ايتۋلى باسەكە داڭقتى بالۋان, ابزال ازامات, كسرو سپورت شەبەرى ءۋاليحان نۇركەەۆتىڭ قۇرمەتىنە ارنالدى.
ءتۋرنيردىڭ اشىلۋ سالتاناتىندا تۋريزم جانە سپورت باسقارماسىنىڭ باسشىسى رۋسلان ەسەنالين, وبلىستىڭ قۇرمەتتى ازاماتى جامبىل تاسەمەنوۆ, جان جارى باعيلا تولەنتايقىزى, تاعى باسقالارى سويلەپ, مارقۇمنىڭ جاقسى قاسيەتتەرىن ەسكە الدى. ول وڭىردە سپورتتىڭ, ونىڭ ىشىندە كۇرەستىڭ دامۋىنا ۇلكەن ەڭبەك ءسىڭىردى. تالاي بايراقتى باسەكەلەردە توپ جاردى. «سپارتاك» ەرىكتى سپورت قوعامىنا جەتەكشىلىك ەتتى. «جىگەر» سپورت كلۋبىن قۇرۋعا تىكەلەي اتسالىستى. ونىڭ جولىن قۋعان شاكىرتتەرى ۇستاز اتىنا كىر كەلتىرمەدى. ءتىرى بولسا, جەتپىس جاسىن تويلاپ, توردە توبە بي بولىپ وتىرار ەدى.
قىرعىزستاننان, رەسەيدەن جانە قازاقستاننىڭ ءار قيىرىنان جينالعان ەكى جۇزگە جۋىق گرەك-ريم كۇرەسىنىڭ بالعىن بالۋاندارى بوز كىلەمدە جاسىنداي جارقىلداپ, ەڭ مىقتىلارى جەڭىمپاز اتاندى. جاستارىنىڭ كىشىلىگىنە قاراماستان نەبىر ايلا-تاسىلدەردى قولدانىپ, شەبەرلىكتەرىن كورسەتە ءبىلدى.
ء«ۋاليحان سەكىلدى مارقاسقا ازاماتتى ەسكە الۋ ءتۋرنيرى 2011 جىلدان بەرى تۇراقتى تۇردە وتكىزىلىپ كەلەدى. رەسەيدىڭ سۋرگۋت, پەتۋحوۆو قالالارىنان كوماندالار جىلدا قاتىسادى», دەيدى جارىستىڭ باس تورەشىسى مەيرام حامزين.
26 كيلو سالماقتا بەلدەسكەن ءنوۆوسىبىر قالاسىنىڭ وكىلى ميحايل وپريش اقتىق سايىسقا دەيىن القىنباي جەتكەنىمەن, ونىڭ جولىن قىرعىزستاننىڭ جاس قىرانى ادىلەت اسانقۇلوۆ بوگەدى. 29 كيلو سالماقتا تۇركىستاندىق ەراسىل مۇسا جەڭىستىڭ ەڭ بيىك تۇعىرىنا كوتەرىلدى. رەسەيلىكتەر 4 التىن جۇلدەنى قانجىعاعا بايلادى.
بارلىق قاتىسۋشىلارعا ماراپات ديپلومدارى, ەسكەرتكىش سىيلىقتار جانە ۋ. نۇركەەۆتىڭ بەينەسى سالىنعان توسبەلگىلەر تارتۋ ەتىلدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى