىنى تاعايىنداۋعا ءوتىنىشى بىلدىرە الادى. بالا تۋعاندا بەرىلەتىن بىررەتىك مەملەكەتتىك جاردەماقى بيۋدجەتتەن بولىنەدى, ونىڭ كولەمى: ءبىرىنشى بالاعا, ەكىنشى بالاعا, ءۇشىنشى بالاعا - 95 950 تەڭگە, ءتورتىنشى جانە ودان كوپ بالاعا –159 075 تەڭگە.
2018 جىلى وسىنداي جاردەماقىنى 395 مىڭ ادام العان. سوڭعى 3 جىلدا بۇل جاردەماقىنىڭ كولەمى 38%-عا ءوستى. 2019 جىلى وسى جاردەماقىنى تولەۋگە 42 ملرد تەڭگە ءبولىندى. مەملەكەتتىك الەۋمەتتىك ساقتاندىرۋ قورىنان 1 جاسقا دەيىن بالا كۇتىمى بويىنشا بەرىلەتىن تولەماقى 40% كولەمىندە سوڭعى ەكى جىلداعى ورتاشا تابىسىنا قاراي تاعايىندالادى. بۇل تولەمنىڭ ورتاشا كولەمى 2018 جىلى ايىنا 32 361 تەڭگەنى قۇراعان.
2018 جىلى مەملەكەتتىك الەۋمەتتىك ساقتاندىرۋ قورىنان بارلىعى 400 مىڭ اتا-انا 165 ملدر تەڭگە كولەمىندە انا مەن بالا الەۋمەتتىك تولەماقىسىن العان. سونىمەن قاتار, جۇمىس ىستەيتىن ايەلدەرگە 1 جاسقا دەيىن بالا كۇتىمىمەن وتىرعان كەزىندە مەملەكەتپەن مىندەتتى زەينەتاقى جارناسى سۋبسيديالانادى. 2019 جىلى سۋبسيديالاندىرۋعا 5,8 ملرد تەڭگە بولىنگەن.