ەلىمىزدىڭ اگرارلىق عىلىمىن بيزنەستىڭ سۇرانىسىنا قاراي جاڭعىرتۋداعى باسىم باعىتتىڭ ءبىرى – وتاندىق اۋىل شارۋاشىلىق سالاسىنا جاڭا تەحنولوگيالار تارتۋ ماسەلەسىن جۇيەلى جولعا قويۋ ءىسى. ەلباسى جولداۋىندا دا ەلىمىزدىڭ اگروونەركاسىپتىك كەشەنىن زامان تالاپتارىنا ساي يننوۆاتسيالىق جولمەن دامىتۋعا قاتىستى ناقتى مىندەتتەر جۇكتەلگەن. وسى ورايدا الماتىدا «عىلىم مەن بىلىمگە نەگىزدەلگەن اگروونەركاسىپتىك كەشەنىن قالىپتاستىرۋ ماسەلەلەرى» تاقىرىبىندا حالىقارالىق فورۋم ءوتتى.
بۇگىنگى كۇنى ەلىمىزدىڭ اۋىلشارۋاشىلىق سالاسىنىڭ الدىندا ەڭبەك ونىمدىلىگىن ارتتىرىپ, وڭدەلگەن اۋىل شارۋاشىلىق ءونىمىنىڭ ەكسپورتىن 2,5 ەسەگە كوبەيتۋ مىندەتى تۇر. بۇل ماقساتتارعا جەتۋ ءۇشىن زاماناۋي تەحنولوگيالاردى مەڭگەرگەن, يننوۆاتسياعا بەيىم, ءوندىرىستىڭ جاڭا باعىتتارىن يگەرگەن, عىلىمي جەتىستىكتەردى وندىرىسكە ەنگىزىپ, جاڭاشا ويلاي الاتىن كاسىبي ماماندار قاجەت. اتالعان باعىتتاردى جانداندىرۋ ماقساتىندا سالانى باسقارۋدىڭ تىڭ ادىستەرىن قولدانىپ, اۋىل شارۋاشىلىعى بويىنشا شەتەلدىڭ بىلىكتى ماماندارىنان تاجىريبە الىپ, وزىق تەحنولوگيالارىن تارتۋدىڭ ماڭىزى زور.
اگرارلىق سالاداعى وزەكتى ماسەلەلەردى تالقىعا سالعان فورۋم جۇمىسىنا قر پرەمەر-ءمينيسترىنىڭ ورىنباسارى – قر اۋىل شارۋاشىلىق ءمينيسترى ومىرزاق شوكەەۆ, فرانتسيا اۋىل شارۋاشىلىق زەرتتەۋلەر ينستيتۋتىنىڭ ەكس-پرەزيدەنتى گي ريبا, پارلامەنت دەپۋتاتتارى, مەملەكەتتىك جانە جەرگىلىكتى اتقارۋشى ورگاندار وكىلدەرى, سالالىق وداقتار مەن اسسوتسياتسيالار, اگرارلىق جوو باسشىلارى, اۋىل شارۋاشىلىق تاۋار وندىرۋشىلەرى, بىلىكتى عالىمدار قاتىسىپ, اگروونەركاسىپتىك كەشەندەگى وزەكتى ماسەلەلەر توڭىرەگىندە پىكىر الماسىپ, ءوز ۇسىنىستارىن ورتاعا سالدى. فورۋم بارىسىندا اگرارلىق ءبىلىم بەرۋدىڭ جاڭا باعىتتارى, عىلىم مەن ءوندىرىس ينتەگراتسياسى سارالانىپ, ءبىلىمنىڭ ەڭبەك ونىمدىلىگىنە ترانسفورماتسيالانۋ ماسەلەلەرى ءسوز بولدى.
فورۋم جۇمىسىن اشقان ومىرزاق شوكەەۆ: «اۋىل شارۋاشىلىعىن يننوۆاتسيالىق باعىتتا دامىتۋ ءۇشىن ءبىرىنشى كەزەكتە بىلىكتى ماماندار مەن جاڭا تەحنولوگيالار قاجەت. سوندىقتان سالانى جاڭعىرتۋدا ءبىلىم مەن عىلىم ماڭىزدى رول اتقارادى»– دەپ اتاپ ءوتتى.
قازىرگى تاڭدا مينيسترلىك رەسپۋبليكامىزدىڭ ءار ايماعىندا فەرمەرلەرگە اگرارلىق قىزمەت كورسەتەتىن, جاڭا تەحنولوگيالار ترانسفەرتىن ىسكە اسىراتىن, وزىق تەحنولوگيالارمەن تانىستىرىپ, اۋىل شارۋاشىلىق قۇرىلىمدارى ماماندارىن قايتا وقىتىپ, دايارلىقتان وتكىزەتىن اگروپاركتار مەن ايماقتىق ورتالىقتار, جاڭا تەحنولوگيالاردى ۇسىناتىن كورسەتىلىم الاڭدارىن اشۋدا. ماماندار بۇل باعىتتا قولعا الىنعان ناقتى مىندەتتەر اگرارلىق سالانىڭ جاڭا تىنىس الۋىنا جول اشادى دەپ وتىر.
ارمان وكتيابر,
«ەگەمەن قازاقستان»
الماتى