كۇي اتاسى قۇرمانعازى ساعىرباي ۇلىنا ارنالعان ۇلت-اسپاپتار وركەسترلەرىنىڭ حالىقارالىق فەستيۆالى باستالدى. قىرعىزستان, وزبەكستان, رەسەي مەملەكەتتەرىنەن جانە ەلىمىزدىڭ بارلىق ايماقتارىنان كەلگەن دومبىراشىلار الدىمەن وبلىس ورتالىعىنداعى قۇرمانعازى ەسكەرتكىشىنە بارىپ, گۇل شوقتارىن قويدى.
ونەر مەرەكەسىنە 15 وركەستر ۇجىمى قاتىسۋدا. شارا شىمىلدىعىن اتىراۋداعى دينا نۇرپەيىسوۆا اتىنداعى اكادەميالىق ۇلت اسپاپتار وركەسترى اشتى. ودان كەيىن ساحناعا كوتەرىلگەن كوكشەتاۋلىق ك.كۇمىسبەكوۆ اتىنداعى ۇلت اسپاپتار وركەسترى, اقتوبەلىك ا.جۇبانوۆ اتىنداعى ۇلت اسپاپتار وركەسترى, پاۆلوداردان كەلگەن ر.وماروۆ اتىنداعى ۇلت اسپاپتار وركەسترىنىڭ ونەرىن قىرعىزستاننان كەلگەن قوناقتار ء«مولمول» قومىزشىلار ءانسامبلى جالعادى. رەسەيدىڭ «سكيف» كۆارتەتى, اقتاۋ, قوستاناي, استانا قالالارىنان كەلگەن ونەر ۇجىمدارى دا قۇرمانعازى كۇيلەرىن ورىنداپ, كورەرمەن قوشەمەتىنە بولەندى.
وزبەكستاننىڭ «سوگديانا» حالىق اسپاپتار وركەسترى, اتىراۋلىق «نارىن», الماتىدان كەلگەن قۇرمانعازى اتىنداعى مەملەكەتتىك اكادەميالىق ۇلت اسپاپتار وركەسترى فەستيۆالدىڭ ەكىنشى كۇنىندە ونەر كورسەتىپ, جايىق جاعاسىندا قۇدىرەتتى كۇي ونەرى سالتانات قۇردى. بۇل قاتاردا تالدىقورعاندىق م.تولەباەۆ اتىنداعى, ورالدىق داۋلەتكەرەي اتىنداعى, قىزىلوردالىق تۇرماعامبەت اتىنداعى حالىق اسپاپتارى وركەسترلەرى دە بار.
حالىقارالىق فەستيۆالگە قاتىسۋشى وركەسترلەردىڭ شەرۋى جانە ماراپاتتاۋ سالتاناتى ەرتەڭ, 24 قازاندا ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ «جايىق» سپورت-مادەني كەشەنىندە وتەدى.
استانا قالاسى مەملەكەتتىك اكادەميالىق فيلارمونياسى قازاق وركەسترىنىڭ كوركەمدىك جەتەكشىسى, اتىراۋ وبلىسىنىڭ قۇرمەتتى ازاماتى ايتقالي جايىموۆ: «اتىراۋ توپىراعىندا دومبىرا ۇستاعان دۇلدۇلدەردىڭ باس قوسۋى – قۇرمانعازى بابامىزدىڭ ۇلىلىعىنا قۇرمەت. دومبىراشىلار قاي جەردە باس قوسسا دا, قۇرمانعازىنىڭ كۇيى كۇمبىرلەيدى. بۇل دا ونەر قۇدىرەتى», - دەيدى.
باقىتگۇل باباش,
«ەگەمەن قازاقستان».
اتىراۋ