اقتاۋ قالاسىنداعى نازارباەۆ زياتكەرلىك مەكتەبىنىڭ مۇعالىمدەرى مەن پەداگوگيكالىق شەبەرلىك ورتالىعىنىڭ ترەنەرلەرى 31 قازان كۇنى جاڭاوزەن قالاسىنداعى جالپى ءبىلىم بەرۋ مەكتەپتەرىنىڭ مۇعالىمدەرىنە «جاڭارتىلعان ءبىلىم مازمۇنىن ەنگىزۋ جاعدايىندا سارالاپ وقىتۋ مەن كريتەريالدى باعالاۋدى ۇيىمداستىرۋدىڭ ءتيىمدى ءادىس-تاسىلدەرى» تاقىرىبىندا سەمينار وتكىزدى.
جاڭاوزەن مەكتەپ-گيمنازياسىنىڭ بازاسىندا وتكىزىلگەن تاجىريبە ءبولىسۋ شاراسىنا قالاداعى 24 مەكتەپتىڭ ۇستازدارى مەن باسشىلىعى, مەكتەپ كوورديناتورلارى, كىتاپحاناشىلارى قاتىستى. زياتكەرلىك مەكتەپتىڭ ۇستازدارى وقۋشىلارعا كاسىبي باعدار بەرۋ, سارالاپ وقىتۋ ادىستەرى, بالانىڭ تۇلعالىق ءوسۋى مەن تاربيەلەۋ, كريتەريالدى باعالاۋ, كىتاپ وقۋعا باۋلۋ جانە ت.ب تۋراسىندا اتقارعان جۇمىستارىمەن ءبولىستى.
كەزدەسۋ پلەنارلى وتىرىستان باستالدى. زياتكەرلىك مەكتەپ ديرەكتورى ە.پايزوۆ ءسوز الىپ, زياتكەرلىك مەكتەپتىڭ تاجىريبەسىن وزگە مەكتەپتەرگە تاراتۋ جۇمىستارى تۋرالى تولىق ماعلۇمات بەردى. سونداي-اق, جاڭاوزەن مەكتەپ-گيمنازياسى مەن №22, 23 جالپى ءبىلىم بەرۋ مەكتەپتەرىنىڭ كىتاپحاناسىنا «Bookcrossing» شاراسى اياسىندا كىتاپتار سىيلادى. كەيىن پەداگوگيكالىق شەبەرلىك ورتالىعىنىڭ ديرەكتورى ق.بورانباەۆا مۇعالىمدەردىڭ شەبەرلىگىن شىڭداۋعا قاتىستى اتقارىلعان جۇمىستار جايلى بايانداپ, زالدا جاڭارتىلعان ءبىلىم بەرۋ باعدارلاماسىنا كوشۋدە تۋىنداعان ساۋالدارعا جاۋاپ بەردى.
سەمينار التى سەكتسيا بويىنشا جۇمىس ىستەدى. مەكتەپ ديرەكتورلارىنىڭ باسىن قوسقان «ۇجىمدى باسقارۋ: كوشباسشىلىق جانە كوماندالىق جۇمىس» سەكتسياسىندا كاسىپتىك باعدار بەرۋ جۇمىستارى بويىنشا كەڭەسشى س.الدابەرگەنوۆا كاسىبي باعدار جۇمىستارىن ۇيىمداستىرۋ تۋرالى ايتسا, زياتكەرلىك مەكتەپ ديرەكتورى ە.پايزوۆ ءبىلىم ورداسىنىڭ ميسسياسىن, ۇرانىن, ۇستانىمىن انىقتاۋ ماڭىزدىلىعى جانە جاھاندىق ازاماتتىق تۇسىنىگىن ەنگىزۋ تۋرالى بايانداپ, ءبىلىم ورداسىندا بۇل تۇرعىدا اتقارىلعان جۇمىستاردى كورسەتتى.
-بۇگىنگى سەميناردا ماعان جاڭالىق بولعان نازارباەۆ زياتكەرلىك مەكتەبىنىڭ وقۋشىعا كاسىپتىك باعدار بەرۋ جۇمىسى. بۇل ماعان وتە ۇنادى جانە مەن الداعى ۋاقىتتا ءوز مەكتەبىمە ەنگىزەمىن دەگەن شەشىم قابىلدادىم. زياتكەرلىك مەكتەپتىڭ كاسىپتىك باعدار بەرۋ جۇمىسى بويىنشا كەڭەسشىسىمەن تىعىز بايلانىستا جۇمىس جاسايمىن دەگەن ۇمىتتەمىن, دەيدى جاڭاوزەندەگى №19 مەكتەپتىڭ ديرەكتورى ك.جۇگەنباەۆا.
