ەلىمىزدىڭ مادەنيەتى مەن قاسيەتتى ورىندارىمەن تانىسۋ ءۇشىن استاناعا الەمنىڭ ۇزدىك بۇقارالىق اقپارات قۇرالدارى وكىلدەرى كەلدى. سىرتقى ىستەر مينيسترلىگىنىڭ قولداۋىمەن ۇيىمداستىرىلعان اپتالىق ءباسپاسوز تۋرى بارىسىندا جۋرناليستەر استانا, الماتى مەن تۇركىستان قالالارىن ارالادى.
ءباسپاسوز تۋرى مەملەكەت باسشىسى نۇرسۇلتان نازارباەۆتىڭ «رۋحاني جاڭعىرۋ» باعدارلاماسى اياسىندا جۇزەگە اسىرىلىپ وتىر. تۋرعا مادەنيەت جانە ونەر سالاسىندا ماماندانعان ۇلىبريتانيا, يتاليا, پولشا, قىتاي, كورەيا جانە يندونەزيادان كەلگەن جۋرناليستەر قاتىستى. تۋردىڭ العاشقى كۇنى تىلشىلەر ەلورداداعى قازاق ۇلتتىق ونەر ۋنيۆەرسيتەتى, ۇلتتىق مۋزەي مەن «استانا-بايتەرەك» مونۋمەنتى سىندى ەلوردانىڭ كورىكتى جەرلەرىن ارالاپ, قالا كەلبەتىمەن تانىستى. سونداي-اق «استانا بالەت», «استانا وپەرا», «EXPO-2017» اۋماعىندا ورنالاسقان قازاقستاندىق «نۇر الەم» پاۆيلونىنىڭ ەكسپوزيتسيالارى تانىستىرىلدى.
كەلەسى كۇنى وڭتۇستىك جۇرتشىلىعى شەتەلدىك قوناقتاردى قازاقى داستۇرمەن قارسى الدى. ءباسپاسوز تۋرىنىڭ قاتىسۋشىلارىنا ەجەلگى وتىرار كونە شاھارى, قوجا احمەت ياساۋي مەن ارىستان باب كەسەنەلەرى, ازىرەت سۇلتان مەملەكەتتىك تاريحي-مادەني مۇراجاي-قورىعىنا ەكسكۋرسيالار ۇيىمداستىرىلدى. سونىمەن قاتار جۋرناليستەر وتىرار مەملەكەتتىك ارحەولوگيالىق قورىق-مۋزەيىن ارالاپ, ولكە تاريحىنا قانىقتى. قوناقتار ۇلتتىق تاعامدار قويىلعان داستارحاننان ءدام تاتىپ, وتىرارلىق ونەرپازداردىڭ ءان-جىرىنا قۇلاق ءتۇردى. قوناقتار جولعا اتتانار الدىندا اۋدان باسشىسى ءۇش تىلدە جارىق كورگەن «وتىرار جادىگەرلەرى» كىتابىن سىيعا تارتتى.
الماتىعا ساپار بارىسىندا جۋرناليستەر قاۋىمى كوركەمسۋرەت مۇراجايى, ءا.قاستەەۆ اتىنداعى ونەر مۇراجايى, الماتى مۇراجايى, «ترانسفورما» تەاتر الاڭى, «Esentai Gallery» ونەر گالەرەياسى, ءداستۇرلى مۋزىكانىڭ مۋلتيمەديا ورتالىعى, «Qazaq-Oner» قولونەر ورتالىعى, جاس قازاق اقىندارىمەن كەزدەسۋ سياقتى مادەني ءىس شارالارعا قاتىستى. سونداي-اق كورىكتى مەكەننىڭ ۇزدىك تۋريستىك ورتالىقتارى جۋرناليستەر قاۋىمىن ادەمى كەلبەتىمەن تاڭقالدىردى.
يندونەزيانىڭ «Indonesia Tatler» گازەتىنىڭ ءجۋرناليسى ليۆياني سينتيانانى ەلوردامىز ءوزىنىڭ اسەم عيماراتتارىمەن باۋراپ العان. «استانا قالاسى باتىس پەن شىعىس مادەنيەتىن, ءداستۇرىن توعىستىرعان زاماناۋي قالا دەپ ايتار ەدىم. ۇلتتىق ناقىشتاعى كورنەكتى ورىندار مەن مونۋمەنتتەر, ەرەكشە ساۋلەتتىك عيماراتتاردى, مادەني ورىندار مەن ساياباقتار استانانىڭ اجارىن اشا تۇسكەندەي» دەدى ول.
كورەيانىڭ «International Policy Digest» اگەنتتىگىندە قىزمەت ەتەتىن ۇلىبريتانيالىق جۋرناليست دجون لايمان قازاقستانعا العاش رەت كەلگەن. «قازاقستاننىڭ وزىنە ءتان ەرەكشە ءستيلى بار. مىسالى استانا - زاماناۋي ونەردىڭ, مادەنيەتتىڭ ورداسى. استانا قۇرىلىسى ەۋروپالىق جانە شىعىس ءستيلىنىڭ ەڭ وزىق ارحيتەكتۋرالىق ءستيلىن ايشىقتاپ تۇرسا, تۇركىستان قالاسى ورتا عاسىرلىق ساۋلەت ونەرىنىڭ بۇگىنگە دەيىن بۇزىلماي ساقتالعان ەڭ ءبىر وزىق ۇلگىسى» دەپ ءوز ويىمەن ءبولىستى.
«جاھاندىق الەمدەگى زاماناۋي قازاقستاندىق مادەنيەت» جانە «قاسيەتتى قازاقستان» جوبالارى اياسىندا ۇيىمداستىرىلعان بۇل ءباسپاسوز تۋرى ەل ءتۋريزمىن دامىتۋعا جانە قازاقستاننىڭ دامىپ كەلە جاتقان مەملەكەت رەتىندەگى ءيميدجىن قالىپتاستىرۋعا وڭ اسەرىن تيگىزەدى.
ءمادينا جالەلقىزى,
«ەگەمەن قازاقستان»