الماتىدا شورت-ترەكتەن الەم كۋبوگىنىڭ كەزەڭدىك سايىسى باستالادى

قازىرگى كەزدە دايىندىق جۇمىستارى قىزۋ جۇرگىزىلۋدە. حالىقارالىق  كونكيشىلەر وداعى (ISU) ماماندارى «حالىق ارەنا» سپورت كەشەنى زاماناۋي تالاپتارىنا ساي ەكەنىن ايتا كەلە, بۇل جەردە اسا جوعارى دەڭگەيدەگى جارىستاردى وتكىزۋگە بولاتىنىن اتاپ ءوتتى. ءۇش كۇنگە سوزىلاتىن وسى باسەكەلەر بارىسىندا الەمنىڭ 19 مەملەكەتىنەن كەلگەن 151 سپورتشى باق سىنايدى. ولاردىڭ قاتارىندا وليمپيا ويىندارى مەن الەم چەمپيوناتتارىندا اتوي سالعان ساڭلاقتار دا بار.

الەم كۋبوگىنىڭ العاشقى كەزەڭى 2-4 قاراشا ارالىعىندا كانادانىڭ كالگاري قالاسىندا وتكەن ەدى. سول جارىستا ءبىزدىڭ ابزال اجىعاليەۆ 500 مەترلىك قاشىقتىقتا 40.136 سەكۋندتىق كورسەتكىشپەن كۇمىس مەدالدى موينىنا ءىلدى. جەرلەسىمىز تەك وليمپيادا چەمپيونى دەگەن دارداي اتاعى بار قىتايلىق ۆۋ دايتسزيننەن (ۋاقىتى – 39.915) عانا قالىپ قويدى. ءۇشىنشى ورىندى 1 000 مەترلىك قاشىقتىقتا وليمپيا ويىندارىنىڭ جەڭىمپازى اتانعان ۆەنگريالىق ليۋ شاولين شاندور (40.194) ەنشىلەدى. ال 1 000 مەترلىك قاشىقتىقتا ءبىزدىڭ ەركەبۋلان شامۋحانوۆ بەسىنشى ورىنعا جايعاستى. سول سەكىلدى قىزدار قۇراماسى ەستافەتالىق سايىستى بەسىنشى ورىنمەن قورىتىندىلادى.

9-11 قاراشا ارالىعىندا اقش-تىڭ سولت-لەيك-سيتي قالاسىندا وتكەن الەم كۋبوگىنىڭ ەكىنشى كەزەڭىندە قازاقستاندىق سپورتشىلار اراسىنان دەنيس نيكيشا ەڭ ۇزدىك كورسەتىشكە قول جەتكىزدى. ول 500 مەترلىك قاشىقتىقتا 40.047 سەكۋندتىق كورسەتكىشپەن ءتورتىنشى ورىنعا تابان تىرەدى. بۇل جارىستا باس جۇلدەنى ولجالاعان ۆۋ دايتسزين الەمدىك رەكوردتى جاڭارتتى. ونىڭ كورسەتكىشى –39.505 سەكۋند. قىزدار سايىسىندا قازاقستان قۇراما كومانداسى مۇشەلەرى اراسىنان كيم يونگ ا ەڭ جاقسى ناتيجە كورسەتتى. ول 1 000 مەترلىك قاشىقتىقتا سەگىزىنشى ساتىعا تۇراقتادى.

الەم كۋبوگىنىڭ ءۇشىنشى كەزەڭ الماتى وتكەلى وتىر. ءسوز ورايى كەلگەندە, شورت-ترەكتەن وسىنداي ءدۇبىرلى دودانىڭ الاتاۋ باۋرايىندا تۇڭعىش رەت ۇيىمداستىرىلعالى وتىرعانىن دا ەستەرىڭىزگە سالا كەتەيىك. ولاي بولسا, 7-9 جەلتوقسان ارالىعىندا بارلىعىمىز «حالىق ارەنا» سپورت كەشەنىندە باس قوسىپ, ءوز سپورتشىلارىمىزعا قولداۋ كورسەتەيىك! ال جارىستىڭ اشىلۋ سالتاناتى 8 جەلتوقساندا وتەدى.

الەم كۋبوگىنىڭ ءتورتىنشى كەزەڭى كەلەسى جىلدىڭ 1-3 اقپان ارالىعىندا گەرمانيانىڭ درەزدەن شاھارىندا وتسە, بەسىنشى كەزەڭدىك سايىستى 8-10 اقپان ارالىعىندا يتاليانىڭ تۋرين قالاسى قابىلدايدى.   

عالىم سۇلەيمەن,

«ەگەمەن قازاقستان»

الماتى