قازاقستان ۇلتتىق وليمپيادالىق كوميتەتىنىڭ باس حاتشىسى ساكەن مۇسايبەكوۆ كاراتەدەن بىرىككەن اراب امىرلىكتەرىندە وكەن پرەمەر-ليگا ءتۋرنيرىنىڭ اياسىندا بۇكىلالەمدىك كاراتە فەدەراتسياسىنىڭ (WKF) پرەزيدەنتى انتونيو ەسپينوز جانە ۇيىمنىڭ ۆيتسە-پرەزيدەنتى ناسسەر ءال رازۋكيمەن كەزدەستى دەپ حابارلايدى Olympic.kz.
كەزدەسۋ بارىسىندا قوس تاراپ كاراتەنىڭ دامۋ قارقىنىن جانە 2020 جىلعى توكيوداعى وليمپيادا ويىندارىنا دايىندىق بارىسىن تالقىلادى. بۇكىلالەمدىك فەدەراتسيا باسشىسى قازاقستاندىق تاراپپەن ارىپتەستىكتى ءارى قاراي دامىتۋعا مۇددەلى ەكەنىن ايتا كەلە, ەلىمىزدە وتەتىن Kazakhstan Open 2019 ءتۋرنيرىن تاماشالاۋعا, سونداي-اق, قازاقستان ۇوك جانە قازاقستان كاراتە فەدەراتسياسىمەن جاقىنىراق تانىسۋعا ۋادە بەردى. انتونيو ەسپينوز مىرزا ءىرى حالىقارالىق جارىستاردا جوعارى ناتيجە كورسەتىپ جۇرگەن قازاقستاندىق كاراتەشىلەردىڭ الەۋەتىن جوعارى باعالادى.
ايتا كەتەلىك, بىلتىر مادريدتە وتكەن بۇكىلالەمدىك كونگرەستە قازاقستان ۇلتتىق كومانداسىنىڭ باس باپكەرى جاستالاپ ساناۋوۆ بۇكىلالەمدىك كاراتە فەدەراتسياسى اتقارۋشى كوميتەتىنىڭ مۇشەسى بولىپ سايلاندى. قازاقستاندىق باپكەر بۇكىلالەمدىك كاراتە فەدەراتسياسىنا سايلانعان تمد-نىڭ العاشقى وكىلى بولىپ سانالادى.
ءباا حالىقارالىق تۋرنيردە قازاقستاندىق سپورتشىلاردىڭ كورسەتكەن ناتيجەلەرىمەن مىنا جەردەن تانىسۋعا بولادى.