اشىققاندى تويىندىرۋ ۇلكەن ساۋاپتى ءىس سانالادى. الماتىدا تۇرمىسى تومەن تۇرعىنداردى تەگىن تاماقتاندىرۋعا ارنالعان اسحانا اشىلدى.
اپتانىڭ بەس كۇنىندە تارىققاندار ءۇشىن ەسىگى ايقارا اشىق بولاتىن تاماقتانۋ ورتالىعى جومارت جانداردىڭ مۇرىندىق بولۋىمەن, سونداي-اق الماتى قالاسى ورتالىق مەشىتىنىڭ قولداۋىمەن اشىلعان. ازىرگە اسحانا كۇنىنە 120 كىسىنى قابىلداپ, 3 مەزگىل تاماقتاندىرۋعا قاۋقارلى. مۇقتاج جاندار مۇندا كەلۋى ءۇشىن ورتالىق مەشىتتىڭ جانىنداعى «ىقىلاس» قايىرىمدىلىق قاۋىمداستىعىنان ارنايى تالون الۋى قاجەت.
«الماتى ورتالىق مەشىتىنىڭ ۇيىمداستىرۋىمەن «ۋاقىپ» اسحاناسىن اشۋدى ءجون كوردىك. ءبىر عانا دەمەۋشى كىسى كەلىپ, ءوزىنىڭ اتى-ءجونىن ايتۋدى قۇپ كورمەدى. تالون قارنى اش, بىراق ىستىق تاماق ىشۋگە مۇمكىندىگى جوق كەز-كەلگەن جاعدايى تومەن وتباسىعا بەرىلەدى» دەيدى الماتى قالاسى ورتالىق مەشىتىنىڭ نايب يمامى ەرمەك كوكىرەكباەۆ.
تەگىن اسحانا شاھارداعى سەيفۋللين داڭعىلى مەن راديششەۆ كوشەسىنىڭ قيىلىسىندا ورىن تەپكەن. مۇندا ءبىر مارتە اۋقاتتانعان ادام سول كۇنى قايتا كەلىپ تاماقتانۋىنا دا بولادى. تەك قولىندا تالونى بولۋى شارت.
ارمان وكتيابر,
«ەگەمەن قازاقستان»
الماتى