سەنات دەپۋتاتى, قازاقستان رەسپۋبليكاسىنداعى بالا قۇقىقتارى جونىندەگى ۋاكىل ساۋلە ايتپاەۆا بالالاردىڭ قۇقىقتارى مەن زاڭدى مۇددەلەرىن قورعاۋ ماسەلەلەرى بويىنشا اتىراۋ, ماڭعىستاۋ, قىزىلوردا جانە اقمولا وبلىستارىنداعى شاعىم بەرۋشىلەردى بەينەبايلانىس ارقىلى قابىلدادى, دەپ حابارلايدى پارلامەنت سەناتىنىڭ ءباسپاسوز قىزمەتى.
شاراعا ءبىلىم جانە عىلىم, ەڭبەك جانە الەۋمەتتىك قورعاۋ, ىشكى ىستەر, قوعامدىق دامۋ جانە دەنساۋلىق ساقتاۋ مينيسترلىكتەرىنىڭ, سونداي-اق جەرگىلىكتى اتقارۋشى ورگاندار مەن ۇكىمەتتىك ەمەس ۇيىمداردىڭ وكىلدەرى قاتىستى.
بالا قۇقىقتارى جونىندەگى ۋاكىل ازاماتتاردان كەلىپ تۇسكەن جيىرمادان استام ءوتىنىشتى قارادى. اتاپ ايتقاندا, لايىقتى ءبىلىم الۋ, اتا-انانىڭ قاراۋىنسىز قالعان بالالاردى قامقورلىققا الۋ جانە ولارعا قورعانىشى بولۋ, دەنساۋلىقتى قورعاۋ, بالالار ءۇيىنىڭ تۇلەكتەرىن تۇرعىن ۇيمەن قامتاماسىز ەتۋ, اتا-انالارى اجىراسقان كەزدە بالالاردىڭ تۇراتىن ورنىن انىقتاۋ جانە اتا-انالارىمەن ارالاسۋ ءتارتىبى جانە تاعى باسقا ماسەلەلەر كوتەرىلدى.
بارلىق وتىنىشتەر بويىنشا وڭ شەشىم قابىلداندى. سونىمەن قاتار, قىزىلوردا جانە ماڭعىستاۋ وبلىستارىنىڭ اكىمدىكتەرىنە قاجەتتى زاڭ, وڭالتۋ جانە گۋمانيتارلىق كومەك كورسەتۋ ماسەلەلەرى بويىنشا ءۇش بىردەي ارىزدانۋشىعا كومەك كورسەتۋ ۇسىنىلدى.
بەينەبايلانىس بارىسىندا س.ايتپاەۆا تۇرعىندار اراسىندا ءتيىستى اقپاراتتىق-تۇسىندىرمە جۇمىسىن وتكىزۋ, بالالاردىڭ قۇقىقتارىن قورعاۋ مەن وتباسىلىق ماسەلەلەردىڭ اشىقتىعى مەن ايقىندىعىن قامتاماسىز ەتۋ جانە مەديتسينالىق كومەك كورسەتۋ قاجەتتىلىگىنە جەرگىلىكتى اتقارۋشى ورگانداردىڭ نازارىن اۋداردى.