پارلامەنت سەناتىندا ەلىمىزدىڭ كەيبىر زاڭنامالىق اكتىلەرىنە تۇرعىن ءۇي قاتىناستارى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى قارالدى, دەپ حابارلايدى سەناتتىڭ ءباسپاسوز قىزمەتى.
پارلامەنت سەناتى حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى داريعا نازارباەۆا كەزدەسۋدى اشا كەلىپ, ەلىمىزدە ماقساتتى تۇرعىن ءۇي تولەمدەرى تەتىكتەرى بويىنشا العاش رەت اسكەري قىزمەتكەرلەردى تۇرعىن ۇيمەن قامتاماسىز ەتۋدىڭ جاڭا ۇلگىسى پايدا بولعانىن اتاپ ءوتتى.
اسكەري قىزمەتكەرلەر مەن ولاردىڭ وتباسىلارىن تۇرعىن ۇيمەن قامتاماسىز ەتۋدىڭ جاڭا تەتىكتەرى 2018 جىلعى 1 قاڭتاردان باستاپ ەنگىزىلدى جانە اسكەري قىزمەتكەرلەردىڭ ەڭبەك ەتكەن جىلدارىنا قاراماستان تۇرعىن ءۇي تولەمدەرىن بەرۋدى; اسكەري قالاشىقتاردا, شەكارا زاستاۆالارىندا جانە باسقا دا جابىق نىسانداردا ورنالاسقان قىزمەت ۇيلەرىمەن نەمەسە جاتاقحانالارمەن قامتاماسىز ەتىلگەن اسكەري قىزمەتشىلەرگە 50 پايىز تۇرعىن ءۇي تولەمدەرىن بەرۋدى; تۇرعىن ۇيگە مۇقتاج بولىپ تانىلعان اسكەري قىزمەتشىلەرگە بوساتىلعان كەزدە تۇرعىن ۇيمەن قامتاماسىز ەتىلمەگەن كەزەڭگە تۇرعىن ءۇي تولەمدەرىن بەرۋدى كوزدەيدى.
قارجى مينيسترلىگىنىڭ مالىمەتتەرى بويىنشا 2018 جىلى رەسپۋبليكالىق بيۋدجەتتە اسكەري قىزمەتشىلەر مەن قۇقىق قورعاۋ جانە ارناۋلى ورگاندار قىزمەتكەرلەرىن تۇرعىن ۇيمەن قامتاماسىز ەتۋگە 94 ميلليارد تەڭگە كوزدەلىپ وتىر. 2019-2021 جىلدارعا 340 ميللياردتان استام تەڭگە قاراستىرىلعان.
زاڭدى ىسكە اسىرعان ءبىرىنشى كەزەكتە تۇرعىن ءۇي قۇرىلىسى جيناق بانكىنىڭ جاردەمىمەن قارۋلى كۇشتەردىڭ 37 مىڭنان استام اسكەري قىزمەتكەرلەرى جەكە ەسەپ-شوت اشىپ, 30 ميللياردتان استام تەڭگە اۋدارىلدى.
سونىمەن بىرگە قورعانىس ءمينيسترىنىڭ ورىنباسارى تالعات جانجۇمەنوۆ تۇرعىن ءۇي زاڭناماسىنا ەنگىزىلگەن جاڭالىقتاردى قولدانۋ تاجىريبەسى ونى ودان ءارى جەتىلدىرۋدى قاجەت ەتىپ وتىرعانىن ايتتى.
اتاپ ايتقاندا, تۇرعىن ءۇي تولەمدەرىن ەسەپتەۋ ادىستەرىن قايتا قاراۋ ۇسىنىلىپ وتىر. قولدانىستاعى زاڭناماعا سايكەس, تۇرعىن ءۇي تولەمدەرىنىڭ كولەمى اسكەري قىزمەتكەر قىزمەت ەتىپ جاتقان ايماقتاعى تۇرعىن ءۇيدى جالعا الۋ قۇنىنا بايلانىستى بەلگىلەنەدى. بۇل ءادىس اسكەري قىزمەتشىنى تۇرعىن ۇيگە دەگەن قۇقىقتارىن تەڭدەي ىسكە اسىرۋ مۇمكىندىگىن بەرە المايدى. بۇل تۋرالى سەناتتىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ مۇشەلەرى بيىلعى قازان ايىندا شىعىس قازاقستان وبلىسىنداعى كوشپەلى وتىرىس بارىسىندا ايتىلعان بولاتىن.
ۇلتتىق ۇلاننىڭ باس قولباسشىسى رۋسلان جاقسىلىقوۆ قازىرگى تۇرعىن ءۇي تولەمدەرىن 11 975 اسكەري قىزمەتكەر الاتىنى تۋرالى حاباردار ەتتى. دەگەنمەن, نەسيەلىك قارىز 1 ملرد. 800 ملن. تەڭگەنى قۇرايدى, ونىڭ ىشىندە 778 ملن. تەڭگە تۇرعىن ءۇي تولەمدەرى بويىنشا; ءبىر جولعى تۇرعىن ءۇي تولەمدەرى مەن قايتارىمسىز جەكەشەلەندىرۋ قۇقىعىنا اقشالاي وتەماقىلار بويىنشا 1 ملرد. 19 ملن. تەڭگە بولىپ وتىر. نەسيە بويىنشا ۋاقىتىندا تولەمەۋ ايىپ پەن پەنياعا اكەلىپ سوعىپ, تۇرعىن ءۇي تولەماقىسىنىڭ كولەمىن قىسقارتۋدا.
سەناتورلار بۇل ماسەلەگە الاڭداۋشىلىق ءبىلدىردى. كوميتەت توراعاسى د.نازارباەۆا قارجى مينيسترلىگىنە بۇل ماسەلەنى پىسىقتاۋدى تاپسىردى. «اڭگىمە اسكەري قىزمەتكەرلەردىڭ جاۋىنگەرلىك رۋحى تۋرالى بولىپ وتىر. ونى اياقاستى ەتۋگە بولمايدى. تۇرعىن ءۇي ماسەلەلەرىنىڭ شەشىلۋى ءبىزدىڭ كوميتەتتىڭ نازارىندا بولادى», - دەدى ول.