اقمولا وبلىسىنىڭ وڭىرلىك كوممۋنيكاتسيالار قىزمەتىندە كوپبالالى جانە تۇرمىسى تومەن وتباسىلارعا مەملەكەتتىك كومەك كورسەتۋ تاقىرىبىندا ءباسپاسوز ءماسليحاتى بولىپ ءوتتى. بريفينگكە وبلىستىق جۇمىسپەن قامتۋ ءجان الەۋمەتتىك باعدارلامالاردى ۇيلەستىرۋ باسقارماسىنىڭ باسشىسى دينا احمەتجانوۆا, وبلىستىق ەڭبەك, الەۋمەتتىك قورعاۋ جانە كوشى قون دەپارتامەنتى ديرەكتورىنىڭ ورىنباسارى نازيپا سالىنگەرەەۆا, وبلىستىق ءبىلىم باسقارماسىنىڭ ءبولىم باسشىسى اسەمگۇل سۇلەيمەنوۆا قاتىسىپ, جۋرناليستەردىڭ سۇراقتارىنا جاۋاپ بەردى.
اقمولا وبلىستىق ءبىلىم باسقارماسىنىڭ ءبولىم جەتەكشىسى اسەمگۇل سۇلەيمەنوۆانىڭ ايتۋىنشا وبلىسىندا 555 مەكتەپتىڭ 479-ى ىستىق تاماقپەن قامتاماسىز ەتىلدى. قاڭتار ايىنداعى كورسەتكىشكە سۇيەنسەك, وبلىس بويىنشا 120 مىڭ بالا ءبىلىم الۋدا. ونىڭ 116 مىڭى ىستىق تاماقپەن قامتىلعان. جەرگىلىكتى اتقارۋشى ورگاندار الەۋمەتتىك جاعىنان قورعالماعان وتباسىلاردان شىققان بالالاردى تەگىن تاماقپەن ءجۇز پايىز قامتاماسىز ەتەدى. وبلىس بويىنشا 12745 بالا تەگىن تاماقتانادى.
جيىن بارىسىندا جۋرناليستەر تاراپىنان كوپبالالى جانە الەۋمەتتىك ءالجۋاز وتباسىلار ءۇشىن 2019 جىلعى وزگەرىستەر تۋرالى سۇراقتار قويىلدى. اقمولا وبلىسىندا وسى ماقساتتا ارنايى جۇمىس توپتارى قۇرىلۋدا, وعان پارتيا وكىلدەرى, دەپۋتاتتار, كاسىپكەرلەر كىرەدى. ولار الەۋمەتتىك جاعىنان ءالجۋاز وتباسىلار بويىنشا بارلىق اقپاراتتى جيناپ, تالدايدى. مىسالى, تۇرعىن ءۇي, بالالاردى بالاباقشاعا ورنالاستىرۋ, جەڭىلدىكتەرمەن, جۇمىسپەن قامتاماسىز ەتۋ ماسەلەلەرى. تالداۋ قورىتىندىسى بويىنشا ءاربىر وتباسىنا الەۋمەتتىك كارتا ازىرلەنەدى. بۇل الەۋمەتتىك جاعدايى قيىن وتباسىلاردى قولداۋعا كومەكتەسەدى.
جيىندا وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ جەتەكشىسى دينا احمەتجانوۆا ءسوز سويلەپ, كوپتىڭ كوكەيىندە جۇرگەن كوكەيتەستى ماسەلەلەردى ورتاعا سالدى. – ءبىز از قامتىلعان جانە كوپبالالى وتباسىلارعا تەكسەرۋ جۇرگىزەمىز, بۇل ىسپەن 124 اسسيستەنت جانە 21 كەڭەسشى اينالىسادى. اۋىلدىق وكرۋگتەردە الەۋمەتتىك كارتا بار. اۋىلدىق وكرۋگ اكىمدەرى كارتانى ادام سانىنا بايلانىستى تولتىرادى. ورىن العان سوڭعى وقيعالاردان كەيىن ءبىز قايتادان زەرتتەۋ جۇرگىزەمىز. كىم تۇرعىن ۇيگە مۇقتاج, بالا باقشاسىنا ورنالاستىرۋ, كىمگە الەۋمەتتىك تۇرعىدا باسقا دا كومەكتەر كەرەكتىگىن انىقتايمىز. وتباسىلارعا كومەك قولىن سوزعىسى كەلەتىن دەمەۋشىلەردى دە ىزدەيتىن بولامىز. مۇنداي پارامەترلەر الەۋمەتتىك كارتادا بەلگىلەنگەن.
بۇگىنگى كۇنى اقمولا وبلىسىندا 5306 كوپ بالالى وتباسى, 12 مىڭ از قامتىلعان وتباسى تۇرادى. ايتا كەتۋ كەرەك, بيىلعى جىلى ەكى اۋداندا – استراحان جانە جاقسى اۋداندارىندا – پيلوتتىق رەجيمدە اتاۋلى الەۋمەتتىك كومەك باسقاشا كورسەتىلەدى. دالىرەك ايتساق, كومەك جەكە قوسالقى شارۋاشىلىقتان تۇسكەن تابىس ەسەبىنسىز جاسالاتىن بولادى. دەمەك, الەۋمەتتىك جاردەم الۋشىلار, اسىرەسە, اۋىلداردا الدەقايدا كوپ بولادى.
سپيكەرلەر ەڭبەك جانە حالىقتى الەۋمەتتىك قورعاۋ مينيسترلىگىنە از قامتىلعان جانە كوپ بالالى وتباسىلاردىڭ ءومىر ءسۇرۋ ساپاسىن جاقسارتۋ بويىنشا ۇسىنىستار جولدانعاندىعىن تىلگە تيەك ەتتى. اقمولا وبلىستىق ەڭبەك, الەۋمەتتىك قورعاۋ جانە كوشى-قون دەپارتامەنتى جەتەكشىسىنىڭ ورىنباسارى ءنازيپا سالىمگەرەەۆانىڭ ايتۋىنشا, 2019 جىلدىڭ قاڭتار ايىنداعى كورسەتكىش بويىنشا 5 306 كوپ بالالى وتباسىعا اي سايىن 10504 تەڭگە كولەمىندە جاردەماقى تولەنەدى. سونداي-اق, بىزدە كوپ بالالى انالار ساناتى بار, جىل باسىنداعى ەسەپ بويىنشا ولاردىڭ سانى 7 مىڭعا جۋىق, جاردەماقى مولشەرى 16 160 تەڭگەنى قۇرايدى.
بايقال ءبايادىل,
«ەگەمەن قازاقستان»
اقمولا وبلىسى