قىزىلوردا وبلىسى شيەلى اۋداندىق پروكۋراتۋراسى اۋداندىق امبۋلاتوريالىق اۋرۋحاناسىندا بىرقاتار زاڭسىزدىقتار ورىن العانىن انىقتادى, دەپ حابارلايدى اۋداندىق پروكۋراتۋرانىڭ ءباسپاسوز قىزمەتى.
بۇل كەلەڭسىز جاعداي ەمدەۋ ورنىن تەكسەرۋ بارىسىندا بەلگىلى بولعان. 2016-2018 جىلدار ارالىعىندا مۇعالىمدەر اتالمىش اۋرۋحانادا بىرقاتار دارىگەرلەردەن اقى تولەۋ ارقىلى تەكسەرۋدەن وتكەن ەكەن. اتاپ ايتقاندا, ۇستازدار تەراپەۆت, دەرماتوۆەنەرولوگ, گينەكولوگ سەكىلدى مەديتسينا ماماندارىنا اقىلى قارالعان. وبلىستىق پروكۋراتۋرانىڭ ءباسپاسوز حاتشىسى بوتاگوز سەيىلدىڭ ايتۋىنشا, زاڭ بويىنشا ول قىزمەتتەر تەگىن جۇرگىزىلۋى ءتيىس. پروكۋرورلىق قاداعالاۋ ناتيجەسىندە ۇستازدارعا 2,7 ملن تەڭگە كولەمىندەگى اقشا قايتارىلدى.