بۇل تۋرالى شىعىس قازاقستان وبلىسىنىڭ پروكۋراتۋراسى حابارلادى. پروكۋراتۋرانىڭ ءباسپاسوز قىزمەتىنىڭ تاراتقان مالىمەتتەرىنە سۇيەنسەك, وبلىس پروكۋراتۋراسى وڭىردەگى كوللەدجدەرىڭ قىزمەتىنە تەكسەرۋ جۇرگىزىپ, كوپتەگەن زاڭ بۇزۋشىلىقتار مەن بيۋدجەتتىك قاراجاتتى ماقساتسىز جۇمساۋ فاكتىلەرىن انىقتاعان.
اتاپ ايتقاندا, مەملەكەتتىك تاپسىرىستى ورنالاستىرۋ كەزىندە كونكۋرستىق راسىمدەردى ساقتاماۋ, ستۋدەنتتەردى جالعان وقىتۋ, گرانتتاردى زاڭسىز تاعايىنداۋ, وقىتۋشىلاردىڭ بىلىكتىلىك تالاپتارىنا ساي كەلمەۋى, ستۋدەنتتەردى جاتاقحانالارمەن قامتاماسىز ەتپەۋ, سونداي-اق, مەملەكەتتىك م ۇلىكتى زاڭسىز جالعا بەرۋدەن تابىس الۋ فاكتىلەرى انىقتالعان. «جۇمىس ورنىمەن قامتىلعان تۇلەكتەردىڭ سانى تۋرالى مالىمەتتەردى جاساندى تۇردە ارتتىرۋ ارقىلى جالعانداۋ, سونداي-اق, وقۋ ورىندارىنىڭ اكىمشىلىگىمەن تۇلەكتەردىڭ جۇمىسپەن قامتىلۋىنا كومەك كورسەتپەۋى ءجيى ورىن العان.
مەملەكەتتىك ءبىلىم بەرۋ تاپسىرىسىن ورنالاستىرۋ ەرەجەلەرى بۇزىلىپ, ناقتى ايتقاندا, باسقا جەرلەردەن كەلگەن ستۋدەنتتەر جاتاقحانالارمەن قامتاماسىز ەتىلمەگەنىنە قاراماستان, وبلىستىڭ ءبىلىم بەرۋ باسقارماسى جىل سايىن سەمەي قالاسىنىڭ بيزنەس جانە سەرۆيس كوللەدجىنە, اياگوز قالاسىنداعى پوليتەحنيكالىق كوللەدجىنە جانە وسكەمەن قالاسىنداعى ەكى كوللەدجگە گرانتتار بەرگەن. سونداي-اق, كوللەدج اكىمشىلىكتەرى ستۋدەنتتەردىڭ جاتاقحانادا تۇرۋ باعاسىنا مەملەكەتتىك تاپسىرىس بويىنشا كەلىسىمشارتتىڭ جالپى سوماسىنا ەنگەن كوممۋنالدىق قىزمەتتەر ءۇشىن شىعىنداردى ەنگىزگەن, جاتاقحانالارداعى بولمەلەردى ءۇشىنشى تۇلعالارعا جالعا بەرگەن.
كۇرشىم كوللەدجىندە 12 ستۋدەنتتى جالعان وقىتقان. وقىتۋشىلار مەن وندىرىستىك وقىتۋ شەبەرلەرى وقۋ ساباقتارىن وتكىزۋ كەزىندە تەوريالىق جانە پراكتيكالىق وقۋ جۋرنالدارىندا وسى ستۋدەنتتەرگە باعا قويعان, ولاردى ارالىق اتتەستاتتاۋعا جىبەرگەن, كۋرستان كۋرستارعا كوشىرگەن. بۇدان دا باسقا, وسى ستۋدەنتتەرگە ستيپەنديا تولەنىپ, مەملەكەتكە كەلتىرىلگەن زالالدىڭ جالپى سوماسى 8 ملن.تەڭگە قۇراعان. وسى فاكت بويىنشا سوتقا دەيىنگى تەرگەۋ جۇرگىزىلۋدە», - دەلىنگەن پروكۋراتۋرانىڭ ءباسپاسوز قىزمەتىنىڭ تاراتقان مالىمەتىندە.
سونىمەن قاتار كوللەدجدەردىڭ اۋماعىندا م ۇلىكتى جەكە ماقساتتارىندا زاڭسىز پايدالانۋ فاكتىلەرى دە انىقتالعان. مىسالى, وسكەمەندەگى حالىق ارتىستەرى اعايىندى ابدۋلليندەردىڭ اتىنداعى شىعىس قازاقستان وبلىستىق ونەر ۋچيليششەسىنىڭ اۋماعىندا ۇزاق ۋاقىت اقىلى اۆتوتۇراق ورنالاسقان. پروكۋروردىڭ ۇسىنىمى ەنگىزىلگەن سوڭ, اۆتوتۇراق جابىلىپ, ونىڭ ورنىندا سپورت الاڭشاسىن سالۋ جوسپارلانۋدا.
بارلىعى, تەكسەرۋ ناتيجەلەرى بويىنشا پروكۋرورلار 43 ملن.تەڭگەدان اساتىن زالالدى انىقتادى. قاداعالاۋ اكتىلەرى بويىنشا بۇگىنگى كۇنگە دەيىن 36 ملن.تەڭگە ءوندىرىلدى. تارتىپتىك جاۋاپتىلىققا 60 تۇلعا, اكىمشىلىك جاۋاپتىلىققا 4 تۇلعا تارتىلدى.
ازامات قاسىم,
«ەگەمەن قازاقستان»
شىعىس قازاقستان وبلىسى