سوڭعى جىلدارى «وتباسى كۇنى» مەرەكەسى كەڭىنەن اتالىپ وتەدى. قوستانايدا قازىردىڭ وزىندە مەرەكەگە بايلانىستى شارالار باستالىپ كەتتى. «ۇيدەگى بەرەكە» اكتسياسىندا ايەلدەر مەن بالالاردى زورلىق-زومبىلىقتان قورعاۋ شارالارى تۋرالى ايتىلدى. وندا ادامدارعا زاڭنامالىق كەڭەستەر بەرىلدى, تۇرعىنداردى قالالىق ىشكى ىستەر باسقارماسىنىڭ جانە داعدارىس ورتالىقتارىنىڭ سەنىم تەلەفوندارىنان حاباردار ەتتى.
وسى اكتسيانىڭ شەڭبەرىندە قوستاناي قالالىق ىشكى ىستەر باسقارماسىنىڭ جەرگىلىكتى پوليتسيا قىزمەتى سۋرەت سالۋدان مەكتەپ وقۋشىلارى اراسىندا «باقىتتى وتباسىنداعى باقىتتى بالالىق شاق» اتتى بايقاۋ ۇيىمداستىردى. وسىنداي بايقاۋ تەك وبلىس ورتالىعىندا عانا ەمەس, بۇكىل اۋداندار مەن قالالار مەكتەپتەرىن دە قامتىدى.
ايەلدەر مەن بالالاردى زورلىق-زومبىلىقتان قورعاۋ ورتالىعىندا وبلىستىق ىشكى ىستەر دەپارتامەنتىنىڭ اعا ينسپەكتورى گاۋحار حايرۋللينا وسى ورتالىقتا ۋاقىتشا تۇرىپ جاتقاندار اراسىندا كەزدەسۋ وتكىزدى. «پسيحولوگيالىق وزگەرۋ ورتالىعىنىڭ» پسيحولوگى ەلەنا كارىموۆا باستى رولدە دجەنيففەر لوپەس وينايتىن «س مەنيا حۆاتيت» ءفيلمىن كورسەتە وتىرىپ, زورلىق-زومبىلىقتىڭ قۇرباندارىن پسيحولوگيالىق تۇزەۋگە كومەك بەرۋگە ىقپالى مول اڭگىمە جۇرگىزدى. سونىمەن قاتار وتباسىلىق پسيحولوگ نينا كوسيۋك كەڭەستەر بەردى.
«وتباسى كۇنى» مەرەكەسىندە تەك جاقسى, ۇلگىلى جايلار ايتىلادى. دۇرىس نارسە. بىراق وتباسىنا قاتىستى كەلەڭسىز وقيعالار دا جەتىپ ارتىلادى عوي. ولاردى تۇزەۋ ءۇشىن مەرەكە قارساڭىندا زورلىق-زومبىلىق كورگەن جاندار اراسىندا سەيىلتۋ, ولاردى دۇرىس جولدان اداسپاۋ جۇمىستارى وتە كەرەك. ونداي جاندار ءۇشىن ومىردەن ءتۇڭىلىپي كەتپەۋ, وتباسىلىق قۇندىلىقتاردىڭ قۇنىن تۇسىرمەۋ جاعىن قاراستىرامىز» دەدى گاۋحار حايرۋللينا.
ء نازيرا جارىمبەت,
«ەگەمەن قازاقستان»
قوستاناي