قازاقستان رەسپۋبليكاسى پرەزيدەنتى كەڭسەسىنىڭ باستىعى – قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى ديرەكتورىنىڭ مىندەتىن اتقارۋشى ماحمۇد قاسىمبەكوۆتىڭ اقتوبەگە ساپارى وبلىستىق تاريحي-ولكەتانۋ مۇراجايىنىڭ پايدالانۋعا بەرىلۋىمەن تۇسپا-تۇس كەلدى. سونداي-اق جاڭا مۋزەيدە «ن.نازارباەۆ: ءداۋىر, تۇلعا, قوعام» اتتى كوشپەلى قور كورمەسىنىڭ سالتاناتتى اشىلۋ ءراسىمى ءوتتى.
سالتاناتتى جيىندا م.قاسىمبەكوۆ ەلباسى كىتاپحاناسىنىڭ كوشپەلى قورى كورمەسى جوباسى 2017 جىلى قىركۇيەك ايىندا تاۋەلسىزدىگىمىزدىڭ التىن بەسىگى الماتىدان باستاۋ العانىن اتاپ ءوتتى. جوبا ءوز قىزمەتىن بيىلعى اقپان ايىندا تۇركىستان وبلىسىندا جالعاستىردى. ال وتكەن قىركۇيەك ايىندا باستالعان كوشپەلى قور كورمەسى اتىراۋ وبلىسىندا ۇلكەن تابىسپەن وتكىزىلدى. تۇتاستاي العاندا از ۋاقىتتىڭ ىشىندە كورمەنى 350 مىڭنان استام ادام تاماشالاعان ەكەن.
ەندى مىنە, كوشپەلى قور كورمەسىمەن تانىسۋ مۇمكىندىگىنىڭ كەزەگى اقتوبەلىكتەر مەن وركەندى ءوڭىر قوناقتارىنا كەلىپ وتىر.
كورمەنىڭ باستى ماقساتى – كىتاپحانا جيناقتارى نەگىزىندە تۇڭعىش پرەزيدەنتتىڭ تاۋەلسىز قازاقستاننىڭ قالىپتاسۋىنداعى تاريحي ءرولىن جان-جاقتى زەردەلەپ كورسەتۋ. كورەرمەننىڭ نازارىنا ۇسىنىلعان ەلباسى كىتاپحاناسىنىڭ ارحيۆ, كىتاپحانا جانە مۋزەي قورىنىڭ ماتەريالدارى كوشپەلى قور كورمەسىن ودان ءارى بايىتا تۇسكەنى ايقىن كورىنەدى.
ال تۇڭعىش پرەزيدەنتتىڭ قىزمەتى مەن ومىرىنە قاتىستى كەيبىر كادەسىيلار مەن جادىگەرلەر, ەكسپوناتتار, جوعارى مەملەكەتتىك ناگرادالار, مەملەكەتتەر باسشىلارى تارتۋ ەتكەن كىتاپتار, ن.نازارباەۆتىڭ شەتەل تىلدەرىنە اۋدارىلعان ەڭبەكتەرى اقتوبە جۇرتشىلىعىنا العاش رەت ۇسىنىلىپ وتىر. سونداي-اق جوبا اياسىندا حالىقارالىق عىلىمي-تاجىريبەلىك كونفەرەنتسيالار مەن سەمينار-ترەنينگىلەر, دوڭگەلەك ۇستەلدەر جانە «اشىق كەڭىستىك» فورماتىنداعى ينتەراكتيۆتى سۇحباتتار ۇيىمداستىرىلدى. كورمە بويىنشا شولۋ جانە تاقىرىپتىق ەكسكۋرسيالار, ەلباسى كىتاپحاناسىنىڭ قىزمەتى تاجىريبەسىندە «جادىگەرلەر سويلەيدى» توپتاماسىنان كوشپەلى دارىستەر مەن مۋزەي ساباقتارى وتكىزىلدى. ءىس-شارالار كورمەگە كەلۋشىلەردىڭ ۇلكەن قىزىعۋشىلىعىن تۋعىزدى.
كورمە «ەلباسى جولى», «ەلباسى فەنومەنى», «الەم تانىعان ەلباسى» جانە «ەلباسى مارتەبەسى – ەل مارتەبەسى» اتتى ءتورت بولىمنەن تۇرادى. «ن.نازارباەۆ: ءداۋىر, تۇلعا, قوعام» جوباسىنىڭ اقتوبەگە كەلۋى ءوڭىر ومىرىندەگى ەلەۋلى وقيعا بولعانى انىق. كوشپەلى قور كورمەسى مەن وبلىستىق تاريحي-ولكەتانۋ مۇراجايىنىڭ اشىلۋ ءراسىمى كەزىندە اقتوبە وبلىسىنىڭ اكىمى بەردىبەك ساپارباەۆ ءسوز تيەگىن وسى ارنادان ساباقتادى.
مۋزەي قۇرىلىسىنىڭ باستالۋىنا وتكەن جىلى رۋحاني جاڭعىرۋ اياسىندا قولعا الىنعان «تۋعان جەر» باعدارلاماسى قوزعاۋ سالدى. جوبانىڭ جالپى قۇنى 650 ميلليون تەڭگە بولسا, ونىڭ ۇشتەن ءبىرىن وسى ءوڭىردىڭ تۋماسى – كاسىپكەر يسلامبەك سالجانوۆ بولگەن. ىرگەتاسى وسىدان 80 جىل بۇرىن قالانعان ەسكى مۇراجاي عيماراتىنىڭ توزىعى ابدەن جەتىپ, اپاتتىق جاعدايدا تۇرعان ەدى. مۇنداعى قۇندى جادىگەرلەر مەن ەكسپوزيتسيالاردى ورىن جەتىسپەۋىنە بايلانىستى شاڭ باسىپ قالعانى دا جاسىرىن ەمەس. مۇراجاي قورىندا 110 مىڭداي جادىگەر بار.
جوبا اياسىندا ماحمۇد قاسىمبەكوۆ ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ ستۋدەنتتەرىمەن جانە پروفەسسورلىق-وقىتۋشىلىق قۇراممەن كەزدەسىپ, ەلباسى كىتاپحاناسى اتىنان كىتاپتار توپتاماسىن سىيعا تارتتى. سونىمەن بىرگە ەلباسى كىتاپتارى مەن جيناقتارىنىڭ قۇندىلىعى مەن ەرەكشەلىگى تۋرالى بايانداپ, قاتىسۋشىلاردىڭ سۇراقتارىنا جاۋاپ بەردى.
«ن.نازارباەۆ: ءداۋىر, تۇلعا, قوعام» كورمەسى اقتوبە ايماعىندا الداعى اقپان ايىنا دەيىن جالعاسادى.
تەمىر قۇسايىن,
«ەگەمەن قازاقستان»
اقتوبە