بۇگىن بۇكىلالەمدىك ءىلبىس كۇنى. 2013 جىلى 23 قازان كۇنى ىلبىستەردى قورعاۋ بويىنشا حالىقارالىق فورۋم ءوتىپ, بىشكەك دەكلاراتسياسى قابىلدانعالى بەرى ارناۋلى كۇن رەتىندە اتالىپ كەلەدى.
كوشپەلى حالىقتار ءىلبىستى كيەلى, قاسيەتتى اڭ دەپ قاستەرلەگەن. بيقۇمار كامالاش ۇلىنىڭ «قازاق حالقىنىڭ سالت-داستۇرلەرى» كىتابىندا ء«ىلبىس تەرىسىن حان ورداسىنا ءىلىپ, تاققا جاۋىپ, استىنا توسەنىپ وتىراتىن سالت بار. موڭعولدىڭ سوڭعى حانى بوعدا جابزىندامبىنىڭ 150 ءىلبىس تەرىسىن جاپقان كيىز ءۇيى مۇراجايدا ساقتاۋلى. ەرتەدە ەل باسى, پاتشا, قاعان, بي, تورە, باتىرلار ءىلبىس تەرىسىنەن ىشىك كيگەن. اسكەر باسى, ەرجۇرەك باھادۇرلەر دۇشپاندارىنا ايبات كورسەتۋ ءۇشىن, ءىلبىس تەرىسىن جامىلىپ جاۋعا شاباتىن بولعان. باتىرلار جاۋىنا شاباردا, بارىسقا ۇقساس شۇبار, تەڭبىل شۇبار ات ءمىنىپ, دۇشپانىنىڭ ۇرەيىن قاشىرىپ «ايبارلاناتىن» بولعان» دەپ جازادى.
قازىرگى ۋاقىتتا قازاقستاندا 130-عا جۋىق ءىلبىس بار. اۋىل شارۋاشىلىعى مينيسترلىگى ورمان شارۋاشىلىعى جانە جانۋارلار دۇنيەسى كوميتەتى قىزمەتكەرلەرىنىڭ ايتۋىنشا, ىلبىستەردى قورعاۋدىڭ, كوبەيتۋدىڭ جۇيەلى شارالارى قولعا الىنعان. ءىلبىستى زاڭسىز اتىپ العانى ءۇشىن 2 مىڭ اەك (4 ملن 810 مىڭ تەڭگە) كولەمىندە ايىپپۇل سالىنادى نەمەسە 3-7 جىل ارالىعىندا باس بوستاندىعىنان ايىرىلۋى مۇمكىن.
ايا ءومىرتاي,
«ەگەمەن قازاقستان»