جاستار – پارتيالىق جوبالاردىڭ بەلسەندى قاتىسۋشىسى

«نۇر وتان» پارتياسى توراعاسىنىڭ ءبى­رىنشى ورىنباسارى ماۋلەن اشىمباەۆ جاستار فورۋمىنىڭ ءۇشىنشى ماۋسىم قاتىسۋشى­لارىمەن ارنايى كەزدەسىپ, ولاردىڭ الداعى ومىرلەرىنە ساتتىلىك تىلەدى, سونداي-اق قازىرگى الەمدىك گەوساياسي احۋالعا نازار اۋدارىپ, وسى جولداعى جاستاردىڭ رولىنە توقتالدى.

– ەلباسىنىڭ ساياسي جانە رۋحاني جاڭعىرۋ رەفورمالارىن جۇزەگە اسىرۋدى بەلسەندى جالعاستىرۋىمىز قاجەت. سەبەبى مەملەكەت باسشىسى جاريالاعان جۇيەلى جاڭعىرۋ باعدار­لامالارىنىڭ نەگىزگى ماقساتى – ۇلتتىق قۇن­دى­لىق­تارىمىزدى دارىپتەپ, الەمدىك تاجىري­بەلەر­دەن ۇيرەنە وتىرىپ ەلدىگىمىزدى نىعايتۋ. سون­دىقتان بۇل جۇمىستارعا مەملەكەتتىك ورگانداردان بولەك, قوعامدىق بىرلەستىكتەر, سايا­سي پارتيالار, ۇكىمەتتىك ەمەس ۇيىمدار جانە جاستار بەلسەنە قاتىسۋى كەرەك, – دەدى ماۋلەن اشىمباەۆ.

پارتيا توراعاسىنىڭ ءبىرىنشى ورىنباسارى بۇل باعىتتا «نۇر وتاننىڭ» قولعا العان جۇمىستارىنا كوڭىل ءبولىپ, جاستارعا جاڭا پار­تيالىق جوبالار جايىندا جان-جاقتى ءسوز ەتتى. ونىڭ ايتۋىنشا, 20-دان استام جاڭا پار­تيالىق جوبا قولعا الىنىپ, ءتيىستى جۇمىستار باستالعان.

ءوز سوزىندە سپيكەر پارتيانىڭ «تسيفر­لى قازاقستان», «رۋحاني جاڭعىرۋ» باعدار­لامالارىن جۇزەگە اسىرۋعا ۇلەس قوسۋعا, حالىقتىڭ تسيفرلى ساۋاتتىلىعىن ارتتىرۋعا جانە كاسىپكەرلىكتى قولداۋعا باعىتتالعان بىرقاتار ناقتى جوبالاردى قولعا العانىنا ەرەكشە توقتالدى. اتاپ ايتقاندا, پارتيا الداعى ءۇش جىلدا تەگىن 1000 ءىت-سىنىپ اشۋدى جوسپارلاپ وتىر. وندا جىلىنا 150 مىڭ بالا باعدارلامالاۋ, روبوت تەحنيكالارى جانە 3D مودەلدەۋ نەگىزدەرىن مەڭگەرەتىن بولادى. ال بولاشاعىن اقپاراتتىق تەحنولوگيا سالاسىمەن بايلانىستىرعىسى كەلەتىن ازاماتتار ءۇشىن «نۇر وتان» 20 ءىت-ورتالىق اشىپ, بىلىكتى ءىت-ماماندار دايارلاۋ ءىسىن باستاپ كەتتى. اتالعان جوبانىڭ تۇلەكتەرىنە تەك قازاقستاننان عانا ەمەس, الەمدىك ءىت-نارىعىنداعى تاپسىرىستاردى ورىنداۋ ارقىلى شەتەلدىك كومپانيالاردان دا جۇمىس تابۋعا مۇمكىندىك بار. قازىردىڭ وزىندە ەلىمىز بويىنشا 100-دەن استام ءىت-سىنىپ پەن 15 ءىت-ورتالىق اشىلدى. ماۋلەن اشىمباەۆ بۇل جۇمىستار «نۇر وتان» پارتياسىنىڭ «تسيفرلى قازاقستان» باعدارلاماسىنىڭ جۇزەگە اسىرىلۋىنا قوسقان ناقتى ۇلەسى ەكەنىن اتاپ ءوتتى.

