جاقىندا حالىق قاھارمانى باقىتجان ەرتاەۆ جاڭادان قالىپتاسىپ كەلە جاتقان قازاق ارتەگىنىڭ ءبىر بولىمشەسى «بالداۋرەن-قاپشاعاي» رەسپۋبليكالىق وقۋ-ساۋىقتىرۋ ورتالىعىندا دەمالىپ جاتقان وقۋشىلارمەن كەزدەستى.
بۇل شاراعا ورتالىقتىڭ باس ديرەكتورى مۇحيتدين تولەپباي, «نۇر وتان» پارتياسى قاپشاعاي قالالىق فيليالىنىڭ توراعاسى ەرجان نۇرپەيىسوۆ جəنە قاپشاعاي قالاسىنداعى اۋعان سوعىسىنىڭ ارداگەرلەرى قاتىستى.
ء«بىز بارلىعىمىز پاتريوتپىز! پاتريوت بولۋ دەگەنىمىز – ءوز وتانىڭدى شىن جۇرەگىڭمەن ءسۇيۋ, وزىڭە جانە ءوز حالقىڭا سەنىپ, قوعامعا قىزمەت ەتۋ», دەپ ءسوز باستاعان كەشەگى جاۋىنگەر, بۇگىنگى حالىق قالاۋلىسى ءوزىنىڭ بالالىق شاعى مەن اسكەري ءومىرى تۋرالى اڭگىمەلەدى. اۋعان دالاسىندا كورگەن قيان-كەسكى تىرلىكتەن ايتقان ەستەلىكتەرى بالالارعا بەيبىت كۇننىڭ بەرەكەسىن ۇقتىرعانداي بولدى.
«سەندەر باقىتتىسىڭدار, – دەدى حالىق قاھارمانى, – بەيبىت ەلدە ءومىر ءسۇرىپ جاتىرسىڭدار, بولاشاققا دەگەن سەنىمدەرىڭ زور. الدارىڭدا وركەنيەتتى ءومىردىڭ ەسىگى اشىق. ءوز تاريحىن, ءوز ءتىلىن بىلمەيتىندەر پاتريوت بولا المايدى. ماڭگىلىك ەلدىڭ ماڭگىلىك ءتىلىن ساقتاڭدار. ەڭ باستىسى – وتاندى ءسۇيۋ, تاريحتى قۇرمەتتەۋ كەرەك. سەندەرگە ايتار وسيەتىم وسى!».
تاۋەلسىز ەلدىڭ بۇگىنگى جاسى پاتريوت بولۋى كەرەكتىگىن ايتىپ, 2016 جىلدان بەرى جۇمىس ىستەپ كەلە جاتقان «قازاقستاندىق جاس پاتريوتتار اكادەمياسىنىڭ» تىنىسىمەن تانىسىپ, ءدان ريزا بولدى. بەلسەندى وقۋشىلارعا «قازاقستاننىڭ جاس پاتريوتتارى» توسبەلگىسىن تاپسىردى. كەزدەسۋ بارىسىندا بيىلعى ەلباسىنىڭ جولداۋىندا كوتەرىلگەن ماسەلەلەر دە ايتىلىپ, ۇستاز مارتەبەسىن كوتەرۋ, وقۋشىلاردىڭ مۇعالىمدەرىن قۇرمەتتەۋى, قادىر تۇتۋى, قوعامدا وڭ كوزقاراس قالىپتاستىرۋ دا اڭگىمە ارقاۋىنا اينالدى. 2019 جىلعى جاستار جىلى بويىنشا دا تاعىلىمدى تالقىلاۋ جاسالدى. سەبەبى ورتالىقتا ەڭبەك ەتەتىن قىزمەتكەرلەردىڭ دەنى – جاستار. «جاستار قاشاندا مەملەكەت ساياساتىنىڭ باسىندا تۇرادى, قانداي دا ءبىر جاڭا باستاما بولسا, جاستار ونى قولداپ جۇزەگە اسىرادى. سوندىقتان جاستاردىڭ بويىندا ازاماتتىق پەن قازاقستاندىق ءپاتريوتيزمدى قالىپتاستىرۋعا, الەمدىك جانە وتاندىق مادەنيەت جەتىستىكتەرىن وقىپ ۇيرەنۋگە, يننوۆاتسيالاردى مەڭگەرۋگە قابىلەتتەرى جەتەدى», دەگەن قاھارمان قازاققا وقۋشىلار وزدەرىنىڭ كوكەيلەرىندەگى سۇراقتارىن قويدى. سۇراققا جاۋاپ بەرۋ ساتىندە ول بالالاردى كىتاپ وقۋعا, ونى وقىپ قانا قويماي, ءوز ومىرىنە قاجەتتى سەرىك ەتۋگە, سپورتتىڭ ءتۇرلى سالالارىمەن اينالىسۋعا, ونەردى, قازاقي بولمىسىمىزعا ءتان مۇرالاردى تانىپ بىلۋگە, وتاندىق جانە الەمدىك ادەبيەت مۇرالارىن باعالاۋعا شاقىردى.
كەزدەسۋ سوڭى حالىق باتىرى باۋىرجان مومىش ۇلىنىڭ «جاستارىمىز وتانشىل بولسىن ... ال وتانشىلدىق ءوز ۇيىڭنەن باستالادى. كىمدە-كىم اتا-اناسىن ارداقتاسا, سول اتا-انادان بىرگە تۋعان باۋىرلارمەن تاتۋ بولسا, ءوزىنىڭ وسكەن اۋىل, قالاسىن, تۋعان ۇلتىن سىيلاپ, قادىرلەسە سول ادام پاتريوت, وتانشىل بولادى» دەگەن ءتۇيىندى سوزىمەن قورىتىندىلاندى.
بۇدان كەيىن «بالداۋرەن» رەسپۋبليكالىق وقۋ-ساۋىقتىرۋ ورتالىعىنىڭ باسشىسى م.تولەپباي باقىتجان ەرتاەۆقا العىس حات تاپسىردى.
گۇلنار قۇلجانوۆا,
«بالداۋرەن-قاپشاعاي» روسو ادىستەمەلىك ءبولىمىنىڭ مەڭگەرۋشىسى
الماتى وبلىسى