الماتى قالاسىنداعى قارقىنمەن ءجۇرىپ جاتقان قۇرىلىستاردىڭ ءبىر بولىگىن ستۋدەنتتەردىڭ تۇرعىن-جايلارى قامتيدى. بۇگىندە جوعارى وقۋ ورىندارىنىڭ باسىم كوپشىلىگى شوعىرلانعان وڭتۇستىك استانادا 22 مىڭداي ستۋدەنت جاتاقحاناعا مۇقتاج.
قالا باسشىسى باۋىرجان بايبەك جۇمىس ساپارى اياسىندا اياقتالۋعا جاقىن جاتاقحانالار قۇرىلىسىمەن تانىستى. ستۋدەنتتەردى جاتاقحانامەن تولىققاندى قامتاماسىز ەتۋ ءۇشىن سوڭعى ءۇش جىلدا 37 جاتاقحانا سالۋ جوسپارلانىپ وتىر. قالا اكىمدىگىنىڭ ءباسپاسوز قىزمەتىنىڭ مالىمەتى بويىنشا, بيىلعى جىلى قولدانىسقا ءتورت جاتاقحانا بەرىلەدى. ال 12 جوعارعى وقۋ ورنىندا 4,8 مىڭ ورىندىق جاتاقحانا قۇرىلىسى ءۇشىن ارناي ۋچاسكەلەر انىقتالعان. سونداي-اق, قالادا 19 جاتاقحانا سالۋ ءۇشىن جەر تەلىمدەرى بەرىلىپ وتىر.
باۋىرجان بايبەك جۇمىس ساپارى بارىسىندا بوستاندىق اۋدانىندا سالىنعان 400 ورىندىق التى قاباتتى جاڭا جاتاقحانانى ارالادى. بۇگىنگى كۇنى مۇندا تۇرعىن جانە تۇرمىستىق بولمەلەردى جيھازبەن جابدىقتاۋ جۇمىستارى جۇرگىزىلۋدە. قازاقستان ينجەنەرلىك-تەحنولوگيالىق ۋنيۆەرسيتەتى قالا سىرتىنداعى ستۋدەنتتەرگە ارنالعان تۇرعىن ۇيگە قاجەتتىنىڭ بارلىعىن تولىعىمەن قامتاماسىز ەتەتىن بولادى.
اسفەندياروۆ اتىنداعى قازۇمۋ جانىنداعى 600 ورىندىق توعىز قاباتتى جاتاقحانا قۇرىلىسى دا اياقتالۋعا جاقىن. قازىرگى ۋاقىتتا الاڭى 11 مىڭ شارشى بولاتىن عيماراتتىڭ ىشكى ارلەۋ جانە كورىكتەندىرۋ جۇمىستارى جۇرگىزىلۋدە.
الماتىدا سونىمەن قاتار «الماتى جاستارى» باعدارلاماسى جالعاسىن تابۋدا. جاس وتباسىلارعا جەكە تۇرعىن ءۇي ساتىپ الۋعا مۇمكىندىك بەرۋ ماقساتىندا باستاپقى تولەمسىز 5% مولشەرىمەن 2 ملرد. تەڭگە قاراستىرىلعان.
سوڭعى جىلدارى الماتىدا تۇرعىن ءۇي قۇرىلىسىنىڭ قارقىنى 4 ەسەگە ءوسىپ, كەزەكتە تۇرعان ءاربىر ءۇشىنشى تۇرعىن پاتەرگە يە بولعان. ال جۋىق ارادا 17 مىڭنان اسا پاتەرلەر سالىناتىن بولادى.
ەلۆيرا سەرىكقىزى,
«ەگەمەن قازاقستان»
الماتى