«مۇعالىمنىڭ كاسىبي دامۋى – ساپالى ءبىلىم نەگىزى» سەكتسياسىندا قازاق ءتىلى ءپانى مۇعالىمى ج.ماۋىتوۆا مەن مەكتەپ ديرەكتورىنىڭ عىلىمي-ادىستەمەلىك جۇمىستار جونىندەگى ورىنباسارى ب.جاقسىلىقوۆا جاڭاوزەندەگى مەكتەپ ديرەكتورىنىڭ عىلىمي-ادىستەمەلىك, يننوۆاتسيالىق جۇمىستار جونىندەگى ورىنباسارلارىنا مۇعالىم كوشباسشىلىعى ارقىلى مۇعالىمنىڭ كاسىبي دامۋىنا ىقپال ەتۋ جولدارىمەن ءبولىستى. ال جاھاندىق پەرسپەكتيۆالار مەن جوبالىق جۇمىس ءپانى مۇعالىمى گ.سۇيىندىكوۆا ۇستازدار اراسىندا وزەكتىلىگىن جويماعان ءىس-ارەكەتتەگى جانە ساباقتى زەرتتەۋ تاجىريبەسى مەن ءادىس-تاسىلدەرى جايلى ايتتى.
بيىلعى جىلدىڭ 25-26 قازان كۇندەرى استانا قالاسىندا وتكەن ح «جاڭا ءداۋىردىڭ مەكتەبى» عىلىمي-تاجىريبەلىك كونفەرەنتسياسىندا الەمنىڭ 24 ەلىنەن جينالعان ءبىلىم ساراپشىلارى بالانى تاربيەلەۋ جۇمىستارى جايىندا ماسەلە كوتەرىپ ونى مەكتەپتە جۇيەلەۋ تۋرالى, بالانى مەكتەپ اياسىندا تاربيەلەۋ وزەكتىلىگىن جويماعانىن ايتقان ەدى. بۇل تۇرعىدا زياتكەرلىك مەكتەپتىڭ تاربيە بەرۋ جۇمىستارى وزگە مەكتەپتەرگە ۇلگى رەتىندە تاراتىلۋدا. ماسەلەن, مەكتەپ ديرەكتورىنىڭ تاربيە جۇمىستارى جونىندەگى ورىنباسارى ا.يحسانوۆا مەن مەكتەپ كۋراتورلارى «ماڭگىلىك ەل» ۇلتتىق يدەياسى مەن «رۋحاني جاڭعىرۋ» باعدارلاماسىن جۇزەگە اسىرۋ ارقىلى مەكتەپتەگى تاربيە جۇمىسىن ۇيىمداستىرۋ» سەكتسياسىندا بالا جانە اتا-انامەن جۇمىس تۋرالى ايتىپ, اتا-انانى مەكتەپپەن بىرگە جۇمىس ىستەۋگە بەت بۇرعىزۋ ادىستەرى جايلى ايتتى. بالاعا ءبىلىم بەرۋدەگى ماڭىزىن جويماعان تاعى ءبىر ماسەلە – وقۋشىنى كىتاپ وقۋعا مەكتەپ قابىرعاسىندا باۋلۋ. سەميناردا بۇعان قاتىستى «وقۋشىلاردا كىتاپ وقۋ مادەنيەتىن قالىپتاستىرۋدىڭ بەلسەندى ادىستەرى» سەكتسياسى ۇيىمداستىرىلدى. مەكتەپ كىتاپحاناشىسى ج.باحيتوۆا بالاعا «كىتاپ دجەمى» جانە ەرتەگىلەر مەن شىعارما نەگىزىندە «3D كىتاپ جاساۋدى» 20-دان اسا كىتاپحاناشىعا كورسەتتى, بىرىگىپ كىتاپ جاسادى. كىتاپحاناشىلار مۇنداي شارالاردىڭ بالالاردى كىتاپ وقۋعا راسىمەن باۋليتىندىعىن ايتىپ, پىكىرلەرىمەن ءبولىستى.
ديرەكتوردىڭ بەيىندى-ەكسپەريمەنتالدىق جۇمىستار بويىنشا ورىنباسارى ى. يمامباەۆانىڭ جەتەكشىلىگىمەن «كريتەريالدى باعالاۋ جۇيەسىن ەنگىزۋ پروتسەسىن باسقارۋ» سەكتسياسى ءوتتى. مەكتەپ كوورديناتورلارىنا پەداگوگيكالىق شەبەرلىك ورتالىعىنىڭ ترەنەرلەرى جاڭارتىلعان ءبىلىم مازمۇنى جاعدايىندا وقۋشىلاردى جيىنتىق باعالاۋدىڭ ەرەكشەلىكتەرى تۋرالى باياندادى.
كوپتەگەن ءپان مۇعالىمدەرىنە قىزىقتى بولعان سەكتسيا - «جاڭارتىلعان ءبىلىم مازمۇنى بويىنشا وقىتۋ ەرەكشەلىكتەرى». بۇل سەكتسيا بويىنشا 200-دەن اسا ۇستاز زياتكەرلىك مەكتەپتەگى ءپان مۇعالىمدەرىنە جاڭا ءبىلىم مازمۇنىنا قاتىستى قىزىقتى ءادىس-تاسىلدەردى ەستىدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى