ءال-فارابي اتىنداعى قازۇۋ-دە III حالىقارالىق تۇركى دۇنيەسى دەرەكتى فيلمدەر فەستيۆالىنىڭ قازاقستاندىق باعدارلاماسى سالتاناتتى تۇردە اشىلدى. بۇل شارا تۇركى الەمى جۋرناليستەر فەدەراتسياسى مەن قازاق ۇلتتىق ۋنيۆەرسيتەتىنىڭ ۇيىمداستىرۋىمەن ءوتتى.
كينوفەستيۆالدىڭ سالتاناتتى اشىلۋ راسىمىندە تۇركى الەمى جۋرناليستەر فەدەراتسياسىنىڭ پرەزيدەنتى مەندەرەس دەمير, تۇركيانىڭ الماتىداعى باس كونسۋلى رىزا قاعان يىلماز, قازۇۋ-ءدىڭ ءبىرىنشى پرورەكتورى مۇحامبەتقالي بۇركىتباەۆ جانە قازاقستان اتىنان قاتىسقان «كاميلا اجە» دەرەكتى ءفيلمىنىڭ باس كەيىپكەرى كاميلا قاسىموۆا شارانىڭ قۇرمەتتى قوناعى بولدى. «دەرەكتى فيلمدەر فەستيۆالى تۇركى الەمى ەلدەرىنىڭ كوپقىرلى مادەني ومىرىندەگى ماڭىزدى جانە ەلەۋلى وقيعالاردىڭ بىرىنە اينالدى. جالپى تۇركى مۇراسىن ساقتاۋعا, رۋحاني بايلانىستى نىعايتۋعا, تۇركى تىلدەس ەلدەردىڭ شىعارماشىلىق ينتەگراتسياسىنا ارنالعان كينوفەستيۆالدى وتكىزۋ ءبىز ءۇشىن ۇلكەن مارتەبە. وسى ورايدا تۇركى دۇنيەسىنىڭ رۋحاني قۇندىلىقتارىن ناسيحاتتاپ, كينوفەستيۆالدى وتكىزۋگە ەرەكشە ۇلەس قوسىپ جۇرگەن تۇركى الەمى جۋرناليستەر فەدەراتسياسىنىڭ پرەزيدەنتى, ۇيىمداستىرۋ كوميتەتىنىڭ توراعاسى مەندەرەس دەمير مىرزاعا العىسىمىز شەكسىز»,–دەدى م.بۇركىتباەۆ.
«سەگىز ەل, سەگىز شاھار – ءبىر فەستيۆال» ۇرانىمەن ءوتىپ جاتقان فەستيۆال وتكەن جىلدارى تۇركيانىڭ ستامبۋل قالاسىندا باستالىپ, ءازىربايجاننىڭ باكۋ شاھارىندا جالعاسىن تاپسا, ءۇشىنشى رەت قازاق ەلىندە شىمىلدىعىن ءتۇردى. ءار ەلدەگى كينوشەرۋدىڭ ارناۋلى ءبىر تاقىرىپتى قامتيتىندىعى – فەستيۆالدىڭ باستى ەرەكشەلىگى. الماتىدا ۇيىمداستىرىلعان فەستيۆال انا تاقىرىبىنا ارنالدى. «تۇركى انا» اتتى ورتاق اتاۋمەن جيناقتالعان دەرەكتى فيلمدەر توپتاماسى تارقاتقان سەگىز تۇركى ەلى انالارىنىڭ جان تەبىرەنتەرلىك قىزىق تا مەحناتتى ءومىرى كورەرمەندى تەرەڭ ويدا قالدىردى. ۇلتى, ءتىلى, ەلى مەن جەرىندە ايىرماشىلىق بولعانىمەن, بارلىق اناعا ورتاق مەيىرىم, سۇيىسپەنشىلىك, كەشىرىم, كۇرەس ۇعىمى بىردەي بولاتىنىن, ولار ءۇشىن بۇل قۇندىلىقتار ءمانىنىڭ ەشقاشان وزگەرمەيتىنىن ءار ەلدىڭ رەجيسسەرى ومىردەن الىنعان قاراپايىم وقيعالاردى قابىستىرا وتىرىپ, شەبەر شيراتا ءبىلدى.
جىل وتكەن سايىن كينوفەستيۆالدىڭ گەوگرافيالىق اۋماعىنىڭ كەڭەيىپ كەلە جاتقانى رەجيسسەرلەردىڭ دەرەكتى فيلمگە قىزىعۋشىلىعىن عانا ەمەس, ونىڭ تۇركى ەلدەرى تاراپىنان زور قولداۋعا يە ەكەنىن دە كورسەتەدى. الاتىداعى فەستيۆالدە تۇركيا, قازاقستان, تۇركىمەنستان, قىرعىز رەسپۋبليكاسى, كيپر, وزبەكستان جانە رەسەيدىڭ (باشقۇرتستان جانە تاتارستان) ەڭ تاڭداۋلى كينو تۋىندىلارى ءوزارا سىنعا ءتۇسىپ, ءار ەلدەگى دەرەكتى ءفيلمنىڭ دامۋ دەڭگەيى بەلگىلەنىپ, تارازىعا ءتۇستى. فيلم مازمۇنى قازىرگى الەۋمەتتىك, مادەني, رۋحاني جانە قوعامدىق ماڭىزى زور تاقىرىپتارعا, سونداي-اق جاستار تاربيەسىنە كوبىرەك باعىتتالعان.
كينوفەستيۆالگە 140 رەجيسسەردىڭ جۇمىسى قابىلدانىپ, ونىڭ ىشىنەن تەك 12 فيلم عانا اقتىق سىنعا جولداما العان. كوپشىلىكتىڭ سۇراۋى بويىنشا فەستيۆال ەرەجەسىنە بيىلعى جىلى بىرقاتار وزگەرىستەر ەنگىزىلىپ, كاسىبي رەجيسسەرلەر مەن ستۋدەنتتەر جەكە-جەكە سىنعا ءتۇستى. تۇركىتىلدەس ەلدەردە دەرەكتى فيلم سالاسىن دامىتۋ ماقساتىمەن ۇيىمداستىرىلعان فەستيۆالدىڭ قۇرمەتتى قوناقتارى كەلەر جىلعى شارانىڭ تاقىرىبى «تۇركى اتاسى بولسىن» دەگەن ۇيعارىمعا كەلدى. تۇركى ەلدەرىندەگى ەر ادامداردىڭ ازاماتتىق, پسيحولوگيالىق, مورالدىق, تۇلعالىق بەينەسىن كوركەم تاسىلمەن كورسەتۋ, ونىڭ وتباسىنداعى, قوعامداعى ورنىن سيپاتتاپ, سالىستىرۋ ارقىلى ءبىر-بىرىنە ۇقساستىعىن, تۋىستىعىن نەمەسە دارالىعىن اشاتىن دەرەكتى فيلمدەر كورەرمەننىڭ بارلىق توبى ءۇشىن قىزىقتى بولارى ءسوزسىز.
ايگۇل احانبايقىزى,
«ەگەمەن قازاقستان»
الماتى