«سنپس-اقتوبەمۇنايگاز» اق باس ديرەكتورى بولىپ ۆەي يۋيسيان تاعايىندالدى دەپ حابارلايدى اقتوبە وبلىسى اكىمىنىڭ ءباسپاسوز قىزمەتى. جاڭا باسشىنى كومپانيا ۇجىمىنا 6 قاراشا, سەيسەنبى كۇنى وبلىس اكىمى بەردىبەك ساپارباەۆ پەن «سنپس ينتەرناتسيونال» كومپانياسىنىڭ قازاقستانداعى باس ديرەكتورى بيان دىجى تانىستىردى.
ءوڭىر باسشىسى جاڭا باس ديرەكتوردىڭ الدىنا مۇناي مەن گاز ءوندىرۋ كولەمىنىڭ تومەندەۋىنە جول بەرمەۋ, ينۆەستيتسيا تارتۋ, تاۋار, جۇمىس پەن قىزمەتتەردى ساتىپ الۋدىڭ جەرگىلىكتى مازمۇنداعى ۇلەسىن ۇلعايتۋ, قاتارداعى جۇمىسشىلاردىڭ ەڭبەكاقىسىن ءوسىرۋ, قازاقستاندىق مامانداردى وقىتۋ, كەلىسىمشارتتىق مىندەتتەردى تولىق ورىنداۋ بويىنشا بىرقاتار مىندەتتەر قويدى.
سونداي-اق, وبلىس اكىمى بيزنەستىڭ الەۋمەتتىك جاۋاپكەرشىلىگى اياسىندا بەلسەندى ىنتىماقتاستىقتى جالعاستىرۋ قاجەتتىگىن اتاپ ءوتتى.
- كومپانيانىڭ بۇرىنعى باس ديرەكتورى ۆان تسزيۋنجەن باسشىلىق ەتكەن جىلدارى ىشىندە بيزنەستىڭ الەۋمەتتىك جاۋاپكەرشىلىگى بويىنشا ۇلكەن جۇمىستار اتقارىلدى. دەمەۋشىلىك كومەككە 12,7 ميلليارد تەڭگەدەن اسا قاراجات اۋدارىلدى. تەك وبلىس اۋماعىندا عانا ەمەس, ودان تىسقارى جەرلەردە دە الەۋمەتتىك ماڭىزى بار نىساندار سالىندى. اقتوبەدە قۇنى 1,5 ملرد تەڭگە تۇراتىن ونەر ورتالىعى سالىندى, سونىمەن قاتار, كومپانيا ءىت-ورتالىقتىڭ قۇرىلىسىن قارجىلاندىرىپ وتىر, استاناداعى «الەم قابىرعاسى» مونۋمەنتى مەن قازاق ۇلتتىق حورەوگرافيا اكادەمياسىنىڭ قۇرىلىسىن ۇلەسكەرلىك قارجىلاندىرۋعا قاتىستى. كومپانيا الەۋمەتتىك-باعدارلىق قىزمەتىن ءارى قاراي كەڭىتەدى دەپ كۇتىپ وتىرمىز, -دەپ اتاپ ءوتتى بەردىبەك ساپارباەۆ.
قوسا كەتەيىك, «سنپس-اقتوبەمۇنايگاز» اق-دا اقتوبە وبلىسىنىڭ اۋماعىندا وندىرىلگەن 67%-عا جۋىق مۇناي مەن 88% گاز بار. كومپانيانىڭ قازاقستاننىڭ مۇناي نارىعىنداعى ۇلەسى 7,7% قۇرايدى, اكتسيونەرلىك قوعام كومىرسۋتەكتى شيكىزات ءوندىرۋ كولەمى جاعىنان قازاقستاننىڭ جەتەكشى مۇناي-گاز وپەراتورلارىنىڭ بەستىگىندە.