ەسىمى شەتەلگە جاقسى ءمالىم مونۋمەنتاليست سۋرەتشى نۇرلان تايىروۆ «تۋعان وڭىر–تۇنعان سىر» جوباسى اياسىندا وبلىس ورتالىعىندا تۇڭعىش سۋرەت كورمەسىن ۇيىمداستىرىپ, جەرلەستەرىن ءوزىنىڭ ونەر جولىمەن جان-جاقتى تانىستىردى.
نۇرلان – رەسەي سۋرەتشىلەر وداعىنىڭ مۇشەسى. مەكتەپتە جۇرگەندە سۋرەت سالۋعا دەگەن اۋەستىگى بالالىق قۇشتارلىققا ۇلاسىپ, پەتروپاۆل ونەر كوللەدجىن بىتىرەدى. بەكزات ونەرگە دەگەن ەرەكشە ىقىلاس-پەيىلىنىڭ ارقاسىندا ءنوۆوسىبىر ساۋلەت اكادەمياسىن اياقتاپ, شەكارالىق ايماقتا تۇراقتاپ قالادى. جىراقتا جۇرسە دە, ول ءۇشىن شىر ەتىپ دۇنيەگە كەلگەن تۋعان جەردىڭ ورنى بولەك, ىستىق. اتامەكەنگە دەگەن پەرزەنتتىك ىستىق سەزىمىن, بالا ماحابباتىن شىعارمالارىندا شابىتتانا بەينەلەپ, بىرقىدىرۋ پورترەتتىك, سيۋجەتتىك توپتامالار ارناپتى. ءار تۋىندىسىنان وزىندىك ورنەك, ۇلتتىق ناقىش, سىرلى سەزىم انىق اڭعارىلادى. تاقىرىپ اياسى دا كەڭ, سان الۋان.
وزىندىك ءستيلى قالىپتاسقان ونەر يەسى قىزىلجارلىقتارعا بىرنەشە تسيكلدان تۇراتىن «بەينە مەن ءتۇس» اتتى سۋرەتتەر توپتاماسىن ۇسىندى. بايىرعى كەزەڭ مەن قازىرگى قۇبىلمالى زاماننىڭ سان قاتپارلى قۇبىلىستارى مەن تىلسىم سىرلارىن, رۋحاني ۇقساستىقتارى مەن ايىرماشىلىقتارىن تاماشا ۇندەستىرە دە, شەندەستىرە دە بىلەتىن نۇرلان ءوزارا ۇيلەسىم تاپقان ءتۇرلى-ءتۇستى بوياۋلار ارقىلى سۋرەت الەمىنە تەرەڭ بويلايدى, وبرازدار گالەرەياسىن جاسايدى.
ال كەمەل سۋرەتشىنىڭ گرەك ميفولوگياسىنا قالام تارتقان سۋرەتتەر جيىنتىعى – وزگەشە ءبىر الەم. انتيكالىق ءداۋىردىڭ جۇمباق الەمىن وتە نانىمدى كورسەتە بىلگەنى سونشالىق, «ورفەيدىڭ اجالى» كارتيناسى بىرنەشە مانەردە بەينەلەنىپ, ۇشقىر قيال ەركىن قانات قاعادى, كوك الەمىن كەزەدى. شالقار شابىت, تالانت تاعىلىمى دەگەن وسى بولار!
تالعامپازدىعى, ىزدەنىمپازدىعى, وي كوكجيەگىنىڭ كەڭدىگى, ادەمىلىكتى, سۇلۋلىقتى اسپەتتەۋدى ءار بوياۋ ارقىلى ۇقتىرادى دەسەك, ارتىق ايتقاندىق بولماس.
– مىنا سۋرەتتى سالۋ يدەياسى اياقاستى تۋدى. ترامۆايدا جانىما ءبىر ادەمى كەلىنشەك وتىردى. قۇددى مەكتەپ وقۋشىسى سەكىلدى. الەۋمەتتىك جەلىگە بۇكىل اقىل-ەسىمەن, وي-ساناسىمەن بەرىلگەنى سونشالىق, ءوزىن دە, وزگەلەردى دە مۇلدەم ۇمىتتى. قاشان ايالداماعا جەتكەنشە ونىڭ بار قيمىلىن كوز قىرىممەن باعىپ وتىردىم. سمارتفوندار ادام ءومىرىنىڭ اينىماس ءبىر بولشەگىنە اينالىپ بارا ما دەگەن سۇمدىق قاۋىپ, الدەبىر بەلگىسىزدىك كۇش تۇلا-بويىمدى تۇمشالاپ الدى. ونىڭ ءتۇسىنىپ بولماس بۇل ارەكەتى جالعان دۇنيەدەن مۇلدەم بولەكتەنىپ, جانى دا, ءتانى دە وزگە عالامدا جۇرگەندەي كۇي كەشتىردى, – دەيدى ن.تايىروۆ.
وسى ىسپەتتەس كارتينالار ابستراكتىلى, ستيحيالى, شىم-شىتىرىق سىزىقتار مەن كەسكىندەمەلەر قۇراندىسى ىسپەتتى كورىنگەنىمەن, تۇپقازىعى اۋىر ويلارعا, سالماقتى سۇراقتارعا جەتەلەيدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى