پارلامەنت سەناتىنىڭ توراعاسى قاسىم-جومارت توقاەۆ استاناعا رەسمي ساپارمەن كەلگەن ەستونيانىڭ پرەمەر-ءمينيسترى يۋري راتاسپەن كەزدەستى.
ق.توقاەۆ قازاقستان مەن ەستونيا اراسىندا سىندارلى جانە سەنىمدى ۇنقاتىسۋ قالىپتاسقانىن اتاپ ءوتتى. ەكى ەل اراسىنداعى پارلامەنتارالىق بايلانىس قوس تاراپتىڭ قاتىناستارىنا جاڭا قارقىن بەرە الاتىنى ايتىلدى. سەنات توراعاسى ەستونيا پارلامەنتىمەن تىعىز بايلانىس ورناتۋعا مۇددەلى ەكەنىن جەتكىزىپ, قوس تاراپتىڭ زاڭ شىعارۋ ورگاندار دەلەگاتسيالارىنىڭ ەكى ەل ارالىق ساپارلارىن ۇيىمداستىرۋدى ۇسىندى.
كەزدەسۋ بارىسىندا ق.توقاەۆ قازاقستاننىڭ ساياسي ومىرىندە سەناتتىڭ الىپ وتىرعان ورنى مەن ستراتەگيالىق ماقساتتاردى ىسكە اسىرۋ جونىندەگى دەپۋتاتتاردىڭ جۇمىسى تۋرالى يۋ.راتاستى حاباردار ەتتى.
تاراپتار ساۋدا-ەكونوميكالىق جانە گۋمانيتارلىق ىنتىماقتاستىقتى تەرەڭدەتۋ مۇمكىندىگىن تالقىلادى. تسيفرلىق تەحنولوگيالار مەن كولىك-لوگيستيكا سالاسى سياقتى كەلەشەگى زور ءوزارا ءىس-قيمىل باعىتتارىنا ەرەكشە نازار اۋدارىلدى. ق.توقاەۆتىڭ ايتۋىنشا, قازاقستان ارقىلى وتەتىن, قىتاي مەن ازيانىڭ باسقا دا ەلدەرىن ەۋروپامەن بايلانىستىراتىن تەمىرجول مەن اۆتوكولىك باعىتتارىنىڭ مۇمكىندىكتەرى اۋقىمدى. «ۇلتتىق كولىك ينفراقۇرىلىمىن جاڭارتۋدا جانە ونى ۇلى جىبەك جولىنىڭ قىتاي تۇجىرىمداماسىمەن ۇيلەستىرۋدە قازاقستان ايماقتاعى جەتەكشى حابقا اينالىپ وتىر», - دەدى سەنات توراعاسى.