ەلباسى جولداۋىن ىسكە اسىرۋ اياسىندا «ورلەۋ» بىلىكتىلىكتى ارتتىرۋ ۇلتتىق ورتالىعى» اعىمداعى جىلعى 1 ماۋسىمدا جاريالاعان «پەداگوگيكالىق يدەيالار پانوراماسى» رەسپۋبليكالىق كونكۋرسىنىڭ وڭىرلىك كەزەڭى جۇمىسىن قورىتىندىلاپ, جەڭىمپازدارىن انىقتادى.
بىرىڭعاي اقپاراتتىق-ءبىلىم كەڭىستىگىندە زاماناۋي پەداگوگيكالىق تاجىريبەنى جيناقتاۋ جانە ناسيحاتتاۋ, پەداگوگتاردىڭ اقپاراتتىق-كوممۋنيكاتسيالىق جانە تەحنولوگيالىق قۇزىرەتتىلىكتەرىن ارتتىرۋ ماقساتىندا 22 نوميناتسيا بويىنشا ۇيىمداستىرىلعان كونكۋرس مەكتەپكە دەيىنگى, ورتا, قوسىمشا, تەحنيكالىق جانە كاسىپتىك ءبىلىم بەرۋ مەكەمەلەرىن قامتىدى. كونكۋرستىڭ ەرەجەسىنە سايكەس بەينەدارىس, بەينەساباقتار, پراكتيكالىق-لابوراتوريالىق جۇمىستار ءۇش تىلدە (قازاق, ورىس, اعىلشىن) قابىلداندى. كونكۋرستىڭ وڭىرلىك كەزەڭىنە ۇسىنىلعان 115 مۇعالىمنىڭ جۇمىسى ادىلقازىلار القاسىنىڭ ساراپتاۋىنان ءوتتى.
ادىلقازىلار القاسى بەينە-ساباقتاردا وقۋشىلاردىڭ بەلسەندىلىگى, كوپ بىلسەم دەگەن قۇمارلىعى, ولاردىڭ ىزدەنىمپازدىعىنا كوڭىل ءبولدى. ساباقتى جاڭاشىلدىقپەن وتكىزىپ, شاكىرتىنىڭ ءبىلىم, بىلىك داعدىسىن قالىپتاستىرۋدا ۇتىمدى ارەكەتتەر جاساۋعا ۇمتىلعان مۇعالىمدەردىڭ كونكۋرسقا ۇسىنعان ەڭبەكتەرى ەلەۋسىز قالعان جوق. 61 مۇعالىمگە سەرتيفيكات تاپسىرىلدى. 22 نوميناتسيا بويىنشا جۇلدەلى ورىنداردى يەلەنگەن 54 مۇعالىمدى «ورلەۋ» باۇو» اق فيليالى الماتى قالاسى بويىنشا پق باي ديرەكتورى, پەداگوگيكا عىلىمىنىڭ دوكتورى رايسا سادۆاكاسوۆا سالتاناتتى جاعدايدا قۇتتىقتاپ, كونكۋرستىڭ رەسپۋبليكالىق كەزەڭىندە جەڭىس تۇعىرىنان كورىنۋلەرىنە ىزگى تىلەگىن ءبىلدىردى.
قالالىق كونكۋرستا جۇلدەلى ورىندى يەلەنگەن مۇعالىمدەر رەسپۋبليكالىق سايىسقا قاتىسىپ, ونلاين-رەجيمدە داۋىس جينايتىن بولادى. كاسىبي شەبەرلىگى سىنعا تۇسەتىن جارىس دوداسىندا ۇستازدارىمىز جۇلدەگەر بولاتىنى ءسوزسىز.
ەلۆيرا سەرىكقىزى,
«ەگەمەن قازاقستان»
الماتى