سىرتقى ىستەر ءمينيسترى قايرات ءابدىراحمانوۆتىڭ توراعالىعىمەن بۇۇ قامقورلىعىمەن قابىلدانعان ورنىقتى دامۋ ماقساتتارىن (ودم) قازاقستاندا العا جىلجىتۋ جونىندەگى «سەرىكتەستىك» جۇمىس توبىنىڭ العاشقى وتىرىسى ءوتتى, دەپ حابارلايدى ءسىم ءباسپاسوز قىزمەتى.
كەزدەسۋدە ءسوز سويلەگەن سىرتقى ىستەر مينيسترلىگىنىڭ باسشىسى بارلىق قاتىسۋشىلاردى بەلسەندى جۇمىس ىستەۋگە شاقىرىپ, ودم-نىڭ قازاقستان پرەزيدەنتى نۇرسۇلتان نازارباەۆتىڭ ستراتەگيالىق جانە باعدارلامالىق قۇجاتتارىمەن تولىق سايكەس كەلەتىندىگىن جانە تيىسىنشە ودم-عا قول جەتكىزۋ ەلباسىنىڭ باستامالارىن جۇزەگە اسىرۋعا تىكەلەي سەپتىگىن تيگىزەتىنىن ەرەكشە اتاپ ءوتتى. ودم-دى ىسكە اسىرۋ قازاقستاننىڭ الەمدەگى دامىعان ەلدەردىڭ قاتارىنا كىرۋ قادامدارىنىڭ تابىستىلىعىنىڭ كورسەتكىشى بولماق.
بارلىق 17 ورنىقتى دامۋ ماقساتتارىنىڭ بىرەگەيلىگى ەرەكشە اتالىپ, ولارعا قول جەتكىزۋ ءۇشىن بارلىق ەلدەر - كەدەي, باي جانە ورتا تابىسى بار ەلدەر بولسىن بىرگە جۇمىس ىستەۋ قاجەتتىلىگى ايتىلدى. ەڭ العاشقى قاتارعا كەلەسىدەي باستى مىندەتتەر قويىلادى: كەدەيلىكتى جويۋ, ەكونوميكالىق ءوسۋدى ىنتالاندىراتىن ستراتەگيالاردى ىسكە اسىرۋ, ادامداردىڭ ءبىلىم, دەنساۋلىق ساقتاۋ, الەۋمەتتىك قورعاۋ, جۇمىسقا ورنالاسۋ سياقتى الەۋمەتتىك قاجەتتىلىكتەرىن قاناعاتتاندىرۋ, كليماتتىڭ وزگەرۋىنە بايلانىستى پروبلەمالاردى شەشۋگە جانە قورشاعان ورتانى قورعاۋعا باعىتتالعان ستراتەگيالاردى ىسكە اسىرۋ.
ءىس-شاراعا قاتىسۋشىلار ورنىقتى دامۋ ماقساتتارىن قازاقستاندا العا جىلجىتۋ, سونداي-اق 2019 جىلدىڭ شىلدەسىندە نيۋ-يوركتا بۇۇ-نىڭ جوعارى دەڭگەيدەگى ساياسي فورۋمىندا قازاقستان ۇسىناتىن ەرىكتى ۇلتتىق شولۋدى دايىنداۋ ماسەلەلەرىن تالقىلادى
ءىس-شاراعا قازاقستاننىڭ مۇددەلى مەملەكەتتىك ورگاندارى, حالىقارالىق ۇيىمدار, بۇۇ دامۋ باعدارلاماسى, يۋنيسەف, بۇۇ ايەلدەر, ەۋروپالىق وداق, دۇنيەجۇزىلىك بانكى, ازيا دامۋ بانكى, سونداي-اق عىلىمي-زەرتتەۋ ينستيتۋتتارى مەن ازاماتتىق قوعام ۇيىمدارىنىڭ وكىلدەرى قاتىستى.
«2030 جىلعا دەيىنگى ورنىقتى دامۋدىڭ كۇن ءتارتىبى» دەگەن اتپەن تانىمال ورنىقتى دامۋ ماقساتتارى مىڭجىلدىق دامۋ ماقساتتارىنىڭ ورنىنا كەلىپ, بولاشاق حالىقارالىق ىنتىماقتاستىعى ءۇشىن ماقساتتار جيىنتىعى بولىپ تابىلادى. ودم-عا 2030 جىلعا دەيىن قول جەتكىزۋ جوسپارلانۋدا.
قر ۇكىمەتى جانىندا ودم-دى قازاقستاندا تابىستى ىسكە اسىرۋ ماقساتىندا 5 باعىت بويىنشا كەلەسىدەي ۆەدومستۆوارالىق جۇمىس توپتارى قۇرىلدى: «ادامدار», «پلانەتا», «وركەندەۋ», «الەم» جانە «سەرىكتەستىك». قر سىرتقى ىستەر مينيسترلىگى «تۇراقتى دامۋ ءۇشىن عالامدىق ارىپتەستىگىنىڭ» 17-ءشى ماقساتى بويىنشا جۇمىس توبىنىڭ ۇيلەستىرۋشىسى بولىپ بەكىتىلگەن. ۇلتتىق دەڭگەيدە بۇل ماڭىزدى جۇمىستىڭ ۇيلەستىرۋشىسى - قر ۇلتتىق ەكونوميكا مينيسترلىگى.