5 جەلتوقساندا انكارادا قازاقستان رەسپۋبليكاسىنىڭ تۇڭعىش پرەزيدەنتى كۇنىنە وراي «نۇرسۇلتان نازارباەۆ: ۇلى دالانىڭ رۋحاني جاڭعىرۋى» اتتى كونفەرەنتسيا ءوتتى. ءىس-شارا قازاقستاننىڭ تۇركياداعى ەلشىلىگى مەن تۇركيانىڭ العاشقى پرەزيدەنتى م.ك. اتاتۇرىك قۇرعان, وسى ەلدىڭ ەڭ بەدەلدى قۇرىلىمدارىنىڭ ءبىرى سانالاتىن تۇرىك تاريح ۇيىمىنىڭ باستاماسىمەن جانە تۇركيا رەسپۋبليكاسى پرەزيدەنت اكىمشىلىگىنىڭ قولداۋىمەن ۇيىمداستىرىلدى.
جيىنعا ەلشى ابزال ساپاربەك ۇلى, تۇركيا رەسپۋبليكاسى پرەزيدەنتىنىڭ باس كەڭەسشىسى يالچىن توپچۋ, تۇرىك تاريح ۇيىمىنىڭ باسشىسى رەفيك تۋران, سونداي-اق تۇركيانىڭ باسقا دا ىقپالدى ساياسي تۇلعالارى, تانىمال عالىمدارى مەن جوعارعى وقۋ ورىندارىنىڭ ۇستازدارى جانە بىلىمگەرلەرى قاتىستى.
جيىندى اشقان تۇرىك تاريح ۇيىمىنىڭ باسشىسى ر. تۋران تۇركى الەمىنىڭ قازاقستاننىڭ ەۋرازياداعى بەلسەندىلىگى مەن ىقپالىنىڭ ارتۋىنا ءسۇيسىنىپ وتىرعانىن ايتتى. ول, سونداي-اق, نۇرسۇلتان نازارباەۆتىڭ ۇلت مۇددەسى ءۇشىن قاجەتتى ماقساتتاردى جۇزەگە اسىرعان, حالىققا جول اشقان جانە كەلەشەكتىڭ كەلبەتىن ايقىنداعان كوشباسشى ەكەندىگى تۋرالى پىكىرىن ءبىلدىردى.
ءوز كەزەگىندە, ەلشى ا. ساپاربەك ۇلى ەلباسىنىڭ قازاقستان عانا ەمەس, ورتالىق ازيا جانە كۇللى تۇركى الەمىنىڭ باياندى بولاشاعى ءۇشىن ايانباي ەڭبەك ەتىپ كەلە جاتقانىن ايتىپ, مەملەكەت باسشىسىنىڭ تۇركى كەڭەسىن قۇرۋ, تۇركيا مەن رەسەي اراسىنداعى ۇشاق داعدارىسىن وڭعارۋ جانە سيريا ماسەلەسىن شەشۋگە باعىتتالعان استانا پروتسەسىن ۇيىمداستىرۋ سياقتى باستامالارىنا توقتالدى.
تۇركيا پارلامەنتىنىڭ دەپۋتاتى, تۇركيا-قازاقستان دوستىق توبىنىڭ باسشىسى مەحمەت الي جەۆحەري ۇلى ويشىل, بۇكىل تۇركى جۇرتىنا يماندىلىق نۇرىن شاشقان اعارتۋشى احمەت ياساۋي ءىلىمى جونىندە ءسوز قوزعادى. ول ياساۋي بابامىزبەن قازاقستاندى الەمگە تانىتىپ, باسقا ەلدەرمەن ىنتىماقتاستىق ورناتۋ ارقىلى زاماناۋي مەملەكەت قۇرعان جانە تۇركى الەمىنىڭ اقساقالى اتانعان ن. نازارباەۆتىڭ اراسىنداعى رۋحاني ساباقتاستىققا نازار اۋداردى.
