بوب دورف,
كاسىپكەر, «The Startup Owners Manueal» كىتابىنىڭ اۆتورى:
– مەن الەمنىڭ كوپتەگەن ەلدەرىنىڭ ستارتاپ كورمەلەرىندە بولدىم. بۇل – قازاقستانعا العاشقى ساپارىم. شىنىمدى ايتسام, قازاقستان ستارتاپتارىمەن ءتانتى ەتتى. وسى ۋاقىتقا دەيىن 60-قا جۋىق جوبامەن تانىستىم. ءبىر بايقاعانىم, قازاقستاندىق جوبا جاساۋشىلار وڭاي ءارى قولجەتىمدى تەحنولوگيالاردى پايدالانىپ, ءتيىمدى, قىزىقتى باعدارلامالار جاساعان. سوندىقتان, قازاقستاننىڭ يننوۆاتسيالىق تەحنولوگيالار سالاسىنان كوپ ءۇمىت كۇتەمىن. بۇل سالاعا مەملەكەت تاراپىنان كومەك كورسەتىلىپ, كوڭىل ءبولىنۋ كۇندەردىڭ كۇنى الەمدىك ماڭىزى بار باستامالاردىڭ قولعا الىنۋىنا الىپ كەلەدى. قازاقستان ۇكىمەتىنىڭ ستارتاپ سالاسىنا ينۆەستيتسيا ءبولۋىن قولدايمىن.
دجوزەف تسيگلەر,
«Astana Hub» باس اتقارۋشى ديرەكتورى:
– قازاقستاننىڭ ستارتاپ جۇيەلەرىنە ۇلەسىمدى قوسا العانىما قۋانىشتىمىن. ستارتاپتىڭ تەك يدەيا جۇزىندە ەمەس, ناقتى ىسكە اسىرىلىپ جاتقانى قۋانتادى. «Astana Hub»-تىڭ جاڭا باسشىسى رەتىندە وسىنداعى ستارتاپتاردى دامىتىپ, بۇعان جاستاردى دا جۇمىلدىرۋعا تىرىسامىن.
قازىر بارلىعى سيليكون القابىندا جاسالعان دايىن ونىمدەردى كوشىرىپ الۋعا اۋەس. بۇل دۇرىس ەمەس. جاڭا قىزمەتىمدە قازاقستاننىڭ جەكە, بەيىمدەلگەن «سيليكون القابىن» جاساۋعا تىرىسامىن. «Astana Hub» تەك جاڭا تەحنولوگيالار جاسايتىن الاڭ ەمەس, وقىتۋ الاڭىنا اينالعانىن قالايمىن. كاسىپكەرلىك تۋرالى كەڭەستەر مەن تەحنولوگيالار سالاسىنداعى ءبىلىمدى ارتتىرۋعا, كيبەرتەحنولوگيا تۋرالى اقپارات الۋعا مۇمكىندىك بەرگىمىز كەلەدى.
ولگا افاناسەۆا,
UVCA اتقارۋشى ديرەكتورى:
– جۇزدەگەن ستارتاپ تانىستىرىلعان ۇلكەن فورۋمعا قاتىسۋ سەبەبىم – ۋكراينا مەن قازاقستان اراسىنداعى يننوۆاتسياعا نەگىزدەلگەن كوپىر ءتۇزۋ. قازاقستاندا ستارتاپتى دامىتۋعا بيلىك پەن كاسىپكەرلەر جۇمىلا كىرىسكەن. مەملەكەت تاراپىنان قولداۋلار مەن جەكە كاسىپكەرلەردىڭ ينۆەستيتسيالارى بۇل سالانىڭ ۇلكەن جەتىستىكتەرگە جەتەتىنىنە قازىردىڭ وزىندە سەندىرەدى. ءارتۇرلى قاۋىمداستىقتار مەن قورلاردىڭ اشىلۋى ستارتاپ جوبالاردىڭ قارقىنىن كۇشەيتپەك. قازاقستان مەن ۋكراينانىڭ يننوۆاتسيالىق تەحنولوگيا سالاسىنداعى مىقتى تۇستارىن بىرىكتىرسەك, ۇلكەن جەتىستىكتەرگە جەتە الامىز دەپ ويلايمىن.
جان-فرانتسۋا گوتە,
«Startup Genome» باس ديرەكتورى:
– كانادادان قازاقستانعا ءىت تەحنولوگيالار سالاسىن دامىتۋعا كومەك بەرۋ ماقساتىندا كەلدىك. قازاقستاندى اقش جانە ەۋروپامەن بايلانىستىرا الامىز دەپ ويلايمىن. بۇل ءۇشىن بارىنشا كووپەراتيۆتى بولۋىمىز قاجەت. «Startup Genome» كومپانياسى وسى سالاداعى ءوز تاجىريبەسىمەن بولىسۋگە دايىن. قازاقستاننىڭ يننوۆاتسيا مەن تەحنولوگيالار سالاسىنداعى الەۋەتى وتە جاقسى. بۇعان قوسا, ەلدە ينجەنەرلىك جانە اقپاراتتىق تۇرعىدان ناتيجەلى جوبالار بار. ولار بولاشاقتا قازاقستاننىڭ يننوۆاتسيالىق تەحنولوگيالار سالاسىنىڭ گۇلدەنۋىنە سەپتىگىن تيگىزەدى دەپ سەنەمىن.
دايىنداعان
سۆەتلانا عالىمجانقىزى,
«ەگەمەن قازاقستان»