جاستارعا جاقسىلىق جاۋعان جىل

ۋنيۆەرسيتەتتىڭ ءبىرىنشى كۋرس ستۋدەنتى ۆالەنتينا ششادرينا كوپبالالى وتباسىنان. بارلىعى جەتەۋ. فيلولوگيا بولىمىندە وقيتىن ستۋدەنتتىڭ جاقسىلىققا جانى قۇمار. نيەتىنە وراي بولاشاق پەداگوگ مەملەكەتتىك گرانت ارقىلى ءبىلىم الۋدا. بۇل قامقورلىق جالعىز ءوزىن عانا ەمەس, وتباسىن دا قۋانتىپ وتىر.      

– بۇل گرانت بولماعاندا وقۋ اقىسىن تولەي المايتىن ەدىك. جاستارعا جاسالىپ وتىرعان قامقورلىق ءۇشىن ەلباسىنا العىسىم شەكسىز. سەنىم ارتىلعان سوڭ تەرەڭ ءبىلىم الۋعا ۇمتىلاتىن بولامىن,–دەيدى ش. ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ ستۋدەنتى ۆالەنتينا شادرينا.       

ۆالەنتينا ششادرينا مەملەكەت تاراپىنان قولعا الىنعان باعدارلامالاردىڭ يگىلىگىن كورگەندەردىڭ ءبىر پاراسى عانا. وقۋ گرانتتارىن ءبولىپ, ستارتاپ جوبالاردى قارجىلاندىرۋ ءتۇرلى ماماندىق يگەرۋشى ءبىلىمپاز جاستار ءۇشىن تاپتىرماس مۇمكىندىك. ال, سۇرانىسقا يە ءارى باسەكەگە قابىلەتتى ۇرپاق ەل يگىلىگىنە قىزمەت ەتەدى.   

– ۋنيۆەرسيەتتە قازىرگى كۇنى 2 جارىم مىڭنان استام ستۋدەنت گرانت ارقىلى تەگىن ءبىلىم الادى. ونىڭ 224 – ءى اقمولا وبلىسى اكىمى گرانتىنىڭ يەگەرلەرى. گران يەگەرلەرىنىڭ سانى دا جىل ساناپ ارتۋدا. پەداگوگيكالىق جانە مەديتسينالىق ماماندىقتارعا باسىمدىق بەرىلەدى. بۇدان بولەك, وبلىس اكىمى مەن اۋدان اكىمدەرىنىڭ اتاۋلى شاكىرتاقىلارى بار. الداعى جىلى قوسىمشا گرانتتار بولىنەدى دەگەن ۇمىتتەمىز. وڭىردە پسيحولوگيا, ەكولوگيا جانە تۋريزم سالالارىندا ماماندار تاپشى. مەملەكەتتىك قولداۋدىڭ ارقاسىندا بۇل ماسەلەلەردى شەشۋگە بولادى,–دەيدى ش. ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ رەكتورى مارات سىرلىباەۆ.

جاستار جىلىنا وراي قاشىقتىقتان وقىتۋدى دامىتۋعا ارنالعان 50 - دەن استام ەرەكشە وقۋ باعدارلامالارى جۇيەلى جۇزەگە اسۋ ۇستىندە.  الداعى جىلى قاشىقتىقتان وقىتۋ تەحنولوگيالارىن قولداناتىن ءبولىم اشۋ جوسپارلانىپ وتىر. بەينە-ونلاين وقۋ كۋرستارى ازىرلەنۋ ۇستىندە. عىلىمعا دا ءجىتى كوڭىل بولىنەدى. وسىمەن ءۇشىنشى جىل وقۋ ورداسىندا ستارتاپتاردى قولداۋعا 10 ميلليونعا جۋىق قاراجات قاراستىرىلىپ كەلەدى.

بايقال ءبايادىل,

«ەگەمەن قازاقستان»

اقمولا وبلىسى