باتىس قازاقستانداعى جالپاقتال اۋىلىندا جاڭا ۇيلەر تاپسىرىلدى

اۋىل تۇرعىندارىنىڭ وسى قۋانىشىنا باتىس قازاقستان وبلىسىنىڭ اكىمى التاي كولگىنوۆ ورتاقتاستى.

- بۇگىنگى تاپسىرىلىپ وتىرعان جاڭا ءۇي – باتىس قازاقستان وبلىسىنىڭ اۋداندارىندا بيىل «نۇرلى جول» باعدارلاماسى بويىنشا بوي كوتەرگەن 104 ءۇيدىڭ ءبىرى. ال وبلىس بويىنشا جاڭادان 3500 پاتەر سالىنىپ جاتىر. ءبىز جاقىندا تۇڭعىش پرەزيدەنت مەرەكەسىنە وراي ورال قالاسىندا 120 پاتەرلىك ءۇيدى بەرگەن بولاتىنبىز. جاقىن ۋاقىتتا تاعى توعىز قاباتتى ەكى ءۇي پايدالانۋعا بەرىلەدى. ءدال وسى جالپاقتالدى ايتاتىن بولساق, 3-4 جىل بۇرىن مۇندا جول جوق ەدى, اۋدان ورتالىعىندا ورتالىقتاندىرىلعان سۋ جوق ەدى. قازىر ەكەۋى دە كەلدى. اۋىل ىشىندە بيىل سىرىم دات ۇلى, ءماساليموۆ كوشەلەرى جوندەلدى. بالاباقشا كۇردەلى جوندەلىپ, سۋ جاڭا كەيىپكە ەندى. مۇنىڭ ءبارى – مەملەكەتتىڭ كومەگى, تۇرعىندارعا دەگەن قامقورلىعى. بۇل الدىن الا جوسپارلانعان, جۇيەلى, ۇلكەن جۇمىس, - دەدى ءوز سوزىندە التاي كولگىنوۆ.

ءوڭىر باسشىسى كەلەسى اپتادا ورال قالاسىن رەسەيدىڭ ساراتوۆ قالاسى باعىتىنا شىعاتىن شەكاراعا دەيىنگى 104 شاقىرىمدىق جول قۇرىلىسى اياقتالاتىنىن, الداعى ۋاقىتتا سامارا مەن ورىنبور باعىتىنداعى اۆتوكولىك جولدارى دا كۇردەلى جوندەلەتىنىن حابارلادى. ال ءوڭىردىڭ وڭتۇستىك اۋداندارى تۇرعىندارى زارىعا كۇتىپ وتىرعان بوكەي ورداسى مەن جانىبەك جولى جاز شىعا باستالادى. كەلەر جىلى قازتالوۆقا جول جەتەدى, ودان ءارى جانىبەك, حان ورداسى, سايحىن اۋىلدارىنا جول تارتىلادى.

- جول سالىنعان سوڭ بۇل اۋدانداردىڭ ەكىنشى تىنىسى اشىلادى, اعايىنداردىڭ ءبىر-بىرىمەن ارالاسۋى ارتادى. الدا تۇرعان جوسپار كوپ. بيىل وسى قازتالوۆ اۋدانىندا 13 ەلدى مەكەنگە گاز بەرىپ باستادىق. 13 اۋىلعا تازا اۋىز سۋ قۇبىرى تارتىلدى. ءدال قازىر جالپاقتالدا گاز دا بار, سۋ دا بار, جول دا, ينتەرنەت تە بار. ءبىزدىڭ ايتىلعان جوسپارىمىز جەردە قالماي, ءبارى دە ورىندالىپ جاتىر. بولاشاقتا دا سولاي بولادى. الدا كەلە جاتقان تاۋەلسىزدىك مەرەكەسى قۇتتى بولسىن, - دەدى التاي كولگىنوۆ.

– مەن جالپاقتالداعى اگرارلىق جانە سالالىق تەحنولوگيالار كوللەدجىندە وقىتۋشىمىن. بۇگىن پاتەر كەزەگى بويىنشا جاڭا باسپاناعا قولىم جەتىپ وتىر. وسى قۋانىشىما سەبەپكەر بولعان ەلباسىعا, وبلىس باسشىلارىنا جانە قۇرىلىسشىلارعا العىسىم شەكسىز. ءۇيىمىز كىرسە شىققىسىز, ۇياداي جىلى, گازى, سۋى ىشىندە – قالاداعىداي ءبىر دە كەم ەمەس, - دەيدى قونىستوي يەلەرىنىڭ ءبىرى ايگۇل وتەباليەۆا.

ەكى قاباتتى, 12 پاتەرلىك تۇرعىن ءۇي قۇرىلىسى جالپاقتالدا بيىلعى شىلدە ايىندا باستالعان ەدى. ول ءۇشىن وبلىستىق بيۋدجەتتەن 132,5 ملن. تەڭگە بولىنگەن. جاڭا ءۇيدىڭ جالپى جالپى اۋماعى 730 شارشى مەتر. قۇرىلىستى جۇرگىزگەن «ەۆريكا» جشس ماماندارى ءۇيدى جوسپارداعى 5 ايدىڭ ورنىنا 4 اي ىشىندە سالىپ ۇلگەرگەن.

– ءبىز قۇرىلىستى تىم سۋىققا قالماي, ەرتەرەك اياقتاۋعا تىرىستىق. بىراق ساپاسىنا دا ەرەكشە كوڭىل بولدىك. جالپى قۇرىلىسقا 3 مىڭ توننادان ارتىق ماتەريال كەتتى. ايتا كەتەيىن, ءۇي قۇرىلىسىنا پايدالانعان ماتەريالدىڭ ءبارى دە جەرگىلىكتى كاسىپورىنداردىڭ ءونىمى. تاعى ءبىر ەرەكشەلىگى, جىلۋ جۇيەسىن ءار پاتەر يەسى ءوزى رەتتەي الادى. جەرگىلىكتى 15 ادامدى قۇرىلىس جۇمىسىنا تارتتىق, - دەيدى مەردىگەر كومپانيا باسشىسى ولەگ تەتەرو.

قازبەك قۇتتىمۇرات ۇلى,

«ەگەمەن قازاقستان»

باتىس قازاقستان وبلىسى

سۋرەتتى تۇسىرگەن تەمىربولات توقمامبەتوۆ