سارسەنبىنىڭ ساتىندە استاناداعى بەيبىتشىلىك جانە كەلىسىم سارايىندا شەتەلدە تۇراتىن قانداستارىمىزدىڭ قاتىسۋىمەن «قاسيەتتى قازاق ەلى» اتتى حالىقارالىق ونەر فەستيۆالى ءوتتى. شارانى دۇنيەجۇزى قازاقتارىنىڭ قاۋىمداستىعى, «وتانداستار قورى» كوممەرتسيالىق ەمەس اكتسيونەرلىك قوعامى جانە قوعامدىق دامۋ مينيسترلىگى بىرلەسىپ ۇيىمداستىرعان.
«قاسيەتتى قازاق ەلى» اتتى ونەر فەستيۆالىنە ەلىمىزدىڭ تۇكپىر-تۇكپىرىنەن كەلگەن قانداستارىمىزبەن قوسا, گەرمانيا, فرانتسيا, قىتاي, رەسەي, موڭعوليا, تۇركيا قاتارلى الىس-جاقىن شەتەلدەردەن 50-دەن استام ونەرپاز قاتىستى.
فەستيۆال اياسىندا ء«مۇشايرا», «تەرمە» جانە «قولونەر شەبەرلىگى» سىندى ءۇش اتالىم بويىنشا بايگە ۇيىمداستىرىلدى.
يگى شارانىڭ اشىلۋىندا ءسوز سويلەپ, بۇل ونەر فەستيۆالىنىڭ ماقساتى – ءار ەلدەگى ونەرلى, ءبىلىمدى قازاق جاستارىنىڭ باسىن قوسىپ, شىعارماشىلىق جانە ءبىلىمىن ارتتىرۋىنا جول اشۋ, ولارعا قاتىستى ماڭىزدى ماسەلەلەردى تالقىلاۋ ەكەندىگىن العا تارتقان دۇنيەجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ: «وتكەن جىلى استانادا وتكەن دۇنيەجۇزى قازاقتارىنىڭ V قۇرىلتايىندا ەلباسى الەمنىڭ ءار تۇكپىرىندە جۇرگەن قانداستارعا قول ۇشىن بەرۋ ماقساتىندا «وتانداستار قورى» دەگەن قور قۇرۋ كەرەكتىگىن ايتقان بولاتىن. قازىرگى تاڭدا ول قور دا قۇرىلىپ, ونىڭ باسىنا ەلىمىزگە بەلگىلى, بەدەلدى ازامات نۇرتاي ابىقاەۆ اعامىز كەلگەنىن بىلەسىزدەر. مىنە, بۇگىنگى شاراعا دا سول قور اتسالىسىپ جاتىر. سونىمەن بىرگە ەلباسى باعدارلاما جاساۋدى تاپسىرعان, ول باعدارلاما دا جاسالىپ, بەكىدى. بۇل فەستيۆالدىڭ ءوتىپ جاتقانى دا سول باعدارلامانىڭ ارقاسى. كەشە دوڭگەلەك ۇستەل وتكىزدىك. جان-جاقتان كەلگەن قانداستاردىڭ ۇسىنىستارىن تىڭدادىق. ونىڭ ءبارىن حاتقا ءتۇسىرىپ, ىرىكتەپ الداعى ۋاقىتتا ىسكە اسىرۋعا كۇش سالامىز», - دەدى. سونداي-اق زاۋىتبەك قاۋىسبەك ۇلى شارانى ۇيىمداستىرۋعا اتسالىسقان قوعامدىق دامۋ مينسترلىگىنە ريزاشىلىعىن بىلدىرە كەلە, الىس-جۋىقتان ات ارىتىپ جەتكەن بارشا قوناقتارعا العىس ايتىپ, ونەر بايگەسىنە قاتىسۋشىلارعا ساتتىلىك تىلەدى.
حالىقارالىق الاش ادەبي سىيلىعىنىڭ يەگەرى, اقىن قازىبەك يسا باستاعان قازىلار القاسى ءار ەلدەن كەلگەن ونەرپازدار شىعارماشىلىعىنا باعا بەرىپ, جۇلدەلى جۇيرىكتەردى انىقتادى.
«قولونەر شەبەرلىگى» اتالىمى بويىنشا III ورىنعا رەسەيدەن كەلگەن ارتىقباي سماعۇلوۆ يە بولسا, II ورىندى تۇركيادان كەلگەن نارگيز تىنەي الدى. ال I ورىنعا موڭعوليادان كەلگەن ءورىمشى حابىل قايىپ لايىق دەپ تانىلىپتى.
«تەرمە» اتالىمى بويىنشا III ورىندى ارمان قالەلبەك ۇلى (قحر), II ورىندى جانعار مامبەتنازاروۆ (وزبەكستان), I ورىندى نۇرجىگىت ەسxات (قحر) يەلەندى.
ء«مۇشايرا» اتالىمى بويىنشا III ورىندى الاش ءتۇرسىنالى ۇلى (قحر) II ورىندى نارقۇلان رايxان ۇلى (موڭعوليا), I ورىندى شىناربەك جومارت ۇلى (موڭعوليا) ەنشىلەدى. سونداي-اق, ءۇش اتالىم بويىنشا ءبىر باس جۇلدە تاعايىندالىپ, ونى قىتايدان كەلىپ, ء«مۇشايرا» اتالىمى بويىنشا بايگەگە قاتىسقان جۇماتاي كوكسۋباي يەلەنىپ, 400 000 تەڭگە كولەمىندەگى قارجىلاي سىيلىقتى قانجىعالادى.
بارلىق اتالىم بويىنشا ءۇشىنشى ورىن يەگەرىنە 100 000 تەڭگە, ەكىنشى ورىن يەگەرىنە 150 000 تەڭگە, ءبىرىنشى ورىن يەسىنە 250 000 تەڭگە جۇلدە تابىستالدى. سونىمەن بىرگە 11 ارنايى جۇلدە بەرىلىپ, ءار قايسىسىنا 50 000 تەڭگەدەن ۇلەستىردى.
فەستيۆالدىڭ جابىلۋ راسىمىنە «وتانداستار قورى» اق پرەزيدەنتى نۇرتاي ابىقاەۆ, قوعامدىق دامۋ ءمينسترى دارحان كالەتاەۆ قاتىسىپ, جۇيرىكتەرگە جۇلدە تابىستادى. فەستيۆال سوڭى ونەر جۇلدىزدارىنىڭ قاتىسۋىمەن گالا-كونتسەرتكە ۇلاسىپ, جان-جاقتان جينالعان اعايىننىڭ جۇرەگىن تەربەپ, كوڭىلىن شالقىتتى. بۇيىرسا, بۇل شارا كەلەر جىلى دا جالعاسىن تاپپاق.
ۇلاربەك نۇرعالىم ۇلى,
«ەگەمەن قازاقستان»
سۋرەتتى تۇسىرگەن,
ورىنباي بالمۇرات
«ەگەمەن قازاقستان»