نازارباەۆ ورتالىعىندا «التىن توبىلعى» رەسپۋبليكالىق ادەبي بايقاۋى قورىتىندىلاندى. وعان ءتۇرلى جانردا قالام تەربەپ جۇرگەن 18 بەن 35 جاس ارالىعىنداعى قالامگەرلەر قاتىستى.
ەلىمىزدىڭ تۇڭعىش پرەزيدەنتى – ەلباسىنىڭ قورى جاس ادەبيەتشىلەردىڭ ەڭبەگىنە وسىمەن ءتورتىنشى رەت قولداۋ كورسەتتى. جىلدان جىلعا بايقاۋعا دەگەن قىزىعۋشىلىق ارتىپ كەلەدى. بيىلعى بايگەگە ەلدىڭ تۇكپىر-تۇكپىرىنەن 108 شىعارما جىبەرىلدى. جەڭىمپازدار «جىلدىڭ ۇزدىك پروزاسى», «جىلدىڭ ۇزدىك پوەزياسى», «جىلدىڭ بالالارعا ارنالعان ۇزدىك شىعارماسى», «جىلدىڭ ۇزدىك دراماتۋرگياسى» ءداستۇرلى اتالىمدار بويىنشا بەلگىلەندى. ءار اتالىم بويىنشا سىياقى قورى 1 ميلليون تەڭگەنى قۇرايدى. سونىمەن قاتار بايقاۋ استانانىڭ مەرەيتويىنا ارنالعان «استانانىڭ 20 جىلدىعى» تاقىرىبىنا ارنالعان ۇزدىك ادەبي تۋىندى» ارنايى اتالىمىمەن تولىقتى. ونىڭ جۇلدە قورى – 1,5 ميلليون تەڭگە.
ماراپاتتاۋ راسىمىنە پارلامەنت دەپۋتاتتارى, بەلگىلى قوعام, مادەنيەت, ونەر قايراتكەرلەرى, سونداي-اق وقىتۋشىلار مەن جوعارى وقۋ ورىندارىنىڭ ستۋدەنتتەرى قاتىستى. بايقاۋدىڭ ماڭىزدىلىعى مەن قازاق ادەبيەتىن دامىتۋعا قوساتىن ۇلەسىنە توقتالعان تۇڭعىش پرەزيدەنت-ەلباسى قورىنىڭ اتقارۋشى ديرەكتورى قانات جۇماباەۆ: «جىل سايىن «التىن توبىلعى» بايقاۋى بىزگە قازاقستاندىق جاڭا اقىندار مەن جازۋشىلاردى تانىتادى. بۇل ءوز كەزەگىندە جاستار مەن قوعام اراسىندا قازىرگى زامانعى ادەبيەتتى وقۋعا ىنتالاندىرۋعا, جاڭا بۋىن اۆتورلارىنىڭ جارقىن وكىلدەرىن انىقتاۋعا ىقپال ەتەدى. ءبىز باستى قۇندىلىق دەپ وسىنى سانايمىز.
«جىلدىڭ ۇزدىك پروزاسى» اتالىمىندا «اداسقاندار» شىعارماسىمەن ايزات راقىشەۆا ۇزدىك شىقتى. «جىلدىڭ ۇزدىك پوەزياسى» اتالىمى بويىنشا قايسار قاۋىمبەك («كۇڭىرەنبە, مولالار») جانە ايبول يسلامعاليەۆ («جالعىزدىق كارتيناسى») قاتار جەڭىمپاز اتاندى. «جىلدىڭ بالالارعا ارنالعان ۇزدىك شىعارماسى» اتالىمىندا الينا گاتينا جەڭىمپاز بولدى. «استانانىڭ 20 جىلدىعى» تاقىرىبىنا ارنالعان ۇزدىك ادەبي تۋىندى» اتالىمىنىڭ يەگەرى بولىپ شەرحان تالاپ («استانا بوياۋلارى») تانىلدى. بيىل «جىلدىڭ ۇزدىك دراماتۋرگياسى» اتالىمى بويىنشا ۇسىنىلعان جۇمىستاردىڭ قويىلعان تالاپتارعا ساي كەلمەۋىنە بايلانىستى, جەڭىمپاز انىقتالعان جوق. سونداي-اق «جىلدىڭ ۇزدىك پروزاسى» اتالىمى بويىنشا تۇرسىنبەك باشاروۆقا («چيريمە») جانە «جىلدىڭ بالالارعا ارنالعان ۇزدىك شىعارماسى» اتالىمىندا مارعۇلان اقانعا («جەتىقاراقشى») كوتەرمەلەۋ سىياقىسى رەتىندە 500 مىڭ تەڭگەدەن بەرىلدى.
راۋان قايدار,
«ەگەمەن قازاقستان»