5-6 قاراشا كۇندەرى Kazinform پورتالى مەن «ەگەمەن قازاقستان» گازەتىنىڭ جۋرناليستەرى حالىقارالىق جاڭالىقتاردى تاراتۋ, پوستشىندىق داۋىرىندەگى رەداكتسيالىق ساياسات, سونىمەن قاتار فاكتچەكينگتىڭ تاجىريبەسى مەن نەگىزدەرىن ۇيرەندى.
Wpost (پولشالىق اپتالىق) ءجۋرناليسى, پولشا رەپورتەرلار قورى باسشىسىنىڭ ورىنباسارى اننا گيلەۆسكا (پولشا) جانە FactCheck.kz قازاق رەداكتسياسىنىڭ باس رەداكتورى دۋمان سماقوۆ وزدەرىنىڭ فەيكتارمەن كۇرەس تاجىريبەسىمەن ءبولىسىپ, اقپاراتتى جاريالار الدىندا ونى تەكسەرۋدىڭ قانشالىقتى ماڭىزدى ەكەندىگىن ءتۇسىندىردى.
ترەنينگ اياسىندا فاكتچەكينگتىڭ قۇرالدارى مەن ءادىسنامالارى, جاڭالىقتى دايىنداۋ بارىسىندا اقپاراتتىڭ تۇپدەرەگى مەن تسيفرلى تەحنولوگيانى تەكسەرۋ, تەكسەرىلگەن اقپاراتتى ۆيزۋالداۋ, حالىقارالىق جاڭالىقتاردى تاراتۋ مەن اقپاراتتىڭ تۇپدەرەگىن ءارتاراپتاندىرۋ سىندى سۇراقتارعا جاۋاپ بەرىلدى. ترەنينگ-كونسۋلتاتسيالار اعىلشىن جانە قازاق تىلدەرىندە بولدى.
2 جىلدىق جوبا اياسىندا مۇنداي ترەنينگ-كونسۋلتاتسيالارعا 100-دەن اسا جۋرناليست قاتىستى. الماتىدا «7 كۇن» جانە «جاس وركەن» رەداكتسيالارىندا قازاق تىلىندە جانە كۋرسيۆ.kz, Holanews.kz, Sputnik, Tengrinews, Zakon.kz, ينفورمبيۋرو رەداكتسيالارىندا ورىس تىلىندە ءدال وسىنداي ترەنينگتەر ءوتتى.
كەڭەستەن بولەك, حالىقارالىق ( ۇلىبريتانيا, نيدەرلاندى, گرۋزيا, پولشا) جانە Factcheck.kz (قازاقستان) ترەنەرلەرى فاكتچەكينگ جانە حالىقارالىق جاڭالىقتاردى تاراتۋ بويىنشا جۋرناليستەرگە, ستۋدەنتتەرگە جانە جوو وقىتۋشىلارىنا ەكى-ءۇش كۇندىك ترەنينگتەر مەن ماستەر-كلاسستار وتكىزىپ تۇرادى. قازىرگى كۇنگە دەيىن 300-گە جۋىق قاتىسۋشى فاكتچەكينگ تۋرالى جالپىلاما مالىمەت الدى.
ترەنينگتەر قازاقستانداعى «MediaNet حالىقارالىق جۋرناليستيكا ورتالىعى» مەن Albany Associates International جانە IREX Europe بىرلەسە وتىرىپ جۇزەگە اسىرىپ وتىرعان ايماقتىق جوبا اياسىندا ۇيىمداستىرىلدى.
ورتا ازيا جۋرناليستيكاسىنداعى جاڭالىقتاردىڭ ساپاسىن جانە باق-تىڭ ساۋاتتىلىعىن ارتتىرۋ ماقساتىندا جۇزەگە اسىپ جاتقان جوباعا استاناداعى ۇلىبريتانيا ەلشىلىگى قولداۋ كورسەتەدى.