جيىنعا ارنايى قاتىسقان تۇركيا رەسپۋبليكاسى پرەزيدەنتىنىڭ باس كەڭەسشىسى يا. توپچۋ نۇرسۇلتان نازارباەۆتىڭ ستراتەگيالىق ساياساتى مەن كورەگەندىگىن اتاپ ءوتىپ, «تۇعىرلى مەملەكەتتىڭ قۇرۋشىسى, پاراساتتى, كەمەڭگەر كوشباسشى رەتىندە تانىلعان ن. نازارباەۆ تۇركى-يسلام الەمىنىڭ اقساقالى جانە قازاق باۋىرلارىمىزدىڭ عانا ەمەس, بۇكىل تۇركى الەمىنىڭ ماقتانىشى» - دەگەن پىكىرىمەن ءبولىستى.
جيىن سەيفەتتين ەرول, حاسان ءۇنال جانە كۇرشات زورلۋ سياقتى تۇركيانىڭ تانىمال عالىمدارى جانە تالداۋ ورتالىقتارىنىڭ باسشىلارى جاساعان باياندامالارمەن جالعاستى. باياندامالاردىڭ نەگىزگى ارقاۋىن ەلباسىنىڭ جۋىردا جاريالانعان ۇلى دالانىڭ جەتى قىرى اتتى باعدارلامالىق ماقالاسىنىڭ ءارتۇرلى تۇستارى قۇرادى. بايانداماشىلار قازاق پرەزيدەنتىنىڭ « ۇلى دالانىڭ جەتى قىرى» اتتى اۋقىمدى ماقالاسىن جاريالاۋ ارقىلى قازاقستاننىڭ رۋحاني جاڭعىرۋىنا عانا ەمەس, تۇركى الەمىنىڭ بىرىگۋىنە باعدار بەرەتىن تاعى ءبىر ماڭىزدى قادام جاساعىنىن تىلگە تيەك ەتتى. ساراپشىلاردىڭ پىكىرىنشە, ءوزىنىڭ باعدارلامالىق ماقالاسىندا ن. نازارباەۆ قازاقستاننىڭ تۇركىلىك تابيعاتىن ايقىندايتىن ماڭىزدى تۇجىرىمدار جاساپ, قازاق ەلىنىڭ تۇركى الەمىمەن بايلانىستارىن بەكىتە تۇسەتىن پراكتيكالىق قادامداردى ۇتىمدى ۇسىنعان.
سونىمەن قاتار, كونفەرەنتسيا اياسىندا قازاقستان رەسپۋبليكاسىنىڭ تۇركياداعى ەلشىلىگى جانە قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ قولداۋىمەن قازاق جانە تۇرىك تىلىندە جارىق كورگەن «نۇرسۇلتان نازارباەۆ: ۇلى دالانىڭ رۋحاني جاڭعىرۋى» اتتى كىتاپتىڭ تۇساۋكەسەرى ءوتتى. كىتاپقا ەلباسىنىڭ « ۇلى دالانىڭ جەتى قىرى» جانە «بولاشاققا باعدار: رۋحاني جاڭعىرۋ» اتتى قازاق جانە تۇرىك تىلدەرىندەگى ماقالالار ەنگەن. جيناققا, سونداي-اق, س. ەرول, ك. زورلۋ, ح. ۋنال, د. امەتبەك, ف. پۋرتاش, م. يىلدىز, ن. شيمشەك, يا. ومەروعلۋ, ي. اتابەي, ە. چاعلار, ج. كىناجى, س. يىلماز سياقتى ايتۋلى ساراپشىلاردىڭ قازاقستاننىڭ دامۋ جولى, قازاق-تۇرىك قارىم-قاتىناستارى, تۇركى الەمىندەگى جاقىنداسۋ مەن ەلباسىنىڭ كورەگەن كوشباسشىلىعى تۋرالى ماقالالارى جيناقتالعان.
كونفەرەنتسيا قازاقستان رەسپۋبليكاسىنىڭ تۇڭعىش پرەزيدەنتى كۇنىنە وراي ەلشىلىك ۇيىمداستىرعان رەسمي قابىلداۋمەن جالعاستى.