بۇگىن وسكەمەندەگى جىبەك ماتالار كومبيناتى (جمك) ىقشام اۋدانىندا قازىبەك بي داڭعىلى سالتاناتتى تۇردە اشىلدى.
ەستەرىڭىزگە سالا كەتەيىك, بىلتىر وبلىستىق سوتتىڭ ۇجىمى مەن جمك ىقشاماۋدانىنىڭ اقساقالدار القاسى قالالىق اكىمدىككە بۇعان دەيىن كارل ماركس ەسىمىن يەلەنىپ كەلگەن ۇلكەن كوشەگە قازاقتىڭ اتاقتى ءۇش ءبيىنىڭ ءبىرى قازىبەك كەلدىبەك ۇلىنىڭ اتىن بەرۋ جونىندە ۇسىنىس بىلدىرگەن بولاتىن.
داڭعىلدىڭ اشىلۋ سالتاناتىنا وبلىستىق سوتتىڭ توراعاسى نۇرلان قايىربەكوۆ, «نۇر وتان» پارتياسى وسكەمەن قالالىق فيليالى توراعاسىنىڭ ءبىرىنشى ورىنباسارى مايرا ەكىباسوۆا, قالالىق اقساقالدار القاسىنىڭ توراعاسى سايلاۋحان اۋحاديەۆ, سالالىق مادەنيەت, سپورت جانە اقپارات قىزمەتكەرلەرى كاسىپوداعى وبلىستىق فيليالىنىڭ توراعاسى ءتۇسىپحان تۇسىپبەكوۆ قاتىسىپ, قۇتتىقتاۋ ءسوز سويلەپ, لەبىزدەرىن جەتكىزدى. «شىعىس قازاقستان وبلىسىنىڭ ورتالىعى - وسكەمەن قالاسىندا ەل تاريحىنداعى ۇلى تۇلعالاردىڭ ءبىرى قازىبەك ءبيدىڭ اتىنداعى كوشەنىڭ اشىلۋى سوت جۇيەسىندەگى اۋقىمدى ءىس-شارالاردىڭ تاماشا ءبىر ۇلگىسى. قاز داۋىستى قازىبەك بي – قازاق حالقىنىڭ ۇلى ءۇش ءبيىنىڭ ءبىرى, كورنەكتى قوعام جانە مەملەكەت قايراتكەرى, حالىق اراسىندا بەدەلدى ءارى ءادىل بي رەتىندە ەل ەسىمىندە قالادى. ءبىز وتكەنىمىزدى قاستەرلەپ, بۇگىنىمىزدى قادىرلەي وتىرىپ, بولاشاققا زور ۇمىتپەن قول سوزامىز. «رۋحاني جاڭعىرۋ» باعدارلاماسىن ىسكە اسىرۋ ارقىلى تاريحىمىزدى, مادەنيەتىمىز بەن ۇلتتىق رۋحىمىزدى جاڭعىرتىپ, بايىتاتىن بولامىز. قازىبەك ءبيدىڭ اتىندا قازىرگى تاڭدا قاراعاندى, الماتى جانە شىمكەنت قالالارىندا كوشە بار, ال بۇگىن مىنە ءور التايدىڭ ورتاسىندا ورنالاسقان وسكەمەن قالاسىنىڭ قارقىندى دامىپ جاتقان ىقشام اۋدانىنىڭ داڭعىلىنا ۇلى تۇلعانىڭ اتىنا كوشە بەرىلىپ وتىر. بۇل ءبىزدىڭ ءبىر جاعىنان, ۇلى تۇلعالاردى ۇلىقتاپ, ۇلتىمىزدىڭ دانالارىنا كورسەتكەن قۇرمەتىمىز بولسا, ەكىنشى جاعىنان, كەلەر ۇرپاققا ميراس جانە ۇلگى-ونەگە», - دەدى سوت توراعاسى.
وبلىس ورتالىعىن قازاقىلاندىرۋ ماسەلەسىنە اركەز قولداۋ كورسەتىپ, باتىل-باتىل پىكىرلەرىن ايتىپ جۇرەتىن «نۇر وتان» پارتياسى وسكەمەن قالالىق فيليالى توراعاسىنىڭ ءبىرىنشى ورىنباسارى مايرا ەكىباسوۆا: «بۇگىن ءبىزدىڭ سۇيىكتى وسكەمەنىمىزدە ۇلكەن مەرەكە. قالامىزداعى ۇلكەن داڭعىلدىڭ بىرىنە قازىبەك بي بابامىزدىڭ ەسىمى بەرىلىپ جاتىر. داڭعىلدىڭ وبلىستىق سوت عيماراتىنا جاقىندىعى دا كەزدەيسوق ەمەس سەكىلدى. بۇل – ءداستۇر جالعاستىعى, ۇرپاقتار ساباقتاستىعى», - دەي كەلە قالا تۇرعىندارىن داڭعىلدى تازا ۇستاۋعا شاقىردى.
شارا بارىسىندا ءسوز العان وبلىستىق سوتتىڭ سۋدياسى عاليا اليپانوۆا قازىبەك ءبيدىڭ ءومىرى مەن قۇندى مۇرالارىنا جايىندا ايتا كەلىپ: «داڭعىل بويىنا قوعام قايراتكەرىنىڭ ەسكەرتكىشىن ورناتىپ, ءارتۇرلى جارنامالىق باننەرلەردىڭ ورنىنا بابالارىمىزدىڭ جاس ۇرپاققا تاربيە بولارلىق ناقىل سوزدەرىن ءىلىپ قويساق نۇر ۇستىنە نۇر بولار ەدى» دەگەن ۇسىنىسىن جەتكىزدى.
قوعام قايراتكەرى ءتۇسىپحان تۇسىپبەكوۆ وسكەمەنگە قازىبەك ءبيدىڭ كەلۋى جاقسىلىقتىڭ بەلگىسى ەكەندىگىنە توقتالدى. «قازىبەك بي - قازاقتىڭ ءۇش حانىمەن بىرگە جۇمىس ىستەگەن, جۇزگە تاقاپ بارىپ ومىردەن وتكەن الاشتىڭ عۇلامالارىنىڭ ءبىرى. بۇگىن وشكەنىمىز جانىپ, ولگەنىمىز ءتىرىلىپ جاتىر دەۋگە بولادى. وسىنىڭ ءبارى – تاۋەلسىزدىكتىڭ ارقاسى. قازىرگى جاستار كوپ دۇنيەنى ءبىلۋى كەرەك, سەزىنۋى كەرەك. قازاقتىڭ تاريحىن قايتا جازۋ ماسەلەسى دە وزەكتى. قازىر تاريحىمىزدىڭ بۇرمالانعانى, وزگە ۇلتتاردىڭ سويىلىن سوعاتىن تاريحتىڭ قولدان جاسالعانى بەلگىلى بولىپ جاتىر. بۇگىندە تاريحشىلارىمىز ۇلىلارىمىزدىڭ ءومىرىن قايتادان زەرتتەپ جاتىر. تاريحتى زەرتتەيتىن ءارتۇرلى ينستيتۋتتار اشىلىپ جاتىر. وسىنىڭ بارىنە جان بىتىرگەن – ەلباسىنىڭ «رۋحاني جاڭعىرۋ» باعدارلاماسى. قازىر جوعىمىزدى ىزدەپ جاتىرمىز. حالىق مۇنى سەزىنىپ جاتىر», - دەدى ت.تۇسىپبەكوۆ.
ازامات قاسىم,
«ەگەمەن قازاقستان»
وسكەمەن