اۋىل بالالارىنا اعىلشىن ءتىلىن ۇيرەتۋ ءۇشىن پارتيا «English for Jastar» جوباسىن جۇزەگە اسىرۋدا. سونىڭ اياسىندا الداعى ۋا­قىت­تا شەتەلدىك ازاماتتاردى, «بولاشاق» باعدار­لا­ماسىنىڭ تۇلەكتەرىن جانە اعىلشىن ءتىلىن ەر­كىن مەڭگەرگەن جاسوتاندىقتاردى, بارلى­عى 500-گە جۋىق جاس ازاماتتى ەلىمىزدىڭ ءار وڭىرىن­دەگى اۋىل-ايماققا, سونىڭ ىشىندە شالعاي­داعى ەلدى مەكەندەرگە جىبەرۋ جوسپارلانىپ وتىر.

بۇدان باسقا قازاقستاننىڭ ءار تۇكپىرىندە جاستار ينفراقۇرىلىمىن دامىتۋعا باعىت­تال­عان جاڭا پارتيالىق جوبالار دا بار. سو­لاردىڭ قاتارىندا وتاندىق كىتاپحانالار­دىڭ جۇمىسىن جاڭعىرتىپ, زاماناۋي ءبىلىم ور­تا­لىقتارى رەتىندە قايتا قۇرۋ باستاماسىن ەرەكشە اتاپ وتكەن ءجون. وسى ماسەلەگە نازار اۋدارعان ماۋلەن اشىمباەۆ ەلىمىزدەگى كىتاپ­حا­نالاردىڭ باسىم بولىگىندە ماتەريالدىق-تەحنيكالىق بازا مەن قىزمەت كورسەتۋ ساپاسى ەسكىرگەنىنە كوڭىل ءبولدى. سونىمەن قاتار «نۇر وتان» پارتياسى «مەكتەپ اسحانالارىن جاڭعىرتۋ» جوباسى ارقىلى ءبىلىم بەرۋ مەكەمەلەرىندە دۇرىس تاماقتانۋ جۇيەسىن ەنگىزۋدى قولعا الىپ وتىر.

«دەنساۋلىق ساباعى» جانە «سپورت ينفرا­قۇ­رىلىمىن جاڭعىرتۋ» جوبالارى ارقىلى پارتيا مەكتەپ وقۋشىلارىنىڭ سالاماتتى ءومىر سالتىن ۇستانۋلارىنا دا جاعداي جاساۋ­دى قولعا الۋدا. سونىڭ ناتيجەسىندە «نۇر وتان» بيزنەس قاۋىمداستىقپەن بىرلەسىپ مەكتەپتەردە قازىرگى زامانعا ساي سپورت الاڭدارىن اشىپ, باس­تاۋىش سىنىپ وقۋشىلارى ءۇشىن «دەنساۋلىق ساعاتىن» ەنگىزبەك.

سونىمەن قاتار ماۋلەن اشىمباەۆ قازىر اقپارات زامانى ەكەنىن ايتىپ, وسىنداي كەزەڭدە ەلباسى انىقتاپ بەرگەن مىندەتتەردى جۇزەگە اسىرىپ, ماقساتقا قول جەتكىزۋ جولىندا جاستاردىڭ بويىندا قانداي قاسيەتتەر بولۋى كەرەكتىگىنە توقتالدى.

كەزدەسۋ سوڭىندا جاستار وزدەرىن تولعان­دىرعان ساۋالدارىن جولداپ, الداعى ۋاقىتتا ءتۇرلى جوبالاردى پارتيامەن بىرلەسىپ جۇزەگە اسىرۋ ءۇشىن تىڭ يدەيالارىمەن ءبولىستى.

بايقال ءبايادىل,

«ەگەمەن قازاقستان»

اقمولا وبلىسى