ءانۋار كۇمپەكەەۆ پاۆلودار قالاسىنىڭ اكىمى لاۋازىمىنا تاعايىندالدى.
«وبلىس ورتالىعىنىڭ جاڭا اكىمىن ءوڭىر باسشىسى بولات باقاۋوۆ تانىستىردى. ول پاۆلوداردىڭ جاڭا باسشىسىنىڭ كانديداتۋراسىنا پرەزيدەنت اكىمشىلىگى مەن قالالىق ءماسليحات دەپۋتاتتارى كەلىسىم بەرگەنىن ايتتى», دەپ مالىمدەدى پاۆلودار وبلىسى اكىمدىگىنىڭ ءباسپاسوز قىزمەتى.
ءانۋار كۇمپەكەەۆ 1984 جىلى پاۆلوداردا دۇنيەگە كەلگەن. 2005 جىلى م.ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىن ەكونوميكا ماماندىعى بويىنشا ءبىتىرىپ, 2007 جىلى ۇلىبريتانيانىڭ برەدفورد ۋنيۆەرسيتەتىندە ەكونوميكالىق ساياسات باعىتىندا ماگيستر دارەجەسىن الدى, 2016 جىلى ش. ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىن ءتامامدادى.
ءا. كۇمپەكەەۆ - قازاقستان رەسپۋبليكاسى پرەزيدەنتىنىڭ «بولاشاق» حالىقارالىق ستيپەندياسىنىڭ ءبىتىرۋشىسى. ءار جىلدارى قازاقستان رەسپۋبليكاسى دەنساۋلىق ساقتاۋ مينيسترلىگىنىڭ ەكونوميكا جانە قارجى دەپارتامەنتىنىڭ جەتەكشى مامانى, اعا مامانى بولدى, «قر ۇلتتىق بيوتەحنولوگيالار ورتالىعى» رمك ماركەتينگ جانە كوممەرتسيالاندىرۋ, ستراتەگيالىق دامۋ دەپارتامەنتتەرىنىڭ ديرەكتورى لاۋازىمىن اتقاردى, «قازاقستان تكش جاڭعىرتۋ جانە دامىتۋ ورتالىعى» اق عىلىمي-تەحنيكالىق ساياسات جانە نورمالاندىرۋ دەپارتامەنتىنىڭ ديرەكتورى, اكتسيونەرلىك قوعامنىڭ اتقارۋشى ديرەكتورى قىزمەتتەرىن اتقاردى. 2012 جىلدان 2015 جىلعا دەيىن اقمولا وبلىسى ستەپنوگور قالاسى اكىمىنىڭ ورىنباسارى بولىپ, 2015 جىلدىڭ مامىرىندا قالا اكىمى لاۋازىمىنا تاعايىندالدى.