تەمىرتاۋ قالاسىنىڭ 11 جاسار تۇرعىنى ەليزاۆەتا لەلكوۆا «ArcelorMittal» ترانسۇلتتىق كومپانياسى ۇيىمداستىرعان جاڭا جىلدىق اشىق حاتتار بايقاۋىندا ءۇشىنشى جۇلدەگە يە بولدى.
كونكۋرسقا قاتىسۋ ءۇشىن ءبىر عانا تەمىرتاۋ قالاسىنان 92 اشىق حات سىنعا ءتۇستى. ولاردىڭ اراسىندا ەليزاۆەتا لەلكوۆانىڭ تۋىندىسى ەڭ ۇزدىك دەپ تانىلىپ, حالىقارالىق بايقاۋعا جولداما العان بولاتىن.
كورپوراتيۆتىك كونكۋرستا ترانسۇلتتىق كومپانيانىڭ الەمنىڭ 21 ەلىندە ورنالاسقان كاسىپورىندارى قىزمەتكەرلەرىنىڭ بالالارى باق سىناستى. تاياۋدا بايقاۋدىڭ قورىتىندىسى شىعارىلىپ, كريۆوي روگ قالاسىنىڭ (ۋكراينا) 13 جاسار تۇرعىنى ماريا سلوۆاكتىڭ جەڭىمپاز اتانعانى بەلگىلى بولدى. ەكىنشى ورىندى برەمەن قالاسىنىڭ (گەرمانيا) 12 جاستاعى سۋرەتشىسى بەاتريس ياشكە يەلەنسە, ءۇشىنشى جۇلدە تەمىرتاۋلىق ەليزاۆەتا لەلكوۆاعا بۇيىردى. جەڭىمپاز بەن جۇلدەگەرلەر اقشالاي سىيلىقتارمەن ماراپاتتالادى.
ەليزاۆەتانىڭ اكەسى تەمىرتاۋداعى مەتاللۋرگيالىق كومبيناتتىڭ كوكس-حيميا وندىرىسىندە جۇمىس ىستەيدى.
قايرات ءابىلدا,
«ەگەمەن قازاقستان»
قاراعاندى وبلىسى