ۆەنگريانىڭ استاناسى – بۋداپەشتە شايبالى حوككەيدەن «ەۆروچەللەندج» ءتۋرنيرى باستالدى. قازاقستاننىڭ ۇلتتىق قۇراماسى ءوزىنىڭ العاشقى كەزدەسۋىن ايدىن يەلەرىنە قارسى وتكىزدى.
باسەكەنى سىلبىر باستاعان قوس كوماندا ءبىرىنشى كەزەڭدە ءبىر-ءبىرىنىڭ قاقپا كىلتىن تابا المادى. ەسەسىنە ۇزىلىستەن كەيىن قوناقتار قارقىنىن كۇرت كۇشەيتىپ, اينالدىرعان ءۇش مينۋت ارالىعىندا ءۇش مارتە مەرگەندىك تانىتتى. العاشىندا كيريلل ساۆيتسكي, ىلە-شالا ۆالەري گۋرين مەن اندرەي ياكوۆلەۆ نىسانانى ءدال كوزدەدى. بۇل گولداردىڭ بارلىعى دا ەكىنشى كەزەڭنىڭ باسىندا سوعىلدى. ءۇشىنشى كەزەڭدە ۆەنگريالىقتار ەسەپ ايىرماشىلىعىن قىسقارتتى – 1:3. بۇل ەسەپ كەزدەسۋدىڭ سوڭىنا دەيىن ساقتالدى.
ءوزىنىڭ كەلەسى باسەكەسىن قازاقستان قۇراماسى استانانىڭ ۋاقىت ولشەمى بويىنشا بەيسەنبىدەن جۇماعا قاراعان ءتۇنى وڭتۇستىك كورەياعا قارسى وتكىزەدى. ال قاراشانىڭ 9-نان 10-نا قاراعان ءتۇنى يتاليا كومانداسىمەن كۇش سىناسامىز.
ەستەرىڭىزگە سالا كەتەيىك, بۇل جارىستا قازاقستان قۇراماسى ساپىندا مىنا حوككەيشىلەر ونەر كورسەتۋدە: قاقپاشىلار – نيكيتا بوياركين («سارىارقا») مەن ۆالەري سەۆيدوۆ («الماتى»). قورعاۋشىلار – ەگور شالاپوۆ («نوماد»), الەكساندر پەلەۆين («نوماد»), يۆان ستەپانەنكو («بەيبارىس»), ەميل نۇرعاليەۆ («تەمىرتاۋ»), ماديار ىبىرايبەكوۆ («نوماد»), نيكيتا كلەششەنكو («نوماد»), كيريلل پولوحوۆ («نوماد») جانە ستەپان الەكساندروۆ («التاي-تورپەدو»). شابۋىلشىلار – ۆلاديسلاۆ نيكۋلين («سارىارقا»), اركادي شەستاكوۆ («تورپەدو»), كيريلل ساۆيتسكي («نوماد»), دميتري گرەنتس («بارىس»), ياروسلاۆ ەۆدوكيموۆ («نوماد»), الەكساندر بوريسەۆيچ («تەمىرتاۋا), ۆالەري گۋرين («نوماد»), دميتري گۋركوۆ («بارىس»), ەگور پەتۋحوۆ («نوماد»), كيريلل پانيۋكوۆ («نوماد»), انتون نەكرياچ («بەيبارىس») جانە اندرەي ياكوۆلەۆ («نوماد»).
عالىم سۇلەيمەن,
«ەگەمەن قازاقستان»