الماتىدا ايگىلى مانەرلەپ سىرعاناۋشى, وليمپيادا ويىندارىنىڭ جۇلدەگەرى دەنيس تەننىڭ قۇرمەتىنە ەسكەرتكىش تاقتا ورناتىلدى. داڭقتى سپورتشىنىڭ جارقىن بەينەسىن الدىڭا اكەلەتىن تاقتا دەنيس تەننىڭ كوزى تىرىسىندە تۇرعان ءۇيىنىڭ قابىرعاسىنان ورىن العان.
ەسكەرتكىش تاقتانىڭ اشىلۋ راسىمىنە جارق ەتىپ سونگەن جاۋقازىن عۇمىردىڭ ونەرى مەن داڭقتى جولىن ايرىقشا باعالايتىن الماتىلىقتار مەن بەلگىلى سپورتشىلار جينالدى. ولاردىڭ ساپىندا الەمدىك ارەنادا توپ جارعان تالاي سپورتشىلاردىڭ توماعاسىن سىپىرعان باپكەر تاتيانا تاراسوۆا مەن رەسەيلىك مانەرلەپ سىرعاناۋشى ەلەنا راديونوۆا سىندى تانىمال تۇلعالار بولدى.
«دەنيس تەن – ۇلى ادام. ونىڭ ونەرىن تاماشالاعان ميلليونداعان ادام كارتادان قازاقستاندى ىزدەدى. دەنيس ارقىلى قازاقستاندى تانىدى. ونىمەن جۇمىس ىستەگەن مەن باقىتتىمىن. ول بالاڭ جاسىنان ەرەكشەلىگىمەن كوزگە تۇسكەن ۇزدىك سپورتشى بولاتىن», دەيدى تاتيانا تاراسوۆا.
نەبارى 25 جىل عۇمىر كەشكەن دەنيس تەن جاھان سپورت تاريحىندا وشپەس ءىز قالدىرعانى داۋسىز. بۇل كۇندەرى الەمنىڭ ءار قيىرىندا اتاقتى مانەرلەپ سىرعاناۋشىنى ەسكە الۋعا ارنالعان شارالار ۇزدىكسىز ۇيىمداستىرىلۋدا.
ارمان وكتيابر,
«ەگەمەن قازاقستان»
الماتى