بۇگىن قر ۇكىمەتىنىڭ وتىرىسىندا ينۆەستيتسيالاردى تارتۋ ماسەلەسىن قاراۋ قورىتىندىسى بويىنشا پرەمەر-مينيستر باقىتجان ساعىنتاەۆ ينۆەستيتسيالىق احۋالدى ودان ءارى جاقسارتۋ جانە ەل ەكونوميكاسىنا تارتىلاتىن شەتەلدىك ينۆەستيتسيالاردىڭ كولەمىن ۇلعايتۋ جونىندە بىرقاتار ناقتى تاپسىرمالار بەردى.
وسى جىلدىڭ 9 ايىنىڭ قورىتىندىسى بويىنشا ينۆەستيتسيالار تارتۋدىڭ بارلىق ءتۇيىندى كورسەتكىشتەرى ءوستى. جاڭا كاسىپورىندار مەن جاڭا جۇمىس ورىندارى قۇرىلۋدا. ينۆەستورلارعا بارلىق دەڭگەيلەردە مەملەكەتتىك قولداۋ شارالارى كورسەتىلۋدە. ينۆەستيتسيالار تارتۋدىڭ جاڭا تاسىلدەرى ەنگىزىلىپ جاتىر. دەگەنمەن, پرەمەر-مينيستر قوسىمشا جۇمىستاردىڭ ورىندالۋىن تالاپ ەتەتىن بىرقاتار اسپەكتىگە نازار اۋداردى.
ءبىرىنشى. ينۆەستورلارمەن جۇمىس ىستەۋ ءۇشىن اكىمدەردىڭ ارنايى ورىنباسارلارى تاعايىندالدى, ءار وڭىردە Kazakh Invest وكىلدەرى مەن ينۆەستورلارعا قىزمەت كورسەتۋ ورتالىقتارى بار, وڭىرلىك ينۆەستيتسيالىق شتابتار قۇرىلدى. وسىلايشا, وڭىرلەردە ينۆەستورلاردى تارتۋ ءۇشىن ءتيىمدى جۇمىس ىستەۋگە بارلىق جاعدايلار جاسالعان. وبلىستاردىڭ اكىمدەرىنە بارلىق شتابتىڭ جۇمىسىن ۇيلەستىرۋ جانە ءوزارا ءىس-قيمىلدى كۇشەيتۋ تاپسىرىلدى.
ينۆەستيتسيالار جانە دامۋ مينيسترلىگىنىڭ دەرەكتەرىنە سايكەس, 2005–2017 جىلدار ارالىعىندا ەلىمىزگە $264 تىكەلەي شەتەلدىك ينۆەستيتسيالار تارتىلعان. الايدا, ينۆەستيتسيالاردىڭ كولەمى جەكە قاراجاتتاردى تارتۋ جۇمىستارىن كورسەتپەيدى. جالپى, شىمكەنتتە ينۆەستيتسيالار 275%-عا وسكەن, ال جەكە قارجى ۇلەسى تەك 65%-دى قۇرايدى. وسىنداي جاعداي سولتۇستىك قازاقستان, اقتوبە, قىزىلوردا وبلىستارىندا, استانا قالاسىندا بەلگىلەنگەن. وسىعان وراي پرەمەر-مينيستر باقىتجان ساعىنتاەۆ اكىمدەردىڭ نازارىن جەكە ينۆەستيتسيالار تارتۋ كولەمىن ارتتىرۋ قاجەتتىگىنە اۋداردى. وسى ماقساتتا جەكە كاسىپورىندار مەن كاسىپكەرلەرگە قولايلى جاعدايلار جاساۋ تاپسىرىلدى.
بۇدان وزگە, شەت ەلدەردەگى وكىلدىكتەردە دە بۇل جۇمىس كۇشەيتىلىپ, ناقتى ۇيلەستىرىلۋى ءتيىس. ەلشىلىكتەردىڭ نەگىزگى جۇمىسى — ينۆەستيتسيالار تارتۋ ماسەلەلەرى. قانداي ەلدەن, قاي ەلشىلىكتىڭ كومەگىمەن قانشا ينۆەستيتسيالار تارتىلعانىن انىقتاۋ ماقساتىندا, بارلىق ەلشىلىكتەر جۇمىسىنداعى تارتىلعان ينۆەستيتسيالارعا جانە ولاردىڭ جۇمىسىنىڭ KPI-نا تالداۋ جۇرگىزۋ تاپسىرىلدى.
ەكىنشى. وڭىرلەردە وتكىزىلىپ جاتقان ينۆەستيتسيالىق فورۋمدار: ءاربىر وڭىرلىك فورۋم قورىتىندىسىنا سايكەس بىرقاتار جوبالار بويىنشا كوپتەگەن مەموراندۋمدار مەن كەلىسىمدەرگە قول قويىلادى. باقىتجان ساعىنتاەۆ قول قويىلعان مەموراندۋمدار بويىنشا ينۆەستيتسيالىق جوبالاردى ىسكە اسىرۋ ساپاسىن ارتتىرىپ, تالداۋ جۇرگىزۋدى تاپسىردى. كاسىپورىنداردىڭ تابىستى جۇمىس ىستەۋى ەل ەكونوميكاسىن وسىرۋگە قوسىمشا ىقپال ەتەدى.
ءۇشىنشى. قازاقستاندا جۇمىس ىستەيتىن شەتەلدىك ينۆەستورلار ەلىمىزگە وتباسى مۇشەلەرىمەن بىرگە كەلەدى. سوعان وراي, ولاردى تىركەۋ, بالالاردى مەكتەپكە دەيىنگى مەكەمەلەرمەن, مەكتەپتەرمەن قامتاماسىز ەتۋ, مەديتسينالىق كومەك كورسەتۋ جانە باسقا دا سەرۆيستىك قىزمەت كورسەتۋگە قاتىستى ماسەلەلەر ءجيى تۋىندايدى. وسىعان بايلانىستى بارلىق ينۆەستورلارعا قىزمەت كورسەتۋدى ءبىر پورتالدا ورتالىقتاندىرۋدىڭ ماڭىزدىلىعى اتاپ ءوتىلدى.