سپورت سارايىندا قازاق كۇرەسىنەن وتكەن ءدۇبىرلى باسەكەگە ەلىمىزدىڭ بارلىق وبلىستارىنان, استانا, الماتى, شىمكەنت قالالارىنان جينالعان 300-دەن استام بالۋان قاتىسىپ, ءوزارا كۇش سىناستى.
جارىستىڭ اشىلۋ سالتاناتىندا وبلىس اكىمىنىڭ ءبىرىنشى ورىنباسارى ايداربەك ساپاروۆ ءسوز سويلەپ,سايدىڭ تاسىنداي ىرىكتەلىپ كەلگەن بوز كىلەم مىقتىلارىنا ساتتىلىك تىلەدى. جولداۋ تالاپتارىنا وراي وڭىردە اتقارىلىپ جاتقان بۇقارالىق سپورتتى دامىتۋ شارالارىنا توقتالدى.
قازاق كۇرەسى فەدەراتسياسىنىڭ باس حاتشىسى باقداۋلەت ءسابيتوۆ ايداربەك ساپاروۆقا, دەنە شىنىقتىرۋ جانە سپورت باسقارماسىنىڭ باسشىسى رۋسلان ەسەنالينگە قازاق كۇرەسى فەدەراتسياسىنىڭ پرەزيدەنتى, «قازاقستان بارىسى» ءتۋرنيرىنىڭ ۇيىمداستىرۋشىسى ارمان شوراەۆتىڭ العىس حاتىن تابىستادى. ال قازاق كۇرەسىنەن وبلىستىڭ تۇڭعىش سپورت شەبەرى, پەتروپاۆل قالاسىنىڭ قۇرمەتتى ازاماتى باۋىرجان قۇلجانوۆ ۇلتتىق سپورتتى دامىتۋعا قوسقان ۇلەسى ءۇشىن فەدەراتسيانىڭ توسبەلگىسىمەن ماراپاتتالدى.
بىرنەشە كۇنگە سوزىلعان بىرىنشىلىك باراسىندا 90 كيلو سالماقتا شىمكەنتتىك بالۋان ءادىلجان ىستىباەۆ جەڭىمپاز اتاندى. 100 كيلو سالماق دارەجەسىندە بەلدەسكەن بالۋانداردىڭ اراسىندا قىزىلوردا وبلىسىنىڭ وكىلى نۇرىم سالىمگەرەەۆ توپ جاردى. ءابسوليۋتتى سالماقتا الماتى قالاسىنىڭ وكىلى رۋسلان ابدىرازاقوۆ قارسىلاس شىداتپادى.
سايىستىڭ جەڭىمپازدارى مەن جۇلدەگەرلەرى ەل قۇراماسىنا قابىلدانىپ, 2019 جىلى وتەتىن الەم چەمپيوناتىندا جانە «ەۋرازيا بارىسى» تۋرنيرىندە باقتارىن سىنايتىن بولادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى